پاکستان و پاکستانی ایجنسی تا بابت ورگڑیفوک پروپیگنڈہ کروک آ دزگیر،بنجائی حوالکاری و شینکاری وزیر

بنجائی وزیر حوالکاری و شینکاری عطاء اللہ تارڑ پارینے کہ جوائنٹ ایکشن کمیٹی نا کشمیر کاز و کشمیر نا الس نا فائدہ تون ہچ ءُ تعلقداری اس اف، اگہ او کشمیر کاز تون داخس مخلص ءُ تو او گچین کاری تے ٹی انتئے بشخ ہلپسہ۔ دافتا رند انڈیا اسکان کاہک۔ کالعدم جوائنٹ ایکشن کمیٹی نا بھارت تون اواری پک مسنے، نن تون دانا تردید مفروک شاہدیک اریر۔ کشمیر نا الس دا شاہدی ءِ تسنے کہ پاکستان و کشمیر نا رشتہ نئے پننگ کیک و نئے نزور مننگ کیک۔ خصوصی گپ و تران کرسا وزیر حوالکاری عطاء اللہ تارڑ پارے کہ منہ اہم انگا راستکی تیان قوم ءِ معلومدار کننگ المی ءِ‘ ڈیجیٹل مارکیٹنگ سروس کننگ والا اسہ بندغ اسے منہ وخت مست ننا سیکورٹی ادارہ غاک دزگیر کریر، دا بندغ نا کنڈ آن فراوان کننگوک ڈیجیٹل سروسز نا تعلقداری انڈیا تون ارے۔ پاکستان مخالف مواد ءِ وائرل کننگ کن زر انڈیا غان تننگاکہ۔ وزیر حوالکاری پارے کہ دزگیر مروک بندغ آن ہراتم جاست پاست کننگا تو مچ آ معلومداری اسکان رسینگ دوئی کننگا، بوٹ فارمز نا کمک اٹ مس انفارمیشن نا مچ آ نیٹ ورک اس چلیفنگ انگ ئس ہرانا تعلقداری بھارت تون ءِ‘ پاکستان نا سالمیت، حکومت، فوج، آرمی چیف و ادارہ غاتا برخلاف مواد ءِ وائرل کننگ انگ ئس۔ وزیر حوالکاری پارے کہ جاست پاست نا وخت آ دا بندغ امنا کرے کہ گیشتری اودے رسینگوک مواد آزاد کشمیر اٹی جوائنٹ ایکشن کمیٹی نا بابت ئس۔ نن اولیکو دے آن پارینہ کہ جوائنٹ ایکشن کمیٹی کشمیر کاز ءِ نسخان رسیفنگ و کشمیر نا پاکستان تون رشتہ ءِ نزور کننگ خواہک، جوائنٹ ایکشن کمیٹی نا کشمیر کاز و کشمیر نا الس نا فائدہ تون ہچ ءُ تعلقداری اس اف، اگہ او کشمیر کاز تون داخس مخلص ءُ تو او گچین کاری تے ٹی بشخ ہلیر۔ او سم کاری و برانز آن کشمیری پولیس نا ورناتے شہید کریر، او کشمیر اٹ ہم سم کاری نا سیاست کریر، امن ایمنی نا حالیت ودی کریر، دانا رند بھارت اسکان کاہک۔ نن تون دا بابت تردید مفروک شاہدیک اریر۔ دا بندغ آک سلہ و لٹ انا زور آ اسہ تحریک اسے نا بناءِ کننگ نا کوشست کریر ہرانا کشمیر نا الس نا فائدہ یا کشمیر کاز تون ہچ ءُ تعلقداری اس الو۔ او پارے کہ دا سازش کروک آک کشمیر اٹ ہندن ءُ حالیت ودی کننگ خوارہ ہراڑان نئے بیرہ کشمیری تے نسخان رسینگے بلکن اوفتا پاکستان تون رشتہ ہم نزور مرے، کشمیر نا الس سازش کروک آتا بیدادی نا سیاست ءِ مسترد کرینے، کشمیر نا الس دا شاہدی ءِ تسنے کہ پاکستان و کشمیر نا رشتہ نئے پرغنگ کیک و نئے نزور مننگ کیک۔ وزیر حوالکاری پارے کہ سوشل میڈیا غا ڈیجیٹل مارکیٹنگ نا کمک اٹ ملک مخالف مہم چلیفنگا، بھارت خواہک کہ کشمیر اٹ امن اویمنی نا حالیت ودی مرے، سوشل میڈیا غا اخس کہ مواد ئسر اوفتیکن پیسہ بھارت آن تننگاکہ۔ دشمن آن فنڈ ہلسا پاکستان، پاکستان نا فوج و پاکستان نا سرکڑدہ غاتا برخلاف بدبیسئی آتالان ڈس انفارمیشن مہم چلیفنگا، شرپسند آتا بھارتی فنڈنگ نا شاہدیک کل انا مون آٹو۔ کالعدم ایکشن کمیٹی نا شرپسند آتیان مچ آ قوم حساب ہلیک۔