غزہ امن ڈٹ آن نمنی آن پد ہم نیتن یاہو تون تعلقداریک جوان ءُ،ڈونلڈ ٹرمپ
اسرائیل ءِ حماس نا کنڈ آن بے سلہہ مننگ نا عمل تون اوار اوار تینا فوج ءِ غزہ غان پدی خواہفوئی ئس،حوال
Get real time updates directly on you device, subscribe now.
واشنگٹن، اسرائیلی وزیراعظم نیتن یاہو غزہ نا بابت ٹرمپ نا مخ تفی اٹ مروک ڈٹ ءِ مسترد کرینے۔ اوکان پد ہم امریکی صدر ڈونلڈ ٹرمپ پارینے کہ ہڑتوم آ تا نیام اٹی تعلقداریک بھاز جوان ءُ۔ درملکی میڈیا حوالی نا رِد اٹ اوول آفس اٹی اسہ دود اسے نا اخیر اٹ صحافی نا کنڈ آن سوجی ٹِک نا ورندی ٹی ٹرمپ پارے کہ نیتن یاہو تون بھاز جوان تعلقداریک ءُ۔ یات سلے کہ اسہ ہفتہ غان زیات مُدی اسکان پدریسہ مروک آ تنقید آن پد نیتن یاہو یک شنبے نا دے پیدوار وڑاٹ پارے کہ غزہ ڈٹ انا مخالفت ءِ کیوہ۔ امن ڈٹ انا رد اٹ اسرائیل ءِ حماس نا کنڈ آن بے سلہہ مننگ نا عمل تون اوار اوار تینا فوج ءِ غزہ غان پدی خواہفوئی ئس۔ میڈیا حوالی نا رِد اٹ اسرائیل نا کل آن زیات وخت اسکان وزیراعظم مروک آ نیتن یاہو 27 اکتوبر آ مروک آ گچین کاری تیان مست منہ السی سلاہ نا جاچ آتیٹی تینا حریف آتیان بریبر یا اوفتیان پدی ءِ۔ دا گچین کاریک 2023 اٹی بنا مروک غزہ جنگ آن پد اولیکو گچین کاریک ءُ۔ میڈیا حوالی نا رِد اٹ الس نا سلاہ نا جاچ آتیان پیدوار مریک کہ غزہ ڈٹ نیتن یاہو نا ’دائیں بازو‘ نا مخ تفی کروک آتیٹی داخس پنی اف، وخت اس کہ اونا کابینہ ٹی اوار انتہاء پسند دائیں بازو نا باسک آک ہم اودے ڈٹ ءِ مسترد کننگ آ زور شاغار۔ میڈیا حوالی نا رِد اٹ زوت آتیٹ نیتن یاہو ٹرمپ تون تینا تعلقداری تے تینا سیاسی مہم نا اہم ءُ واک اس گونداسس۔ ٹرمپ اسرائیل نا مخ تفی ٹی دروری گام گیج کرینے، ہرافتے ٹی امریکی سفارت خانہ ءِ یروشلم آ گدریفنگ ہم اوار ءِ۔