براہوئی زبان متکنء ِ نوشت آک تے انتئے متکن افس؟                   6

تاریخ دا ہم پاہک کہ ہر قوم و زبان نا اسہ بنجائی ء ُ علاقہ اس مریک، ہچ ء ُ قوم اسے نا بنجائی وطن اونا اصل قوم و زبان آن خالی مفک، اوفتا تہذیب و تمدن، کلچرو زبان ہمو بنجائی علاقہ ٹی زیات رکھوک مریک و خننگک۔ دا تو پک ء ِ کہ براہوئی پاروک آتا و براہوئی زبان نا بنجائی علاقہ قلات (ساراوان وجھالاون) ء ِ۔ ذکر مروک آ گڑاک کل ہنداڑے تینا اصلی دروشم اٹی خننگرہ۔

داہیت آتا گڑاس سرجم کتاب ”تاریخ قلات بلوچ قوم و بلوچستان کے پس منظر میں“ ٹی ارے۔ ہموڑے ہُننگ مریرہ۔

براہوئی پاروک آتا و براہوئی زبان نا مہالو نا و داسہ نا حوالہ غاتیان معلوم مس کہ دازبان تو متکن ء ِ، و کشانی کجولا کد فیزس نا زمانہ اسکان مننگ کیک زوراک ء ُ زبان اس مسنے کہ اوٹی نوشتہ کننگانے۔ زوراور آ زبان ہر زمانہ ٹی ایلو زبان آتا مون اٹ نوشتہ و دفتری آ زبان جوڑ مریک، ہندا سوب آن او زیات شون ہم ہلیک۔ دن کہ دا وخت آ ننا علاقہ غاتیٹی انگریزی و اردو، ہڑدوسر زوراور آ زبانک ء ُ۔ زوراور آ زبان کن دا المی اف کہ او زبان اٹ ہیت کروک آک بھاز مریر، بلکن او زبان اینو پگہ نا انگریزی زبان آنبار مرے، کہ اونا پاروک آک بھاز کم ء ُ، ولے او زوراور ء ُ زبان اسے۔

 (12)

براہوئی زبان انتئے نوشت اٹی متنے؟:۔

خیال دا مریک کہ شاید کوشانی دور آن گڈ براہوئی زبان نا واکداری ختم مسنے۔ پدا شاید اودے ہچ ء ُ بادشاہ، حکومت یا ریاست اسے نا کمک دوئی متنے، نزوری نا سوب آن گمان ء ِ کہ ہمووخت آن ہلیس اینو اسکان او نئے مذہبی، نئے سرکاری، نئے درس و تدریس، نئے واپار و منڈی نا زبان اس مننگ کرینے کہ او زبان اٹ نوشتہ مرے۔

دا ہم خیال مریک کہ مُست درخت آتا پن، پتن آہڈ، مِش تا ٹکری و پین گڑاتیا براہوئی نوشت آک تو مسنو، ولے او گڑاک زیان مروک ء ُ گڑا ء ُ، دا وخت اسکان او زیان مسنو، اسلام نا بنائی دے تیٹی ہم بھازآ نوشت آتے ہندا گڑاتیا نوشتہ کننگ نا ڈس ملک ولے اینو اوفتا درک بھاز کم ء ِ۔

دا ہم اسہ ہیت اس ارے کہ او نوشت آک تو اریر، ولے نن اوفتے پُہہ مفنہ یاننا خن تیان اوفک دا وخت آ اندر ء ُ، ننا دو تیا تمنگ اٹی افس۔ شاید مستی ہندن ء ُ زمانہ اس برے کہ براہوئی زبان نا مُتکن آ ادب، اونا تہذیب نا کتبہ، نوشت و ایلو نشانیک ننا مون آ بریر۔ دُن کہ مرحوم حافظ سلطان احمد ء ِ، جھالاوان آن براہوئی ٹی نوشت نا ارا کتبہ دُو بسنو۔ ہرافتیان اسٹ اسے آ، دا وڑ نوشتہ کروک ء ِ۔ ”براہوئی مش انا، سپا ئی سکندر نا“ داڑان بیدس چندر گپت نا بھاز سکہ غاتیا ہم براہوئی عبارت نوشتہ مروک خننگانے۔(14) اگہ دا ہیت آک پک ء ُ، تو سما تما کہ براہوئی زبان و ادب تو پین مف سکندر مقدونی نا زمانہ غان اسہ نوشتہ ئی ء ُ زبان اس خننگک۔ ہندا مورخ لکھک کہ اوکان گڈ ہشتمیکو ہجری کرن اٹی خط نستعلیق وخط نسخ اٹ براہوئی ٹی نوشتہ مروک آ کتاب آک ہم دوتمانو، معلوم مس کہ او کرن اٹی براہوئی زبان ہمو ہندآ، مسنے کہ اوڑٹ باقاعدہ کتاب لکھنگانے۔

