پاکستانی زرگزران اٹی گچینی نا ریسہ برجاءِ،ایشیائی شونداری بینک

اسلام آباد، ایشیائی شونداری بینک پارینے کہ پاکستان نا زرگزران مالی سال 2026 اٹی گچینی نا ریسہ ءِ برجا تخا و اقتصادی ردوم کچ مالی سال 2025 نا 3.2 درسد نا مون اٹ ودسا 3.7 درسد مس، وخت اس کہ مالی سال 2027 اٹی ہم ردوم کچ 3.7 درسد مننگ نا اومیت ءِ۔ دا ہیت ءِ ایشیائی شونداری بینک انا کنڈآن جاری ایشین ڈویلپمنٹ آؤٹ لک رپورٹ اٹی پاننگانے۔ رپورٹ اٹی پاننگانے کہ مالی سال 2026 اٹی اقتصادی سرجزآتیٹی گچین بنداو ئس، ہراٹی خذمت نا بشخ انا سوگوکارکڑد، صنعتی پیداوار اٹی بحالی، کشت وکشارنا بشخ اٹی گچینی و پرائیویٹ زرکاری ٹی ودکی اہم کڑد ادا کرے، ولے نیامی دے ٹک اٹی جھیڑہ نا سوب آن مالی سال انا گڈیکو سہ ماہی ٹی اقتصادی سرجزآک زہمی مسر۔ رپورٹ اٹی پاننگانے کہ اقتصادی اصلاحات نا ریسہ‘ پیشن نا مالیاتی بفرز اٹی گچینی، جہانی کیپٹل مارکیٹ اسکان دُوارہ رسینگ و ساڑی وتواجہ کریڈٹ ریٹنگ اٹی گچینی آن زرکار آتا پت و پرائیویٹ زرکاری ٹی سوگوی رسینگ نا اومیت ءِ۔ ولے توانائی نا بڑز کونہاد و نیامی دے ٹک نا جھیڑہ نا زہم تتون اوار پیشن نا گمان آن چَپ حالیت اقتصادی ردوم اٹ پین ترندی نا کسر اٹ اڑاند جوڑ مننگ کیک۔پاکستان اٹی ایشیائی شونداری بینک انا کنٹری ڈائریکٹر ایما فن پارے کہ تدوک آ اِراسال اٹی پاکستان آجوزرگزران نا سوگوی نا دوئی کننگ اٹ بھلو پیشرفت اس کرینے، ہرانا درشانی گچین مروک اقتصادی ردوم‘ سوگو پیشن نا مالیاتی بفرز، بحال مروک مارکیٹ نا پت و وتواجہ کریڈٹ ریٹنگ اٹی گچینی آن مریک۔ او پارے کہ پرائیویٹ زرکاری ٹی ودکی، پیشن نا لوڈوتا مون اٹ زرگزران نا لچک ءِ سوگور جوڑ کننگ و زیات سوگو و جامع اقتصادی ردوم نا دوئی کننگ کن اصلاحات نا عمل ءِ برجا تخنگ بھاز اہم ءِ۔ رپورٹ نا رداٹ مالی سال 2026 اٹی مینوفیکچرنگ و خذمت نا بشخ آتے ٹی ودکی اقتصادی نمو ءِ کمک تس۔ نوکاپ آن بھلافصل آتے مروک آ نسخان آتیان پد ہم کشاری بشخ انا ردوم کچ 2.9 درسد ئس، وخت اس کہ کم سود کچ و کاروباری پت اٹی گچینی نا سوب آن پرائیویٹ زرکاری ٹی 8.6 درسد ودکی مس۔ رپورٹ نا رداٹ مالی سال 2026 اٹی مالیاتی سوگوی نا عمل اٹی ہم پیشرفت مس وخت اس کہ جم زرکوڑی تیٹی ودکی مس، ہراڑان پیشن نا بشخ اٹی زرگزران نا لچک گچین مس۔