وفاق و صوبائی حکومت آتا کاریم تیٹی شفافیت اف، چیف جسٹس پاکستان

اسلام آباد (مانیٹرنگ ڈیسک) چیف جسٹس پاکستان جسٹس گلزار احمد پارینے کہ وفاق و صوبائی حکومت آتا کاریم تیٹی شفافیت اف، زکوٰة نا پیسہ غاتیان دفتری کاریمک چلیفنگ مفسہ، نئے دا پیسہ غاتیٹی مخلوق ءِ جہاز آتیٹی چکر ترفنگ مریک، سندھ حکومت اسہ ارب روپئی نا راشن بشخا، ولے دانا کس ءِ سما ہم تمتو، بلوچستان اٹی ہم شفافیت نا ویل ارے۔ چیف جسٹس پاکستان جسٹس گلزار احمد نا کماشی ٹی 5 باسکی بینچ کورونا وائرس نا بابت حکومتی گام گیج آتیا ازخود نوٹس نا سماعت ءِ کرے۔ سماعت نا وخت آ ہرچار آ صوبہ غاتا جانجوڑی وزرات نا رپورٹ آک عدالت اٹی تننگا۔ چیف جسٹس گلزار احمد سوج کرے کہ بنجائی حکومت نا ورندی ہرادے؟ سماعت نا رد اٹ بنجائی حکومت نا کنڈ آن اٹارنی جنرل خالد جاوید عدالت اٹی پیش ،س او پارے کہ جانجوڑی وزارت و این ڈی ایم اے جتا جتا ورندی تسنو۔ جسٹس گلزار احمد ریمارکس تس کہ محکمہ زکوٰة ہم ہچ ءُ معلومداری سا تتنے۔ محکمہ زکوٰة نا ورندی ٹی بیرہ کانود ءِ پاننگانے۔ چیف جسٹس ریمارکس تس کہ بیت المال والاک کس ءِ فنڈ تفسہ۔ است ہسونی نا ہیت اسے کہ بیت المال نا ہم بھلا بشخ انتظامی باندات آتیا خڑچ مریک۔ چیف جسٹس پاکستان نا پاننگ ئس کہ زکوٰة نا پیسہ غاتیان دفتری باندات آتے چلیفنگ مفک۔ زکوٰة نا پیسہ غاتیان مخلوق ءِ جہاز آتیٹی سفر کرفنگ مفک۔ حکومت دا ہیت ءِ پک کرفے کہ زکوٰة نا پیسہ غاک ٹی اے ڈی اے آ خڑچ مفس،بلکن اصل مخلوق اسکان سر مریر۔ جسٹس گلزار احمد ترند مرسا پارے کہ حاجی کیمپ کورنٹائن آتیٹی حالیت آک انسانی وڑ اٹ افس۔ اوڑے ہچ ءُ آسراتی اس اف۔ گیشتری بندغ آک غاو کننگ اٹی ءُ۔ اوکان پد چیف جسٹس سیکرٹری جانجوڑی ءِ پرمان کرے کہ نی تینٹ حاجی کیمپ کورنٹائن سینٹر آ ہن، و ایلو کورنٹائن سینٹر آتا ہم دورہ ءِ کر۔ چیف جسٹس پاکستان سندھ حکومت نا رپورٹ آ ریمارکس تس کہ 8 ارب روپئی نا حساب آ ننے باور بفک۔ کس ءِ سما اف و سندھ حکومت ارب روپئی بشخا؟ سندھ حکومت تو چنکو کاریم اس کرسا اخبار تیٹی فوٹو خلفک۔ سماعت نا وخت آ سندھ حکومت نا کنڈ آن ساڑی ایڈووکیٹ جنرل سندھ سلمان طالب شاہ ورندی تس کہ کورونا غا سیاست کننگ خواپنہ، ہندا سوب آن فوٹو ہلنگ پننگ ءِ۔ سہب انا ار آن ہفت بجہ اسکان اُرا اُرا اسکان راشن سر کننگک۔ ہرا اُرا تے راشن تننگانے، اوفتے سما ءِ۔ سماعت نا وخت آ چیف جسٹس سوج کرے کہ مردان نا یوسی منگاہ نا انت حالیت ءِ؟ تو ایڈوکیٹ جنرل خیبر پختونخوا پارے کہ یو سی منگاہ ءِ ملنگانے۔ چیف جسٹس گلزار احمد سوج کرے کہ طورخم بارڈر آن بروک آتے امر و ہراڑے تخنگک؟ ایڈووکیٹ جنرل کے پی پارے کہ طورخم بارڈر آگٹ پاکستانی تے پدی بننگ کن اِلنہ۔ داتم اسکان دونیم ہزار بندغ پدی بسنو۔ طورخم آن بروک آتے کورنٹائن اٹ تخنگ انگ ءِ۔ ایڈوکیٹ جنرل بلوچستان سپریم کورٹ ءِ پارے کہ چمن و تفتان بارڈر آ کورنٹائن سینٹر جوڑ کننگانے۔ قلعہ عبداللہ ٹی 800 بندغ کن ٹینٹ سٹی اس جوڑ کننگانے۔ چیف جسٹس ریمارکس تس کہ بلوچستان حکومت نا رپورٹ اٹی ہم شفافیت نا ویل ارے۔ ایڈوکیٹ جنرل بلوچستان پارے کہ بیرہ راشن تننگ اُن، کس اسے نغد پیسہ تتنن۔ او پارے کہ صوبائی حکومت 21 ہزار وخت اس کہ این جی اوک 26 ہزار خاہوت ءِ راشن تسنو۔ سپریم کورٹ زکوٰة نا پیسہ غاتا تننگ اٹ شفافیت نا بابت صوبہ غاتیان و آئی سی ٹی آن رپورٹ بٹنگا۔ عدالت بیت المال نا شفافیت نا بابت رپورٹ ءِ بٹنگسا پارے کہ ہرچار آ صوبہ غاک و بنجا بروک آ سماعت آن مست کورونا وائرس آ گام گیج نا بابت پیشرفت نا رپورٹ جمع کرفر