او آئی سی رابطہ گروپ دیوان، اسحاق ڈار نا کشمیری الس نا حق خودارادیت نا مخ تفی آ زور

نیویارک، نائب وزیراعظم و وزیر خارجہ سینیٹر محمد اسحاق ڈار کشمیری الس نا حقِ خودارادیت کن پاکستان نا مخ تفی نا دوارگی ءِ کرے و او آئی سی سیکرٹری جنرل، رابطہ گروپ نا باسک، خصوصی نمائندہ جموں و کشمیر و او آئی سی آجو آخبتی انسانی حق کمیشن نا مخ تفی آ منتواری ءِ ہرفے۔ پاکستان نا وزارت خارجہ 81 می جنرل اسمبلی دیوان نا وخت آ اسحاق ڈار نا او آئی سی رابطہ گروپ نا دیوان اٹی بشخ ہلنگ ءِ مہالو آن تینا پروگرام نا بشخ گونداسس۔ نیویارک اٹی او آئی سی رابطہ گروپ جموں و کشمیر نا وزارتی دیوان آن تران کرسا اسحاق ڈار پارے کہ بھارت نا کوزہ کروک جموں و کشمیر اٹی سیاسی و شاری آجوئی تیا پدریسہ رکھ آک گڑتی نا سوب ءُ۔ او پارے کہ علاقہ نا آبادیاتی، سیاسی و ربیدگی پجار ءِ بدل کننگ نا کوشست آک کننگ انگ ءُ۔ وزیر خارجہ پارے کہ جموں و کشمیر نا جھیڑہ جہانی کہول آ امنا کروک باندات اسے و اقوام متحدہ نا سیکورٹی کونسل نا ایجنڈا غا ساڑی ءِ۔ او موقف تینائی کرے کہ ہچ ءُ ملکی کانود سازی، عدالتی فیصلہ، گچین کاری نا عمل یا آبادیاتی بدلی کشمیری الس نا حقِ خودارادیت نا بدل مننگ کپک‘ اسحاق ڈار او آئی سی باسک ملک آتیا زور شاغا کہ اقوام متحدہ و ایلو جہانی فورم آتیا جموں و کشمیر نا باندات آ اسیجائی موقف ءِ برجا تخنگے۔ او آئی سی رابطہ گروپ اٹی پاکستان آن بیدس سعودی عرب، ترکیہ، آذربائیجان و نائیجر اوار ءُ، وخت اس کہ گروپ گوست اٹی ہم اقوام متحدہ نا جنرل اسمبلی نا دیوان تا وخت آ کشمیر تون تعلقدار اسیجائی موقف ءِ مون آ اتسا بسنے۔ وزیر خارجہ پارے کہ پاکستان جموں و کشمیر نا جھیڑہ نا انصاف اٹ و پرامن ایسری کن سنبرینگوک ءِ او پارے کہ جھیڑہ نا ایسری ءِ تعلقدار اقوام متحدہ سلامتی کونسل نا قرارداد و کشمیری الس نا استخواہی تا رِد اٹ کننگے۔ یات سلے کہ او آئی سی رابطہ گروپ نا 2025 نا اسیجائی اعلامیہ ٹی ہم کشمیری الس نا حقِ خودارادیت نا مخ تفی و تعلقدار اقوام متحدہ سلامتی کونسل نا قرارداد آتا اہمیت نا دوارگی کننگاسس۔