سپریم کورٹ‘ آڈیو لیکس انکوائری کمیشن نا نوٹیفکیشن توننگا

اسلام آباد : سپریم کورٹ آف پاکستان آڈیو لیکس انکوائری کمیشن نا نوٹیفکیشن ءِ معطل کرے۔ آڈیو لیکس انکوائری کمیشن نا بابت تدوک آ سماعت نا پرمان 8 پنہ غاٹے‘ پرمان ءِ چیف جسٹس پاکستان، جسٹس عمر عطا بندیال نوشتہ کرینے‘ کمیشن جوڑ کننگ نا برخلاف درخواست دائر کروک چیئرمین پی ٹی آئی عمران خان ناکنڈآن سماعت اٹ کس اس پیش متو‘ نوشتہ ئی پرمان نا رد اٹ سپریم کورٹ آڈیو لیکس کمیشن نا نوشتہ ئی پرمان و کارروائی آ ہم حکم امتناع جاری کرے و آڈیو لیکس انکوائری کمیشن جوڑ کننگ نا 19 مئی نا حکومتی نوٹیفکیشن ءِ معطل کننگا۔ سپریم کورٹ تینا نوشتہ ئی پرمان اٹ پارے کہ آڈیو لیکس انکوائری کمیشن نا باندات آ بروک آ سماعت 31 مئی آ مریک۔ سپریم کورٹ ناپرمان اٹ پاننگانے کہ کمیشن اٹ جج آتا پن کننگ نا بابت چیف جسٹس تون سلاہ کننگ المی ءُ عمل اسے۔ سپریم کورٹ نا پرمان اٹ پاننگانے کہ وفاقیت نا اصول نا رد اٹ اِرا ہائی کورٹ نا چیف جسٹس تے پن کننگ کن ہم چیف جسٹس تون سلاہ کننگ المی ءِ‘ بنجائی حکومت نا کنڈآن جج آتے پن کننگ آن جج آتیا شکبری ودی مس۔ پرمان نارد اٹ سپریم کورٹ عابد زبیری نا وکیل شعیب شاہین ءِ پورو خف تورے‘ شعیب شاہین نا موقف ئس کہ کمیشن نا نوٹیفکیشن آئین اٹ واکداری تا بشخ و پانٹ نا اصول آتیان چَپ ءِ۔ سپریم کورٹ نا پرمان اٹ پاننگانے کہ حکومت عدلیہ نا باندات آتے ٹی نیام تمنگ کپک‘ آڈیو لیکس انکوائری کمیشن ءِ مستی کاریم کننگ آن توننگک۔ سپریم کورٹ اٹ چیف جسٹس پاکستان عمر عطا بندیال ناکماشی ٹی جسٹس اعجاز الاحسن، جسٹس منیب اختر، جسٹس شاہد وحید و جسٹس اظہر رضوی آساڑی پنچ باسکی لارجر بینچ آڈیولیکس کمیشن نا برخلاف عمران خان وایلوفتا درخواست آتیا سماعت کرے۔ سماعت نابنا ٹی اٹارنی جنرل بینچ اٹ چیف جسٹس نا اوار مننگ آ اعتراض کرسا پارے کہ خواست دادے کہ چیف جسٹس دا بینچ انا بشخ جوڑ مف۔ سپریم کورٹ اٹ آڈیو لیکس کمیشن آ سماعت ناوخت آ اٹارنی جنرل منصور عثمان بینچ اٹ چیف جسٹس عمر عطا بندیال نا اوار مننگ آ اعتراض کرے۔ چیف جسٹس عمرعطا بندیال ناکماشی ٹی 5 باسکی لارجر بینچ آڈیو لیکس کمیشن نا برخلاف دائر درخواست آ سماعت کرے۔ بینچ اٹ جسٹس اعجازالاحسن، جسٹس منیب اختر، جسٹس شاہد وحید و جسٹس حسن اظہر رضوی اوار ء‘ سماعت نا بنا ٹی اٹارنی جنرل بینچ اٹ چیف جسٹس نا اوار مننگ آ اعتراض کرے و موقف تینائی کرے کہ چیف جسٹس بینچ انا بشخ مف‘ چیف جسٹس پارے کہ نا مطلب دادے کہ ای بینچ آن جتا مریو؟ نی ننا انتظامی واکداری تے ٹی نیام تمپہ‘ چیف جسٹس نا عہدہ اسہ آئینی ءُ عہدہ اسے‘ کنے سما ئس کہ نی دا اعتراض ءِ کیسہ ولے عدلیہ بنجائی حکومت نا شیف آن اف‘ آئین اٹ ہر کس نا تینا واکداریک ءُ‘ تو داسہ پاننگے کہ چیف جسٹس تون سلاہ کننگ آن بیدس دا گام ءِ امر ہرفنگا؟ چیف جسٹس ریمارکس تس کہ حکومت جج آتے تینا مسخت کن امر گچین کننگ کیک؟ ادارہ غاتے شرف تننگے اوفتے ٹی عدلیہ ہم اوار ءِ‘ اگہ جھیڑہ کروئی ءِ تو گڑا اٹارنی جنرل تیاری کے برے‘ شرہ نا وخت آ اسہ مرحلہ اس ہندن ءُ ہم بس ہراتم چیف جسٹس پارے کہ‘ ننا سلاہ غان بیدس عدلیہ نا امور تے ٹی نیام تمرے تو‘ ولداہندا ہیت ءِ ہنداڑے نیمہ غا الا۔