ایکسچینج سپورٹ فیسیلٹی،پاکستان نا کنڈ آن امریکہ غان 10 ارب ڈالر فراوان کننگ نا خواست

بنجائی وزیر خزانہ محمد اورنگزیب امریکی ہم منصب اسکاٹ بیسنٹ تون واشنگٹن اٹی اوڑدہی کرے ہراٹی پاکستان نا زرکوڑی ٹی جوانی و خودکار کریڈٹ ریٹنگ اٹی ودکی کن زرگزرانی کمک نا پیش رفت آ گپ و تران کننگا، اوڑدہی ٹی امریکی زرکاری ٹی ودکی و اسٹریٹجک ڈٹ آتا پیش رفت آ ہم ہیت و گپ مس۔ وزیر خزانہ ڈیہہ انا حالیت آتا پاکستانی زرگزران آ منفی زہم تا معلومداری تس۔ ایلو کنڈ آ برطانوی خبر رساں ادارہ رائٹرز نا رِد اٹ پاکستان امریکہ غان 10 ارب ڈالر نا ارٹمیکو “Exchange Stabilization Support Facility” فراوان کننگ نا خواست کرینے. امریکی وزیر خزانہ اسکاٹ بیسنٹ ءِ گدریفوک آ خواست انا منظوری نا رد اٹ پاکستان نا زرکوڑی تیٹی ودکی، روپئی آ زور اٹی کمتی و کثیر الجہتی مالیاتی وسیلہ غاتیا سیبو کننگ اٹ کمتی نا اومیت ارے۔ رائٹرز نا حوال نا رِد اٹ پاکستان امریکی وزیر خزانہ ءِ 5 سال انا مالی آسراتی نا خواست گدریفینے، پاکستان نا کنڈ آن دا خواست اولیکو وار مون آ بسنے، خواست منظور مس تو پاکستانی زرگزران کن بھلو سیبو اس مننگ کیک۔ حوال اٹی پاننگانے کہ ایران جنگ اٹی مذاکرات اٹی پاکستان نا کڑد انا سوب آن سفارتی اہمیت اٹی ودکی مس، اسلام آباد ءِ اومیت ارے کہ او واشنگٹن و ایلو شریدار آتیان زرگزرانی کمک دوئی کننگ کیک۔ حوال نا رِد اٹ دا خواست ایران جنگ انا وخت آ پاکستان نا سفارتی کڑد و تہران و واشنگٹن نا نیام اٹی مذاکرات اٹی کمکار کننگ آن پد مون آ بسنے ولے پاکستانی وزارت خزانہ نا کنڈ آن فنڈ انا فراوانی بابت دن ءُ خواست اسے داسکان پک کننگتنے وخت اس کہ امریکی محکمہ خزانہ ہم دا باندات آ ہیت و گپ آن نمن مسنے۔ ایلو کنڈ آ حکومتی خبر ایجنسی نا رد اٹ بنجائی وزیر خزانہ و بنگ سینیٹر محمد اورنگ زیب واشنگٹن ڈی سی ٹی امریکی ہم منصب اسکاٹ بیسنٹ تون اوڑدہی ٹی زرگزرانی کمکاری نا مونی دننگ، امریکی زرکاری ٹی ودکی و تذویراتی ڈٹ آتا پیش رفت ءِ پک کننگ نا عزم انا درشانی ءِ کننگا۔ فنانس ڈویژن نا رداٹ وزیر خزانہ تینا امریکی ہم منصب ءِ پاکستان نا میکرواکنامک سوگوی آن مدامگی و برآمد آ تیا تالان گروتھ نا سفر آن معلومداری تس۔ وزیر خزانہ علاقائی حالیت آتا پاکستانی زرگزران آ منفی زہم تا بابت ہم معلومدار کرے تے۔ او پارے کہ جہانی کیپٹل مارکیٹ آتسکان گچین رسینگ، زرکوڑی تیٹی گچینی و وتواجہ کریڈٹ ریٹنگ آتیٹی ودکی آ تالان مارکیٹ رسینگ نا بابت امریکی کمک درکار ءِ۔ اوڑدہی ٹی ہڑتوم آ کنڈآک زرگزرانی کمک نا مونی دننگ، امریکی زرکاری ٹی ودکی و اسٹریٹجک ڈٹ آتا پیش رفت ءِ پک کننگ نا عزم انا درشانی ءِ کریر۔