او زمانہ غاتیان گڈ ایلو واکدار آزبانک دن کہ، رائے خاہوت نا سندھی یا ہندی، ایرانی تا فارسی، عرب آتا عربی، براہوئی زبان آن زیات واکدار ء ُ زبان جوڑ مسنو۔ پولکار آتا پاننگ نارد اٹ، برصغیر اٹی اسلام آن روشن مروک آ اولیکو سرزمین بلوچستان ناء ِ، کل آن مُست عرب و ایرانی عالم دین و فاضل آک، درس تدریس کن ہندا علاقہ غاتے ٹی بسُر، خاص وڑ اٹ کیکان (سطح مرتفع قلات، ساراوان و جھالاوان) نا بارو اٹ تو او تینا کتاب آتیٹی بھاز نوشتہ کرینو، ہرا کہ کتاب تاریخ قلات اٹی ساڑی اریر۔ دن پا کہ دا علاقہ والاتا ہر گڑا براہوئی یا بلوچی زبان نا جاگہ غا ہمو بروک آ واکدار آ حاکم آتا جاری کروک آ بولی فارسی، عربی یا پین زبان آتیٹ مرسا کرینو، ہندا سوب آن براہوئی بولی ہم ایلو بھازآ بولی تیانبار کرار کرار آ نزور مرسا نوشت آن پیش تمانے۔ انتئے کہ نزور آ بولی، نئے واکداری، نئے منڈی، نئے درس و تدریس نا بولی مننگ کیک، ہندا رد اٹ اگہ ہُرن، تو براہوئی زبان کجولا کد فیزس نا زمانہ نا ڈول اٹ، گڈیکو زمانہ غاتے ٹی سرکاری یا تعلیم نا زبان اس جوڑ مننگ کتنے۔

دنیاٹی دا ہیت بیرہ براہوئی تون گنڈوک اف، بلکن چندی پین زبانک ہم اریر، ہرافک کہ زمانہ سے ٹی تو بھلو تہذیب اسے نا مالک مسنو، زمانہ نا شیف، بُڑز و بدل سدل نا مننگ نا سوب آن او ہم اینو ڈکوک ء ُ۔ دانا مثال ء ِ طارق رحمان ترسا نوشتہ کیک کہ:

حقیقت دادے کہ پنجابی پاکستان اٹی کل آن بھلو و مُتکن ء ُ زبان اسے، مڑوئی نوشتئی دروشم اٹ (براہوئی آنبار) اونا ہم مُست انا نوشت آک داسکان دو بتنو، ساڑی دور اناگڑاس نوشتکار آک اودے زندہ تخانو۔(15)

 ڈاکٹر عبدالرزاق صابر پاہک کہ:

”دا وخت آ نن براہوئی زبان نا مقابلہ ء ِ ایلو زبان آتتون کینہ تو نن خننہ کہ دا خطہ نا تہٹی پین چندی زبان تیان، براہوئی زبان زیات شون ہلوک خننگک۔ علاقائی زبان تیٹی اسہ ارا زبان ہندن ء ُ مرو کہ براہوئی آن اوفتا ادبی سرمایہ مچٹ اس زیات مرو، دُن کہ سندھی، پشتو، مچے بھاز بلوچی۔ پنجابی زبان تو بھاز بھلو مخلوق اسے نا زبان ء ِ، اخس کہ براہوئی زبان مون آٹے شاید اوخس پنجابی و سرائیکی مون آ افس۔“

ہند اوڑ ہندکو زبان والاک نوشتہ کیرہ کہ، ہندکو ہم دنیا نا قدیم ترین آزبان آتے ٹی اوار ء ِ ء ِ، ولے حیرت مریک کہ ہندکو رسم الخط آ اینو اسکان قابل قدر ء ُ پٹ و پول اس مون آ بتنے، او پارہ کہ، بھازآک دا زبان نا بارو اٹ عجب ء ُ عجب ء ُ قیاس آرائی کیرہ، پارہ کہ ہندکو زبان نا ہچ ء ُ رسم الخط اس اف۔(16)۔