وزیر داخلہ نقوی نا ایرانی سرکڑدہ غاتتون اوڑدہی، مکہ معاہدہ غا گپ و تران

اسلام آباد، وزیر داخلہ محسن نقوی ایران نا دورہ غا ایرانی سرکڑدہ غاتتون اہم اوڑدہی کرے، ہرافتے ٹی ڈیہہ انا ساڑی حالیت، امن و سلامتی و پاکستان، سعودی عرب و ترکیہ نا نیام اٹی پک مروک مکہ دفاعی معاہدہ غا گپ وتران کننگا۔ وزیر داخلہ وزیراعظم شہباز شریف و فیلڈ مارشل نا کنڈ آن ایرانی سرکڑدہ غاتے ڈیہہ انا حالیت نا بابت خصوصی و اہم کلہو ہم سرکرے۔ حوالی نا رداٹ محسن نقوی ایرانی سرکڑدہ غاتے ءِ مکہ معاہدہ نا بابت معلومدار کرے و اوفتے سلاہ اٹ ہلک۔ اوڑدہی ٹی ڈیہہ اٹی امن نا برجائی‘ چک وتاڑ اٹ کمتی وتین پہ تینی کمکاری نا وارخواہی تیا ہم گپ و تران مس۔ وزیر داخلہ ایرانی سرکڑدہ غاتے پاکستان نا کنڈ آن ڈیہہ اٹی امن و سوگوی کن برجا سفارتی کوشست آتیان معلومدار کرے۔ دا وخت آ علاقائی سلامتی وبدل مروک حالیت آتا رد اٹ تین پہ تینی حوال آتے پین گچین کننگ نا گرج آہم زور شاغنگا۔ بیان نا رداٹ محسن نقوی فیلڈ مارشل نا کمک ءِ کننگ اٹی ءِ ہرا ڈیہہ اٹی امن نا مذاکرات نا اہم سفارتی رابطہ غاتا کماشی ءِ کننگ اٹی ءِ۔ فیلڈ مارشل خلیجی ملک، ایران و امریکہ نا بڑزکو کمامدار آتتون پدریسہ حوال کننگ اٹی ءِ‘ پاکستان نا کنڈ آن ایران تون اوار ڈیہہ انا کل اہم انگا ملک آتتون حال کننگ نا مسخت علاقائی چک وتاڑ اٹ کمتی‘ امن نا شون تننگ و تین پہ تینی پت ءِ سوگو کننگ گوندنگانے۔