یونیورسٹی آف تربت نا تعلیمی آب اٹی شونداری گمر نا ہیت اسے ،گورنر جعفر خان مندوخیل

گورنر بلوچستان جعفر خان مندوخیل پارینے کہ یونیورسٹی آف تربت جتا جتا باندات آتیا گمر نا سوب بڑزکو تعلیمی ادارہ اسے نا وڑ اٹ مونی بسنے۔ دا پاکستان نا اولیکو یونیورسٹی ءِ ہراڑے طالب علم آتا جم کچ انا نیمہ غان ود بشخ مسڑ طالب علم ءِ۔ ہرا راجی بدلی و تعلیمی شونداری نا اسہ سوگو ءُ نشان اسے۔ اسہ پین سرسہبی اس ہرا ستا کڑزک او یونیورسٹی نا رینکنگ و اسکورنگ اٹی گچین پیش رفت ءِ۔ دا ہیت ہم است بڈی نا سوب ءِ کہ یونیورسٹی آف تربت نا بروک آ پنچ سال انا ڈٹ ہم بھاز پیدوار ءِ و او تینا رینکنگ و اسکورنگ نا کارکڑد ءِ 91.4 درسَد اسکان ودینے ہرانا کریڈٹ وائس چانسلر پروفیسر ڈاکٹر گل حسن و اونا مچ آ ٹیم اکن کاہک‘ ولے دا سرسہبی نا گڈیکو مزل اف انتئے کہ ایکسیلنس اسہ پدریسہ ءُ عمل اسے۔ دا خیال آتا درشانی ءِ او یونیورسٹی آف تربت نا دہ میکو سینیٹ دیوان نا کماشی ءِ کرسا کرے۔ دا وخت آ صوبائی وزیر تعلیم راحیلہ حمید خان درانی، بلوچستان ہائی کورٹ نا جسٹس سردار احمد حلیمی، وائس چانسلر تربت یونیورسٹی پروفیسر ڈاکٹر گل حسن، صوبائی سیکرٹری ہائیر ایجوکیشن صالح بلوچ، ہائیر ایجوکیشن کمیشن نا نمائندہ ڈاکٹر ظہور بازئی، پرنسپل سیکرٹری ٹو گورنر بلوچستان عبدالناصر دوتانی، پرو وائس چانسلر ڈاکٹر کمال احمد، ڈین فیکلٹی ڈاکٹر عبدالصبور (تمغہ امتیاز)، ڈین فیکلٹی ڈاکٹر طاہر حکیم، رجسٹرار گنگوزار بلوچ، ڈائریکٹر ریاض احمد و ڈائریکٹر اعجازِ احمد تون اوار کل سینیٹ باسک آک ساڑی ئسر۔ شریدار آتتون گپ و تران کرسا گورنر بلوچستان جعفر خان مندوخیل پارے کہ یونیورسٹی سینیٹ نا آئینی و انتظامی پوزیشن ءِ پیدوار کننگ المی ءِ‘ سینیٹ ءِ یونیورسٹی ٹی ہمو ہند دوئی ءِ ہرا کابینہ ءِ حکومت اٹی مریک۔ دا یونیورسٹی نا غٹ آن بھلا کانودی فیصلہ ساز ادارہ ءِ ہندا سوب آن ہراتم ہم سینیٹ جوان سجفنگ آن پد فیصلہ اسے آ سرمریک تو ہمو فیصلہ گڈیکو مریک و اوڑا عملدرآمد المی ءِ۔ دا ادارہ ئی پنجر ننا یونیورسٹی تیٹی شفافیت، پرسجوئی و پدریسہ جوابدہی و ردوریسہ ءِ پک کیک۔ سینیٹ نا فیصلہ غاتا شرف اصل اٹ کانود نا حکمرانی، ادارہ ئی سالمیت و علمی برادری نا اسیجائی حکمت نا شرف ءِ۔ گورنر بلوچستان جعفر خان مندوخیل یونیورسٹی آف تربت نا طالب علم آتا پن آ تینا اسہ کلہو اسے ٹی پارے کہ نما غٹ آن بھلا واکداری نما ہیل کننگ نا مہر و کتاب دوستی ءِ‘ تینا تعلیم تون است خواہی ءِ پدریسہ تخو انتئے کہ علم غٹ آن سوگو آ زرکاری ءِ‘ ہرا نما روشنا آخبت نا ضمانت ءِ۔ یونیورسٹی آف تربت نا دہ میکو سینیٹ دیوان نا کل شریدار آتا سلاہ تیا کیہی اہم انگا فیصلہ غاتے کننگا۔