بلوچستان تینا قدرتی زیبائی نا سوب آن تینا کنڈآ چکک،نوابزادہ زرین خان مگسی

کوئٹہ، پارلیمانی سیکرٹری کانود‘ سیل وسوات و ربیدہ نوابزادہ زرین خان مگسی پارینے کہ بلوچستان قدرتی زیبائی‘ بھلا کرکی پٹی، بڑز و بھلا مش، تاریخی ہند، متکن آ تہذیبی میرات و جتا ربیدہ نا سوب آن ملکی و جہانی سیل سوات نا اہم بنجا مننگ نا پورو لائخی تخک۔ صوبہ نا سیل سواتی ہند آتے گچین انفراسٹرکچر، رسینگ نا آسراتی و زموارانہ و مدامگی سیل سوات نا اصول آتا رد اٹ شون ترسا ہندی آبادی کن روزگار و کاروبار نا پوسکن آ وارخواہی تا ودی کننگ تون اوار زرکاری ءِ ہم شون تننگ مننگ کیک۔ دا خیال آتا درشانی ءِ او 27 ستمبر، جہانی یومِ سیل سوات نا رد اٹ تینا خاص کلہو اٹ کرے‘ نوابزادہ زرین خان مگسی پارے کہ سیل سوات بیرہ تفریح نا وڑ اسا اف بلکہ مچ آ دنیا ٹی زرگزرانی سرجز، روزگار، ربیدگی رابطہ و ہندی شونداری نا اسہ اہم ءُ بشخ اس جوڑ مسنے‘ بلوچستان اٹی دا بشخ انا شون تننگ صوبہ نا زرگزران نا جتا کننگ و مر انگا علاقہ غاتیٹی زرگزرانی سرجز ودی کننگ اٹی اہم کڑد ادا کننگ کیک۔ او پارے کہ بلوچستان نا بھلا سیم سیل سوات نا کیہی بشخ آتیکن بھاز وارخواہی فراوان کیک۔ مکران نا کرکی ڈیہہ‘ کنڈ ملیر، ہنگول نیشنل پارک، گوادر، پسنی و اورماڑہ تینا جاجتا کرکی زیبائی نا سوب آن نمان ءُ، وخت اس کہ زیارت نا صنوبر نا جنگل آک، کوئٹہ و ایب کیب انا دامانک‘ خضدار نا مولہ چٹوک و صوبہ نا ایلو مشی و قدرتی ہند آک ایڈونچر و ایکو ٹورازم کن بھاز وارخواہی فراوان کیرہ۔ بلوچستان حکومت ہم کنڈ ملیر، ہنگول، زیارت، مولہ چٹوک، پسنی و ایلو ہند آتے صوبہ نا نمان سیل سواتی میرات نا وڑ اٹ پیدوار کیک۔