پاکستان ڈیہہ اٹی امن و سوگوی کن تینا کوشست آتے برجا تخک،وزیراعظم شہباز شریف

اسلامی جمہوریہ ایران نا وزیر داخلہ اسکندر مومنی وزیراعظم ہاؤس اٹی وزیراعظم محمد شہباز شریف تون اوڑدہی کرے، ہراٹی پاک ایران تعلقداری، ڈیہہ انا حالیت و تین ہ تینی کمک نا پیش رفت آ جم گپ وتران کننگا۔ اوڑدہی ٹی نائب وزیراعظم و وزیر خارجہ سینیٹر محمد اسحاق ڈار، بنجائی وزیرداخلہ سید محسن رضا نقوی، بنجائی وزیر حوالکاری وشینکاری عطاء اللہ تارڑ، وزیراعظم نا سلاہکار ڈاکٹر سید توقیر شاہ، وزیر مملکت داخلہ طلال چوہدری و بڑزکو سرکاری کمامدار آک ہم ساڑی ئسر۔ وزیراعظم شہباز شریف دا تُو انا بنا ٹی تہران نا تینا دورہ نا ذکر ءِ کرے ہراڑے او سپریم لیڈر آیت اللہ سید علی خامنہ ای نا جنازہ ٹی بشخ ہلکوسس، سپریم لیڈر آیت اللہ سید مجتبیٰ حسینی خامنہ ای و صدر ڈاکٹر مسعود پزشکیان کن نیک استخواہی و شرف انا کلہو سر کرے۔ وزیراعظم خلیج اٹی داسہ نا چک و تاڑ آ گڑتی درشان کرسا کل فریق آتیا زور شاغا کہ او سگ آن کاریم ہلیر و ہمو گام گیج آتے کپس ہرا ڈیہہ اٹی پین بے باوری نا سوب جوڑ مننگ کیرہ۔ او دا ہیت انا عزم ءِ کرے کہ پاکستان اسہ ایماندار و مخلص ءُ خیرخواہ و کمکار اسے نا وڑ اٹ اٹ تینا کڑد ءِ پدریسہ برجا تخک و ڈیہہ اٹی امن و سوگوی کن تینا کوشست آتے برجا تخک۔ ایران نا وزیرِ داخلہ اسکندر مومنی اسلام آباد اٹی جم وجوش اٹ بخیر کننگ آ وزیراعظم نا منتواری ءِ ہرفے و ایرانی راہشون تا کنڈآن وزیراعظم شہباز شریف کن نیک استخواہی و خیرسگالی نا کلہو سر کرے۔ او پارے کہ او بڑزکو کہولی ڈل اتون اوار پاکستان آ بسنے تانکہ ہڑتوم آ ایلم ملک آتا نیام اٹ تین پہ تینی تعلقداری تے پین سوگو کننگے۔ ایرانی وزیر داخلہ نے وزیراعظم شہباز شریف، نائب وزیراعظم و وزیر خارجہ سینیٹر محمد اسحاق ڈار و فیلڈ مارشل سید عاصم منیر نا امن و مفاہمت کن سفارتی کوشست آتا ستاءِ کرسا پارے کہ اوفتا جہد انا سوب آن اسلام آباد مفاہمتی یادداشت پک مس۔ او سپریم لیڈر آیت اللہ سید علی خامنہ ای نا جنازہ ٹی بشخ ہلنگ کن وزیراعظم نا تہران نا دورہ نا ہم ستاءِ کرے و اونا منتواری ءِ ہرفے۔