کاروباری شخصیت و پروفیشنل آک پاکستان نا سفیر ءُ ،وزیراعظم محمد شہباز شریف

نیویارک، وزیراعظم محمد شہباز شریف پارینے کہ حکومت ملک اٹی زرکاری و کاروباری سرجزآتے ٹی ودکی کن سازگار چاگڑد فراوان کننگ ءِ، کاروباری شخصیت و پروفیشنل آک پاکستان نا سفیر ءُ ہرامچ آ دنیا ٹی تینا مثبت کڑد اٹ ملک انا پن ءِ روشنا کیرہ، اوفتے پاکستان اٹی زرکاری کن سلہ خلینہ۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم تون امریکہ ٹی رہینگوک انفارمیشن ٹیکنالوجی، مصنوعی ذہانت، آٹو موبائل، توانائی، تعمیرات و چندی بشخ آتیان تعلق تخوک آ کاروباری شخصیت و پروفیشنل آتا ڈل آک اوڑدہی کریر۔ وزیراعظم ڈل آتے بخیراٹ پارے و و پاکستان اٹی زرکاری کن سلہ خلک۔ وزیراعظم دا وخت آ ہیت کرسا پارے کہ کاروباری شخصیت و پروفیشنل آک پاکستان نا سفیر ءُ ہرامچ آ دنیا ٹی تینا مثبت کڑد اٹ ملک انا پن ءِ روشناکیرہ۔ حکومت ملک اٹی زرکاری و کاروباری سرجزآتے ٹی ودکی کن سازگار چاگڑد فراوان کننگ ءِ، ایف بی آر اٹی اصلاحات اٹ کاروباری برادری نا ویل آتے ایسر کننگا۔ او پارے کہ حکومت ملکی کشاری بشخ انا شونداری کن بشخ اٹی جدت نا بابت اولیتی بنداو تیاگام گیج کننگ ءِ۔ کاروباری شخصیت آتا ڈل آک وزیراعظم نا کماشی ٹی کشت وکشار، صنعت، برآمدات خاص کر ایف بی آر اٹی اصلاحات نا ستاءِ کریر۔ اوڑدہی تیٹی رانا مشہود احمد خان چیئرمین وزیراعظم یوتھ پروگرام، خصوصی کمکار بلال بن ثاقب، اقوام متحدہ ٹی پاکستان نا آخبتی مندوب عاصم افتخار، امریکہ ٹی پاکستان نا سفیر رضوان احمد شیخ، وزیراعظم نا ترجمان درملکی میڈیا مشرف زیدی، سید قمر رضا چیئرمین اوورسیز فاؤنڈیشن، منیجنگ ڈائریکٹر اوورسیز فاؤنڈیشن افضال بھٹی و تعلقدار بڑزکو کمامدارآک بشخ ہلکر۔