بنجائی وزیر داخلہ محسن نقوی نا کوئٹہ نا دورہ، وزیراعلیٰ بلوچستان تون اوڑدہی بلوچستان اٹی امن و امان نا حالیت آتیا بڑزکو کہولی دیوان

بنجائی وزیر داخلہ محسن نقوی کوئٹہ نا دورہ ءِ کرے و وزیراعلیٰ بلوچستان میر سرفراز بگٹی تون اوڑدہی کرے۔ بنجائی وزیر داخلہ محسن نقوی و وزیراعلیٰ بلوچستان میر سرفراز بگٹی نا کماشی ٹی بلوچستان اٹی امن و امان تون تعلقدار اسہ بڑزکو کہولی دیوان اس اڈ ہلک۔ وزیراعلیٰ بلوچستان دیوان ءِ صوبہ نا جم امن و امان نا حالیت، برجا گام گیج و بروک آ سُج پام آ تفصیلی بریفنگ تس۔ دیوان اٹی بلوچستان اٹی انسدادِ دہشت گردی فورس (سی ٹی ڈی) و پولیس نا پیشہ ورانہ لائخی ءِ پین جوان جوڑ کننگ نا فیصلہ کننگا۔ دیوان اٹی صوبہ نا پولیس ءِ سوگو کننگ نا فیصلہ غاتیا پیش رفت ءِ ترند کننگ آ اتفاق کننگا۔ وزیر داخلہ محسن نقوی وزارتِ داخلہ نا کنڈ آن درکار وسیلہ غاتا فراوانی اٹی پورو کمک نا باور کرفے و پارے کہ بلوچستان اٹی مدامگی امن کن بنجائی حکومت ہر ممکن کمک برجا تخو۔ او پارے کہ امن نا بحالی کن پلان آ دمدستی و بھرمی عملدرآمد وخت نا اہم ءُ گرج اسے و امن و امان نا سُج پام اٹی بلوچستان پولیس نا مسکوہی سروک آتا آزموندہ و سلابت آن پورو فائدہ ہرفنگے۔۔ بنجائی وزیر داخلہ محسن نقوی پارے کہ دہشت گردی نا برخلاف جنگ اٹی پوسکنوڑ ٹیکنالوجی، جوان انٹیلی جنس و مربوط سُج پام نا کڑز اف، بنجا و بلوچستان حکومت امن نا قیام کن پورو یکجہتی و ہم گرنچی تون مونی ہننگ اٹی ءُ۔