اسلامی ملک آتا وزیر خارجہ غاتا مسجد اقصیٰ ٹی اسرائیل کارروائی تا مذمت

پاکستان، مصر، ترکیہ، انڈونیشیا، اردن، قطر، سعودی عرب و متحدہ عرب امارات نا وزیر خارجہ غاک مسجد اقصیٰ/الحرم الشریف اٹی اسرائیل نا ساڑی خارتس کارروائی، خاص وڑ اٹ اسرائیلی انتہا پسند وزیر آتا کماشی ٹی آبادکار آتا پدریسہ بھلو کچ اسے آ مسجد اقصیٰ ٹی اسرائیلی فوج انا رکھ اٹ پترینگ انگ، اونا تہٹی اسرائیلی بیرک ءِ چست کننگ، اسرائیلی پولیس نا کنڈآن اِرا تمبوخلنگ و ایلو کل خارتس گام گیج آتا ترند انگا لوز آتیٹی مذمت کرینو۔ جمہ نا دے آدفتر خارجہ نا رداٹ تینا اسیجائی بیان اٹ وزیر خارجہ غاک پاریر کہ دا خارتس و امنا کپروک گام گیج آک جہانی کانود، اقوام متحدہ نا تعلقدار قرارداد و مقبوضہ دے ٹکی بیت المقدس نا مقدس ہند آتا تاریخی و کانودی حیثیت نا خلاف ورزی ءُ۔ ہشت مسلم ملک آتا وزیر خارجہ غاک اسرائیلی انتہا پسند وزیر و ٹولی تا کنڈآن خارتس‘ مسجد اقصیٰ ٹی پترینگ انگ کن ہشکا تننگ و بیدادی آ تالان کانود آن چَپ و انتہا پسندانہ گام گیج آتا ہم سخت انگا لوز آتیٹی مذمت ءِ کریر۔ او خبڑدار کریر کہ دا خارتس گام گیج آک خار و انتہا پسندی ءِ ودفنگ ءُ و اِرا ریاستی ایسری نا بنداو آ انصاف پسند و آخبتی امن نا جوڑ کننگ نا کوشست آتے ٹی اڑاند جوڑ مریرہ۔ مقبوضہ بیت المقدس نا متکن آ شار و ہموڑے ساڑی عبادت گاہ تسکان رسینگ آ خلوک رکھ و متکن آشار انا ایلو عبادت گاہ تسکان امتیازی و است پسند وڑ اٹ رسینگ ءِ کچ اٹ کننگ، جہانی کانود، جہانی انسانی کانود نا خلاف ورزی و تاریخی و کانودی حیثیت ءِ بدل کننگ نا کانود آن چَپ کوشست اسے۔ وزیر خارجہ غاک دا ہیت آ زور شاغسا پاریر کہ اسرائیل ءِ مقبوضہ بیت المقدس یا ہموجاگہ نا اسلامی و مسیحی مقدس ہند آتیا ہچ ءُ وتواجہی اس دوئی اف۔ وزیر خارجہ غاک کوزہ گراسرائیل نا کنڈآن مقبوضہ دے ٹکی بیت المقدس نا تاریخی، کانودی و آبادیاتی تشخص ءِ بدل کننگ و اوڑے مروک اسلامی و مسیحی مقدس ہند آتا تقدس و حیثیت ءِ نسخان رسیفنگ کن برجا منظم و پدریسہ خلاف ورزی و گام گیج آتا سخت مذمت ءِ کریر۔ او مقبوضہ بیت المقدس و اونا اسلامی و مسیحی مقدس ہند آتا تاریخی و کانودی حیثیت ءِ بدل کننگ نا کوشست آتے مسترد کرسا اوفتا رکھ آ زور شاغار وخت اس کہ دا رد اٹ تاریخی ہاشمی کاٹم خواجہی نا خصوصی کڑد ءِ ہم امنا کریر۔ وزیر خارجہ غاک دا ہیت انا درشانی ءِ کریر کہ مسجد اقصیٰ/الحرم الشریف نا پورو 144 دونم آ تالان دنگ بیرہ مسلمان تا عبادت کن مخصوص ءِ و داکہ اردن نا وزارت اوقاف و اسلامی باندات نا محکمہ اوقافِ مقبوضہ بیت المقدس و باندات مسجد اقصیٰ ہمو اسٹ انگا کانودی ادارہ ءِ ہرادے مسجد اقصیٰ/الحرم الشریف نا انتظام و انصرام و اوڑے ہِننگ ءِ منظم کننگ نا خاص واکداری دوئی ءِ۔ وزیر خارجہ غاک کوزہ گیر واک انا حیثیت اٹ اسرائیل آن خواست کریر کہ او دمدستی وڑاٹ مقبوضہ بیت المقدس نا متکن آ شار اسکان رسینگ آ خلوک رکھ آتے چٹفے و نمازی تے مسجد اقصیٰ اسکان ہِننگ آن توپ۔ او جہانی برادری آ ہم زور شاغسا پاریر کہ او اسہ سوگو و گچین ءُ موقف اس تینائی کے ہرا اسرائیل ءِ مقبوضہ بیت المقدس نا اسلامی و مسیحی مقدس ہند آتا برخلاف برجاخلاف ورزی وکانود آن چَپ گام گیج و دا مقدس ہند آتا تقدس نا لتاڑ آن تورے۔