مکہ دفاعی معاہدہ ڈیہہ اٹی امن نا ضمانت نا کسر ءِ ملک،بنجائی وزیر و پارلیمنٹرین آتا گپ و تران

اسلام آباد، بنجائی وزیر و پارلیمنٹرین آک مکہ معاہدہ ءِ امتِ مسلمہ نا سیوت نا بنداو گوندسا دانا ستاءِ کرینو۔ بنجائی وزیر ڈٹ بندی و شونداری احسن اقبال پارے کہ دا دفاعی معاہدہ ڈیہہ اٹی امن نا ضمانت مریک۔ بنجائی وزیر حوالکاری عطاء اللہ تارڑ پارے کہ پاکستان، ترکیہ و سعودی عرب نا دفاعی معاہدہ ہر مسٹ آ ملک آتا فائدہ اٹی ءِ۔ وزیر توانائی اویس لغاری پارے کہ معاہدہ ہر مسٹ آ ملک آتا الس نا رکھ انا ضمانت ءِ‘۔ بنجائی وزیر آئی ٹی شزا فاطمہ پارے کہ تاریخی معاہدہ غان امن نا کسرک آوار مسنو۔ بنجائی وزیر طارق فضل چوہدری پارے کہ معاہدہ غان ڈیہہ اٹی مدامگی امن نا بنداو تخنگانے۔ کشمیر باندات نا وزیر امیر مقام پارے کہ وزیراعظم شہباز شریف و فیلڈ مارشل سید عاصم منیر نا کوشست آتیان دا معاہدہ پک مس۔ مکہ معاہدہ نا بابت ہیت وگپ کرسا احسن اقبال پارے کہ پاکستان، ترکیہ و سعودی عرب نا نیام اٹی دفاعی معاہدہ غا مچ آ پاکستانی قوم ءِ مبارکبادی ایتوہ، دا دفاعی معاہدہ ڈیہہ اٹی امن نا ضمانت مریک‘ ڈیہہ نا امن و سلامتی کن ملک آتے اسیجا مرسا اسہ ایلو تون کمکاری المی ءِ‘ وزیر حوالکاری عطاء اللہ تارڑ پارے کہ اینو مچ آ پاکستان اسیجائی دفاعی معاہدہ نا جشن اڈ تننگ اٹی ءِ‘ مکہ دفاعی معاہدہ امن، سلامتی و سوگوی نا کنڈ آ اسہ تاریخی ءُ مزل نا نشان اسے، پاکستان، ترکیہ و سعودی عرب تینا دفاع نا بابت اسہ معاہدہ اسے نا رِد اٹی مستی کارہ، پاکستان ءِ محافظ حرمین شریفین نا شرف ہم دوئی ءِ‘ مکہ دفاعی معاہدہ امن و سلامتی کن ءِ‘ وزیراعظم و فیلڈ مارشل نا کماشی ٹی اسیجائی وژن راستکی نا دروشم تینائی کرینے‘ ہرمسٹ آ ملک آتا نیام اٹی معاہدہ غا وزیراعظم نا دستخط کننگ شرف انا سوب ءِ‘ بنجائی وزیر توانائی اویس لغاری پارے کہ پاکستان، سعودی عرب و ترکیہ نا نیام اٹی اسیجائی دفاعی معاہدہ ستاکڑزک‘ معاہدہ ہر مسٹ آ ملک آتا فائدہ اٹی ءِ و الس نا رکھ انا ضمانت ءِ‘ اسہ ملک اسے آ جلہو ہر مسٹ آ ملک آتیا جلہو تکنگک۔ بنجائی وزیر آئی ٹی شزا فاطمہ خواجہ پارے کہ تاریخی معاہدہ غان امن نا کسرک آوار مسنو، نن تینا سیاسی و عسکری سرکڑدہ غاتا منتواری ءِ ہرفنہ، اوفتا کوشست آتیان دا معاہدہ مننگ کرے، دفاعی معاہدہ غان پاکستان نا شرف دنیا ٹی بڑزا مس۔ ڈاکٹر طارق فضل چوہدری پارے کہ دا معاہدہ غان ڈیہہ اٹی مدامگی امن نا بنداو تخنگانے، معاہدہ غان ہر مسٹ آ ملک آتا تین پہ تینی تعلقداری پین سوگو مریک‘ دا معاہدہ مسلم امہ کن تاریخی ءُ ساہت اسے، تاریخی معاہدہ ننا سرکڑدہی نا وژن نا ڈیک ءِ۔ انجینئر امیر مقام پارے کہ ترکیہ، سعودی عرب و پاکستان نا نیام اٹی دفاعی معاہدہ مسلم امہ نا فائدہ اٹی ءِ‘ وزیراعظم شہباز شریف و فیلڈ مارشل سید عاصم منیر نا کوشست آتیان دا معاہدہ پک مس۔ وزیر پٹرولیم علی پرویز ملک پارے کہ نواز شریف ملک ءِ ایٹمی واک جوڑ کرے، وزیراعظم شہباز شریف و فیلڈ مارشل ملک نا دفاع ءِ سوگو کریر، پاکستان، سعودی عرب و ترکیہ نا دفاعی معاہدہ امتِ مسلمہ نا سیوت نا کنڈ آ اہم ءُ گام اسے۔ وزیر مملکت طلال چوہدری پارے کہ مکہ باہمی دفاعی معاہدہ امن، سلامتی و سوگوی نا کنڈ آ اہم ءُ گام اسے، معاہدہ غان امتِ مسلمہ ءِ پوسکن ءُ اومیت اس ملانے، تاریخی معاہدہ غان پد پاکستان نا اہمیت دنیا ٹی پین ودانے۔ وزیراعظم نا سلاہکار رانا ثناء اللہ پارے کہ مکہ نا متبر آ ڈغار آ تاریخی معاہدہ مننگ پاکستان کن شرف اسے۔ ایلم اسلامی ملک آتا نیام اٹی معاہدہ غان امن نا پوسکن آ کسرک ملنگرہ‘ دا معاہدہ مسلم امہ نا سیوت نا بنداو ءِ مکہ دفاعی معاہدہ کن وزیراعظم و فیلڈ مارشل نا کوشست آک ستا کڑزرہ، معاہدہ غان اسلامی ملک آتا شون و آسودہی نا پوسکن ءُ دور اسے نا بنا مریک۔