پاکستان و امریکہ نا تین پہ تینی واپاری فریم ورک ءِ ودفنگ آ امنا ،بنجائی وزیرِ خزانہ

اسلام آباد، بنجائی وزیرِ خزانہ سینیٹر محمد اورنگزیب پاکستان اٹی امریکی ناظم الامور نٹالی بیکر تون اوڑدہی کرے ہراٹی ہڑتوم آ کنڈآن زرگزرانی کمکاری آ گپ وتران کننگا۔ اوڑدہی ٹی پاکستان و امریکہ نا نیام اٹی تین پہ تینی واپاری فریم ورک، گچین مارکیٹ اسکان رسینگ و تین پہ تینی واپاری ءِ ودفنگ آ امنا کننگا۔ وزیرِ خزانہ واشنگٹن نا دورہ، امریکی وزیرِ خزانہ، آئی ایم ایف کمامدار ڈی ایف سی و ایکسیم بینک اتون اوڑدہی تا بابت معلومدار کرے و پارے کہ دا دورہ ٹی جہانی زر انا منڈی اسکان رسینگ، زرکوڑی تے ٹی جوانی و مریس مُدی مالیاتی وڑ آ حکومتی چکار کننگا۔ پاکستان نا زرکاری نا بشخ اٹی امریکی مالیاتی ادارہ خاص وڑ اٹ ڈی ایف سی نا اواری ءِ پین ودفنگ آ زور شاغنگا۔ اوڑدہی ٹی بندرگاہ، توانائی، ٹیلی کمیونیکیشن، ڈیجیٹل ٹیکنالوجی و اے آئی نا بشخ آتیٹی زرکاری نا وارخواہی تیا گپ و تران مس۔ امریکی ناظم الامور ڈیہہ انا خراب حالیت آتیان پد ہم پاکستان نا زرگزرانی سوگوی و اصلاحاتی کوشست آتاستا ءِکرے۔ پیٹرولیم نا نہاد آتے ہڑدے نا بنداو آ پک کننگ نا وڑ و ڈول و مالیاتی نظم و ضبط نا کمک اٹ زرگزران ءِ سوگو کننگ نا گام گیج آتا بابت ہم معلومدار کننگا۔ اوڑدہی ٹی امریکی کمپنی تے جوان کاروباری چاگڑد فراوان کننگ و ساختیاتی اصلاحات نا کمک اٹ برآمد آ تالان شون نا عزم انا درشانی کننگا۔ داکان بیدس بنجائی وزیرِ خزانہ سینیٹر محمد اورنگزیب نا کماشی ٹی ‘ایکسیس ٹو فنانس اسٹیئرنگ کمیٹی’ نا ارٹمیکو دیوان اڈ ہلک۔ دیوان اٹی وزیراعظم نا ‘ایکسیس ٹو فنانس پلان 2026-2028’ آ عملدرآمد و پیش رفت نا جم جاچ ءِ ہلنگا۔ ایس ایم ای، کشت وکشار و ہاؤسنگ فنانس نا بابت ذیلی کمیٹی تا داسکان نا کارکڑد آ بریفنگ تننگا۔ ہول سیل فنانسنگ نا سلاہ ئی فریم ورک ءِ بینک آتا سلابت اٹ گڈیکو دروشم تننگ آ امنا کننگا۔ دیوان اٹی بریفنگ اٹی پاننگا کہ وزیراعظم نا ‘تینا اُرا پروگرام’ نا رِد اٹ داسکان 34 ارب 27 کروڑ روپئی آن زیات نا وام تننگانے۔ دیوان اٹی اہم آ بشخ آتیٹی فنانسنگ نا پیشرفت نا مانیٹرنگ کن ہفتہ وار بنداو آ ڈیش بورڈ انا کاریم اٹ اتنگ آ زور شاغنگا۔ کشارگر آتے بیمہ کلیم نا فراوانی ءِ جوانی نا کنڈ آ دننگ کن ‘کراپ لون انشورنس اسکیم’ ءِ جوانی نا کنڈ آ دننگ آ سجفنگا۔ بینک آتا کنڈ آن ہاؤسنگ فنانس کن 220 ارب روپئی آن زیات انا وام منظور کننگانو۔ ڈغار ومیرات آتا ریکارڈ نا ڈیجیٹلائزیشن و ٹائٹل دستاویزات نا پک کننگ نا عمل ءِ ترند کننگ آ زور شاغنگا۔ ‘پیو’ (PAVE) پروگرام نا رِد اٹ داسکان 1200 آن زیات الیکٹرک بائیک صارف آتے تننگانے۔ ای وی موبیلٹی فنانسنگ نا شون آن درآمدی بل اٹی کمتی و چاگڑد دوست ٹرانسپورٹ نا است بڈی مریک۔ وزارتِ خزانہ، اسٹیٹ بینک و ایس ای سی پی تون اوار کل تعلقدار ادارہ غاتا نیام اٹی خڑک حالی حوالی مننگ نا گرج آ زور شاغنگا۔