ضلع چاغی ءِ داڑیل و دُز آتا دوٹی تننگانے، حاجی وارث محمد حسنی

چاغی : ضلع چاغی ءِ داڑیل و دز آتا دوٹی تننگانے۔ ضلعی انتظامیہ امن و ایمنی ءِ کنٹرول کننگ اٹ ہر وڑاٹ بے سہب مسنے۔ داڑیل نا سم کاری آن غلام رسول آنبار انگا تعلیم یافتہ ورنا تا شہادت بھاز اُست ہسونی اسے۔ چیئرمین یو سی امین آباد حاجی وارث محمد حسنی، وائس چیئرمین ضیا الحق محمد حسنی تینا بیان اسے ٹی ضلعی انتظامیہ نا امن و ایمنی آ تنقید کرسا پارینے کہ تدوک آ دے امین آباد آن غلام رسول شہ سالار آ ہناکہ۔ داڑیل آک سم کاری کرسا ورنا ءِ شہید کریر۔ ضلع چاغی اسہ قابل، محنتی، ورنا اسے آن زہمی مس۔ دا خراب انگا واقعہ چاغی ءِ سوگ نا گواچنی کرے۔ ہرا بھاز بھلو واقعہ اس ئس۔ ضلعی انتظامیہ بیرہ زبانی و سوشل میڈیا آ تینا واہ واہ کرسا اُلس ءِ امن و ایمنی نا جوانی کن سٹی ءُ تسلی تننگ اٹی ءِ۔ عملی وڑاٹ چاغی ٹی امن و ایمنی پورو وڑاٹ بھس مسنے۔ ہڑدے اُلس داڑیل آتے پلسا فرار مریرہ۔ مزاحمت آ اودے کسفرہ۔ ولے انتظامیہ قاتل آتے دزگیر کننگ نا جاگہ غا سٹی آ یقین دہانی تیٹی اُلس ءِ بے وقوف کرسا امن و ایمنی نا جوانی نا پاننگ اٹی ءِ۔ امین آباد نا باتیک ورنا غلام رسول نا شہادت آ فریشان ءُ۔ کمشنر رخشان ڈویژن‘ چیف سیکرٹری‘ کورکمانڈر بلوچستان، انفور سمنٹ ایجنسی تیان خواست کرینے کہ ضلعی انتظامیہ آ پریشر شاغسا ورنا غلام رسول نا خونی تے دزگیر کرسا اوفتا برخلاف کارروائی کننگے۔ خاہوت آتے بیرہ انصاف فراوان کننگے۔ وخت اس کہ ایلو امین آباد نا باتیک کل کسر تے بلاک کرسا برانز کننگ نا حق تخرہ۔

(آن لائن)