گوگل نا ”براہوئی“ موبائل کیبورڈ ایپلی کیشن

”جی بورڈ“ گوگل نا کیبورڈ ءِ، دا کیبورڈ اٹ کم و وَد کل ہمو زبان تے اوار کننگ نا کوشست کننگانے، ہرافک نوشتئی دروشم اٹ ساڑی اریر، یا ہرافتا نوشت نا اسہ نظام اس ساڑی ارے۔ اینو پگہ ہر موبائل آ ”بائے ڈیفالٹ“ گوگل جی بورڈ دوئی مننگ کیک۔ پوسکن انگا ہیت دادے کہ دا کیبورڈ اٹ براہوئی زبان ءِ ہم اوار کننگانے۔ دا نن کن دا سوب آن ہم مستائی اس ارے کہ ننا زبان پوسکن آ ٹیکنالوجی نا پڑ آ دن شون ہلوک اف، و داکان مست کہ براہوئی زبان ءِ ڈیجیٹل نوشت نا پڑآ اتنگا، تو بنائی وڑ اٹ بھاز آ خواریک مون تروک ئسرہ۔ دا رد اٹ زبان نا گلزادہ غاک کوشست کرسا دا ویل آتے کرار کرار آ تینا وڑ اٹ سر تننگ نا کوشست کرسا ہنانو، سعید ذوالقرنین و علی اکبر زہری، براہوئی زبان نا نوشت نا بابت اڑاند آتے مُر کننگ نا کوشست آتیٹی کل آن مونی خننگرہ۔ ڈیجیٹل ٹول آتیا براہوئی زبان نا لوز آتا دروشم نا پننگ نا بابت بلوچی اکیڈمی بلوچی و براہوئی ہڑتوم آ زبان تیا کاریم کرینے۔ و داسہ دنیا نا کل آن بھلا ویب سرچ انجن گوگل نا پڑ آن براہوئی زبان نا کیبورڈ ءِ درستی راستی کرفنگ یخین اٹ نن کن بھلو حوال اسے۔ دا رد اٹ گوگل براہوئی زبان کن کاریم اٹ اتنگوک ”عربی“ نسخ، و ”لیٹن“ رومن ہڑتوم آ کیبورڈ آتے اوار کرینے۔ و رومن کن ہمو نشان تے مونی اتنگانے، ہرافک براہوئی ادبی بورڈ و ”تلار“ نا اواری اٹ جوڑ کننگاسر، و اوفتے ”تلار“ نوشتئی رواج تسوسس۔ جی بورڈ نا ایپلی کیشن ءِ موبائل اٹ انسٹال کننگ آن پد زی آ تروک مسہ ٹِک آ کلک کننگے، یا گڑا شیف تروک ایموجی نا بٹن ءِ زرس جاگہ تننگے تو گڑا سیٹنگ نا بٹن خننگک، داڑا کلک کننگے تو کل آن بڑز لینگوئج (Language) نا بٹن پاش کیک، اودے کلک کننگے، ولدا شیف ایڈ کیبورڈ (Add Keyboard) نا بٹن آ کلک کننگے، و زی آ سرچ بار اٹی نوشتہ کننگ پٹنگ نا کمک اٹ یا گڑا اسکرول کرسا براہوئی زبان آ کلک کننگے، اوڑے اِرا آپشن بریرہ، اسٹ عربک ایلو لیٹن اکن ءِ، اوفتیان اسٹ ءِ پک کرسا شیف ڈن (Done) انا بٹن آ کلک کننگے، و اگہ کس اس ہڑتوم آ وڑ تے پک کننگ خواہک تو ارٹمیکو وار ولدا ہندا پراسس ءِ کے، و ولدا ارٹمیکو وڑ ءِ پک کے، براہوئی کیبورڈ گچین کروک زبان تیٹی اوار مریک۔ ولدا اونا کمک اٹ براہوئی زبان نا کل توار تے نوشتہ کننگ کن آسانی مریک۔

ہفتئی تلار
تاک:48
24-18 دسمبر 2021ء
پنہ: 01