ٹانک اٹی پوسٹ آ دہشت گرد جلہو بے سہب، 12 جلہو گیر خلنگار،آئی ایس پی آر

ضلع ٹانک اٹی اسیجائی پولیس چیک پوسٹ آ جلہو گیر آک دہشت گرد جلہو کریر، ولے سیکورٹی فورس آتا وخت آ، فیصلہ کروک ورندی ٹی جلہو ءِ بے سہب کننگا۔ پاک فوج انا شعبہ تعلقاتِ عامہ (آئی ایس پی آر) نا رِد اٹ 23 و 24 جولائی 2026 نا نیامی نن جلہو گیر آک چیک پوسٹ نا سیکورٹی ءِ پرغنگ نا کوشست کریر، ولے ورناک بے کچ ہمت و کسبی لائخی نشان ترسا نروک 12 جلہو گیر ءِ خلکر۔ آئی ایس پی آر نا رِد اٹ بے سہبی آن پد جلہو گیر آک بارود آن پُر ءُ گاڈی اس چیک پوسٹ نا رکھی دیوال اٹ خلکر، ہرانا سوب آن دھماکہ ٹی چیک پوسٹ نا پنجر بھاز متاثر مس۔ آئی ایس پی آر نا رِد اٹ جلہو اٹی 15 کارندہ شہید مسر، ہرافتیٹی 12 فوجی، 2 پولیس کارندہ و محکمہ جنگلات نا اسہ سرکاری کارندہ اس اوار ءِ۔ بیان نا رِد اٹ علاقہ ٹی ساڑی جلہو گیر آتا چٹفنگ کن کلیئرنس آپریشن برجا ءِ و سیکورٹی فورس آک دہشت گرد آتا پورو چٹفنگ کن کارروائی کننگ ءُ۔ آئی ایس پی آر پارے کہ نیشنل ایکشن پلان نا بنجائی ایپکس کمیٹی نا منظور مروک وژن “عزمِ استحکام” نا رِد اٹ سیکورٹی فورس و کانود نافذ کروک ادارہ غاتا دہشت گردی نا برخلاف بے فرق کارروائیک پورو واک اٹ برجا سلرہ۔ بیان اٹی دا عزم انا درشانی کننگا کہ پاکستان آن درملکی کاٹم خواجہی و مخ تفی اٹ مروک دہشت گردی نا پورو چٹفنگ اسکان آپریشن برجا سلک۔ آئی ایس پی آر شہید آتے خراجِ تحسین پیش کرسا پارے کہ وطن نا رکھ کن دا بہادر ورنا تا عظیم انگا قربانیک دہشت گردی نا برخلاف قومی عزم ءِ پین سوگو کیرہ۔