بلوچستان، دہشت گرد آتا برخلاف کارروائی، 15خوارج خلنگار،آئی ایس پی آر

کوئٹہ/ اسلام آباد، بلوچستان اٹی سیکورٹی فورس آک انٹیلی جنس بیسڈ کارروائی کرسا 15 دہشت گرد خلسا کرسا اوفتیان بھلو کچ اسے ٹی سلہہ، ایمونیشن منچر دوئی کریر۔ سیکورٹی حوالی آتا رِد اٹی سیکورٹی فورس آتا کارندہ غاک بلوچستان نا علاقہ مستونگ، بولان، واشک، آواران، سبی، خضدار، ہرنائی و نوشکے ٹی فتنۃ الہندوستان و فتنۃ الخوارج نا دہشت گرد آتا برخلاف کارروائی کرسا 15 خوارج ءِ خلکر‘ اوفتیان بھلو کچ اسے ٹی سلہہ و منچر دوئی کننگا۔ حوالی تا رِد اٹا سیکورٹی فورس آتا کارروائی تا سوب آن دہشت گرد آتا نیٹ ورک ءِ نسخان رسینگا۔ بنجائی وزیر داخلہ محسن نقوی آپریشن ردالفتنہ 3 نا رِد اٹ بلوچستان اٹی سرسہب انٹیلی جنس بیسڈ آپریشن تیا سیکورٹی فورس آتاستاءِ کرینے۔ اسہ بیان اسے ٹی وزیر داخلہ محسن نقوی 15 خارجی تے خلنگ آ سیکورٹی فورس آتا کسبی لائخی تا ستاءِ کرے و پارے کہ سیکورٹی فورس آک سرسہب کارروائی کرسا فتنۃ الہندوستان و فتنۃ الخوارج نا لغور آ ارادہ غاتے بے سہب کریر۔ محسن نقوی پارے کہ دہشت گردی نا برخلاف پڑ آ سلوک سیکورٹی فورس آتابہادر انگا ورناک قوم انا گمر ءُ۔ محسن نقوی پارے کہ انشا اللہ قوم انا مخ تفی اٹ بلوچستان آن فتنۃ الہندوستان و فتنۃ الخوارج نا دہشت گرد آتے پورو وڑ اٹ چٹفنگک۔