بلوچستان اٹ انسرجنسی اف‘منٹ اس شناخت نا بنداو آ جتا مننگ نا سوچ ءِ مونی دننگ اٹی ءُ،میر سرفرازبگٹی

کوئٹہ، وزیراعلیٰ بلوچستان میر سرفراز بگٹی پارینے کہ بلوچستان اٹ انسرجنسی اف، بلکن منہ زموار شناخت نا بنداو آ جتا مننگ نا سوچ ءِ موی دننگ اٹی ءُ۔ دا وڑانا زموار آک پاکستان ءِ کیک انا وڑ بشخنگ خوارہ ولے پاکستان ءِ پرغنگ نا ہچ ءُ سازش اس سرسہب مفک۔ دا خیال آتا درشانی ءِ او کوئٹہ ٹی 21 می نیشنل ورکشاپ بلوچستان نا بشخ ہلوک آتیا ن تران کرسا کرے، دا وخت آ سینیٹ نا باسک سینیٹر دنیش کمار، کمکار حوالکاری و سیاسی باندات شاہد رند، پرنسپل سیکرٹری عمران زرکون اسک ہم ساڑی ئسر۔ وزیراعلیٰ میر سرفراز بگٹی پارے کہ بلوچ ورنا تے اسہ بے سوب ءُ جنگ اسے نا کنڈ آ دِکہ تننگ انگ ءِ، ہراڑان نئے بلوچستان نا ورناتے گڑاس دو بریک و نئے صوبہ نا آخبت ءِ فائدہ اس رسینگک۔ او پارے کہ غیر متوازن شونداری و پسماندگی ءِ بلوچستان اٹ بے ایمنی نا مرکزی سوب گوندنگ درست اف، انتئے کہ غیر متوازن شونداری نا ویل پاکستان تون اوار دنیا نا گیشتر ملک آتیٹی ساڑی ءِ۔ ولے شونداری کن اسہ جاگہ اس ہم توفک ءِ ہرفنگپک و نئے جاگہ اس ناحق خون کننگک۔ او ورناتیا زور شاغا کہ او راستی و تصور اٹی پرخ ءِ پہہ مریر و تینا صوبہ نا درست تاریخ نا بارواٹ معلومداری دوئی کیر۔ او پارے کہ پیشن نا ملک تولوک پاکستان مخالف زموار آک منظم پروپیگنڈہ نا کمک اٹ ورناتے گمراہ کننگ ءُ، ہندا سوب آن ورناک تعلیم، شونداری و روشنا آخبت آ چکارکیر و ریاست مخالف پروپیگنڈہ نا بشخ مفس۔ وزیراعلیٰ پارے کہ ریاست و ورنا تا نیام اٹ خلیج ءِ کم کننگ کن ورناتے ہر کہول آ بِننگ انگ ءِ۔ میرٹ ءِ مون آ درسا ہی ورناتے اوفتا روا حق تے تننگ مریک۔ بلوچستان اٹ آرٹیفیشل انٹیلیجنس آ تالان ٹیسٹنگ سسٹم درستی راستی کرفنگانے تانکہ ملازمت آتا عمل اٹ میرٹ و شفافیت ءِ پک کننگ مرے۔ ہچ ءُ حقدار اس تینا حق آن محروم مفک و ملازمت بیرہ میرٹ آ تننگک۔ میر سرفراز بگٹی پارے کہ بلوچستان اٹ تدوک آ اِرا سال اٹی پبلک سیکٹر ڈویلپمنٹ پروگرام آ سد درسد پیش رفت مسنے۔ اینٹی کرپشن ڈیپارٹمنٹ ءِ فعال کننگانے و چیف منسٹر انسپیکشن ٹیم ہم پورو وڑ اٹ متحرک ءِ۔ او پارے کہ چیف منسٹر انسپیکشن ٹیم شونداری پروگرام آتا معائنہ نا بنا ءِ اوناتینا حلقہ آن کرے، تانکہ پیدوار کلہو تننگ مرے کہ احتساب نا عمل بے پرخ مریک۔ او پارے کہ کرپٹ زموارآتا برخلاف کارروائی برجاء ءِ و دزگیری ہم مننگ ءِ۔ شونداری ڈٹ آتا چاروکی، شفافیت و میرٹ ءِ پک کننگ کن ادارہ غاتے فعال کننگ انگ ءِ۔ وزیراعلیٰ بلوچستان پارے کہ صوبہ ٹی گچین حکمرانی نا بنداو ءِ تخنگانے و اونا تسلسل ءِ برجاء تخنگک۔ حکومت نا مسخت ہندن ءُ نظام اس جوڑ کننگ ءِ ہراٹی میرٹ، شفافیت، جوابدہی و ورناتے کن وارخواہی تے پک کننگ مرے۔ اوکان پد ورکشاپ اٹ وزیراعلیٰ بلوچستان میر سرفراز بگٹی بلوچستان تون اوار ملک آن بروک آ بشخ ہلوک آتا سوج آتا ورندی ءِ تس و گچین کارکڑد مون نشان تروک آ طالبات آتا است بڈی کن لیپ ٹاپ ہم تس، دونیم گھنٹہ آن زیات وخت آ تالان دا سوج و ورندی نا سیشن اٹ میر سرفراز بگٹی بلوچستان نا تاریخی حقائق، صوبہ نا ساڑی آ حالیت، حکومتی گام گیج، گورننس تون اوار جتا جتا سرحال آتیا سرجمی اٹ گپ و تران کرے۔