بلوچستان اٹی انٹیلی جنس بیسڈ اسیجائی آپریشن تیٹی 10 دہشت گرد خلنگار،آئی ایس پی آر

بلوچستان اٹی سیکورٹی فورس آتا کنڈ آن بھارتی کاٹم خواجہی ٹی کاریم کروک فتنہ الہندوستان و فتنہ الخوارج نا برخلاف تدوک آ 48 گھنٹہ ٹی انٹیلی جنس بیسڈ اسیجائی آپریشن تیٹی 10 دہشت گرد خلنگار، وخت اس کہ اِرا خودکش بمبار نیاڑی و اسہ کمکار اس دزگیر کننگا۔ آئی ایس پی آر نا رِد اٹ بلوچستان نا ضلع سوراب و مستونگ اٹی دہشت گرد و اوفتا کمکار آتا برخلاف جم اسیجائی کارروائیک کننگار۔ آپریشن نا وخت آ ضلع سوراب اٹی 7 دہشت گرد خلنگار، وخت اس کہ ضلع مستونگ اٹی 3 دہشت گرد خلنگار۔ آئی ایس پی آر نا رِد اٹ مستونگ اٹی بھارتی کاٹم خواجہی ٹی کاریم کروک فتنہ الہندوستان آن تعلقدار اِرا خودکش بمبار نیاڑی و اسہ کمکار اس ہم دزگیر کننگا۔ کارروائی نا وخت آ دہشت گرد آتیان سلہہ‘ منچر و دیسی بمب ہم دوئی کننگا۔ آئی ایس پی آر نا رد اٹ علاقہ ٹی ساڑی ایلو دہشت گرد آتے پٹنگ کن کلیئرنس آپریشن برجا ءِ۔ ترجمان پاک فوج نا رِد اٹ بنجائی ایپکس کمیٹی نا منظور کروک عزمِ استحکام وژن نا رِد اٹ سیکورٹی فورس و کانود نافذ کروک ادارہ غاک درملکی کاٹم خواجہی ٹی مروک دہشت گردی نا پورو چٹفنگ اسکان کارروائی تے پبی واک اٹ برجا تخرہ۔ وزیراعلیٰ بلوچستان میر سرفراز بگٹی سوراب و مستونگ اٹی سرسہب انٹیلی جنس بیسڈ آپریشن تیا سیکورٹی فورس و کانود نافذ کروک ادارہ غاتے خراجِ تحسین پیش کرینے۔ او پارے کہ دہشت گرد آتا ہند آتا بھسکاری و خودکش جلہو آتا ڈٹ بندی کروک آتا دزگیری سیکورٹی فورسز آت بھلو سرسہبی اسے۔ وزیراعلیٰ دا عزم انا درشانی ءِ کرے کہ بلوچستان نا امن ءِ لتاڑ کننگ نا ہر سازش ءِ بے سہب کننگک و ریاست دشمن آتیکن ہچ ءُ وڑ اسے نا نرمی مفک۔ او مستی پارے کہ بھارت نا کاٹم خواجہی ٹی کاریم کروک دہشت گرد و اوفتا کمکار آتا برخلاف کارروائیک ایسری اسکان برجا سلرہ و حکومت بلوچستان دہشت گردی نا پورو چٹفنگ اسکان سیکورٹی فورس آتتون ہم کوپہ سلوک ءِ۔ میر سرفراز بگٹی پیدوار کرے کہ صوبہ ٹی امن، سوگوی و الس نا جان و مال انا رکھ حکومت نا اولیکو اولیت ءِ و دہشت گردی نا برخلاف جنگ پورو واک اٹ برجا سلک۔ او پارے کہ سیکورٹی فورس آتا قربانی و سرسہبیک مچ آ قوم اکن گمر نا سوب ءُ، و دا ناچوڑ ءِ ماس کشنگ کن کل دوئی وسیلہ غاتے کاریم اٹ اتنگک۔