الیکشن کمیشن نا اہم آئینی عہدہ غاتے زُو پر کننگے، اپوزیشن لیڈر
Get real time updates directly on you device, subscribe now.
اسلام آباد، الیکشن کمیشن اٹی تعیناتی تا بابت اہم پیش رفت مونی بسنے و قائد حزبِ اختلاف محمود خان اچکزئی وزیراعظم شہباز شریف ءِ اسہ چٹھی اس نوشتہ کرینے ہراٹی پاننگانے کہ چیف الیکشن کمشنر و سندھ، بلوچستان آن الیکشن کمیشن نا باسک آتا آئینی وخت پورو مسنے‘ محمود خان اچکزئی پارے کہ چیف الیکشن کمشنر و سندھ، بلوچستان نا باسک آتا وخت 26 جنوری 2026ء آ پورو مس، الیکشن کمیشن نا اہم آئینی عہدہ غاتے دمدستی وڑاٹ پُر کننگے۔ محمود خان اچکزئی چٹھی ٹی پارے کہ آئین نا آرٹیکل 213(2A) نا رِد اٹ چیف الیکشن کمشنر نا تقرری کن وزیراعظم و اپوزیشن لیڈر نا نیام اٹی سلابت المی ءِ۔ آئین نا آرٹیکل 218(2B) نا رِد اٹ الیکشن کمیشن نا باسک آتا تقرری کن ہم وزیراعظم و اپوزیشن لیڈر نا نیام اٹی سلابت المی ءِ۔ الیکشن کمیشن اٹی خورک ہند آتیا پنداری تے گڈیکو دروشم تننگ کن دمدستی اوڑدہی کننگے۔ الیکشن کمیشن نا آجوئی، شرف و آئینی ریسہ ءِ برجا تخنگ کن دمدستی تقرریک المی ءُ۔