اوغان ڈغار آن ڈرون تا بننگ پاکستان نا وتواجہی نا خلاف ورزی ءِ،عطاء اللہ تارڑ

اسلام آباد، بنجائی وزیر حوالکاری و شینکاری عطاء اللہ تارڑ پارینے کہ پاکستان 23 ستمبر 2026ء آ اوغان ڈغار آن پاکستان نا کنڈ آ چلیفنگوک آ ڈرون تا دروشم اٹ غیر کانودی و رزاک اٹ کروک آ مداخلت نا سخت انگا لوز آتیٹی مذمت ءِ کیک۔ دا گام پاکستان نا وتواجہی و علاقائی سالمیت نا پاش آن پاش خلاف ورزی ءِ و جارحیت نا اسہ سنگین و ناقابلِ قبول عمل اسے۔ پنچ شنبے نادے آ راجی رابطہ نا پلیٹ فارم ”ایکس” آ تینا بیان اٹ بنجائی وزیر حوالکاری پارے کہ پاکستان سال آتیان اوغان طالبان حکومت و اونا رابطہ کار آتا مون آ اوغان ڈغار آ دہشت گرد پناہ گاہ و اونا کمک کروک آ نیٹ ورک آتا پدریسہ ساڑی گری آ گڑتی تا درشانی ءِ کرسا کرینے۔ دا نیٹ ورک آتا چٹفنگ و پاکستان نا برخلاف دہشت گردی کن اوغان ڈغار ءِ کاریم اٹ اتوک آتا برخلاف پت انا قابل و قابل تصدیق کارروائی کننگ نا جاگہ غا، اوغان طالبان حکومت پاکستان نا برخلاف ڈرون کارروائی تا کمک اٹ حالیت آتے پین خراب کننگ نا کسر ءِ اختیار کرے۔ او پارے کہ پاکستان نا فضائی دفاعی نظام غٹ ڈرون آتے اوفتا درکار ہدف ہدف اسکان سر مننگ آن مست ہی شناخت، ٹریک و غیر موثر کرے۔ ہراڑآن سلاہ ئی جلہو ءِ پورو وڑاٹ بے سہب کننگا۔ تینا وتواجہی نا دفاع نا حق ءِ کاریم اٹ اتسا، پاکستان اوغانستان اٹ دا ڈرون آتے لانچ و کوڑی کننگ کن کاریم اٹ اتوک آ 10 ہند آتا پورو پیدواری آن پد فضائی و ڈرون جلہو کرے۔ دا جلہو آک سوچ و سمجھ، سہی، متوازن و مناسب ئسر و بیرہ ہموعسکری ہدف اسکان محدود ئسر ہرا پاکستان نا برخلاف جلہو آتیان براہِ راست گنڈوک ئسر۔ بنجائی وزیر حوالکاری پارے کہ پاکستان اوغان ڈغار آن کروک آ جلہو آتے ہچ وڑاٹ قبول یا سگپک، چائے دا دہشت گرد ٹولی تا کنڈ آن مرے یا تینٹ اوغان طالبان حکومت نا کنڈ آن۔ پاکستان نا وتواجہی نا ہرخلاف ورزی نا ترند و فیصلہ ئی ورندی تننگک۔ اوغان طالبان نا کنڈ آن دھڑکو، تردید یا زمواری آن نرنگ نا کوشست آک نئے تو حقیقت آتے بدل کننگ کیرہ و نئے پاکستان نا تینا ڈغار، الس و قومی سلامتی نا دفاع نا بنداوی حق ءِ محدود کننگ کیرہ۔ او پارے کہ پاکستان اوغان طالبان حکومت آن خواست کیک کہ او پاکستان نا برخلاف غٹ مکرہ سرجزآتے دمدستی بند کے و اوغان ڈغار آن کارروائی کروک آ دہشت گرد زموارآتابرخلاف گچین، پبی، قابل تصدیق و پدریسہ کارروائی کرسا تینا جہانی زمواری تے پورو کے۔ اوغان ڈغار ءِ پاکستان نا برخلاف جلہو آتا بناءِ کننگ یا داوڑنا دشمنی آ تالان کارروائی تے کن کاریم اٹ اتنگپ۔ عطاء اللہ تارڑ پارے کہ پاکستان بے چیٹی ٹی ودکی خواپک و علاقائی امن، مذاکرات و تعمیری رابطہ غاتا کن سنبرینگوک ءِ۔ دا عزم ءِ نزوری یا دا مطلب ہلنگپ کہ نن جارحانہ کارروائی تے سگسا کینہ۔ پاکستان تینا وتواجہی، علاقائی سالمیت و تینا شاری تا زند انا دفاع ءِ پورو عزم اٹ کیک و اوفتے رکھ تننگ کن غٹ المی گام گیج کیک۔ اوغان طالبان نا کنڈ آن پین اشتعال انگیز گام اسے نا ورندی ءِ سوگو و فیصلہ ئی وڑاٹ تننگک۔