عبدالقیوم بیدار نا ایم فل مقالہ ”براہوئی نسائی ادب کا تحقیقی و تنقیدی مطالعہ“ نا تنقیدی جاچ               2

ہرا کتاب آ ہیت مننگ اٹی ءِ، داٹی بیرہ ہندن ءُ ہشت نیاڑی تا ذکر ساڑی ءِ، ہرافک کہ مہالو نا کتاب اٹی ساڑی الوسہ۔ دافتے ٹی آئی کزبانو، نیلم مومل، جہاں آرا تبسم، غلام صغریٰ تراب براہوئی، ثریا حسن، زیب النسائ، سمیہ مینگل و کلثوم مینگل اسک اوار ءُ۔ وخت اس کہ 56 نیاڑی تا درستی راستی ساڑی اف ہرا کہ مہالو نا کتاب ”نیاڑی تا ادب“ اٹی ساڑی ئسُّر۔ اوفتے ٹی بی بی در، بی بی زلیخائ، پروین باجوئی، ثمینہ اعظم، جمیلہ شاہین، جہاں آرا بگٹی، خالدہ حسن، خدیجہ نور، ذکیہ بلوچ، رضیہ بلوچ، روبینہ ناز براہوئی، سعدیہ کامریڈ، سونیا حیدر، شبنم امین، شکیلہ جبین، شہربانو بنگلزئی، صالحہ ساعی مینگل، صائمہ بلوچ، صائمہ ساتکزئی، صدف سعدیہ، صفیہ مینگل، فریدہ بنگلزئی، فوزیہ سلطان مینگل، فضیلہ رئیسانی، قمر النساءناز، گوہر ملک مینگل، ماہین غلام رسول، مہر گل، مہرین لہڑی، نائلہ جبین شاہوانی، نزہت عاصمہ، نصرت ناز، یاسمین بنگلزئی، آسیہ بتول، آسیہ بی بی، ارم ناز، حاجرہ مینگل، خان بی بی، خیر النسائ، رخسانہ گلشن، رضوانہ انجم، شازیہ گل، زینت گل رودینی، ڈاکٹر سلمیٰ عزیز، شرف بی بی، صائمہ بادینی، عابدہ اعظم، عابدہ منیر مہک، ڈاکٹر فرزانہ امیر براہوئی، فریدہ سحر، گنج بی بی، مہر گل، نازیہ گل، نرگس مینگل، نصرت شاہین، نصیباں بی بی و نعیمہ عزیز۔

سما اف کہ دا نیاڑیک ادبی لحاظ اٹ دا لائخ الوسہ کہ اوفتا ذکر ایم فل نا مقالہ ٹی ساڑی کننگاکہ۔ یا فاضل ایم فل اسکالر نا تحقیق نزور مسُّنے۔ اگہ دا ہیت مرے تو گڑا فاضل ایم فل اسکالر ہمے تم کہ تینا کتاب ”نیاڑی تا ادب“ ءِ نوشتہ کرے امر دالائخ ئسر کہ اوفتا تذکرہ ہمے کتاب اٹی مس ہنا۔

گڑاس نیاڑی تا بارو اٹ معلومداری تے ٹی ہم مچٹ بھاز شیف بڑزی ارے، دُن کہ لعل بانو نا تاریخ پیدائش ”نیاڑی تا ادب“ اٹی 1964ءوخت اس کہ ”براہوئی نسائی ادب کا تحقیقی و تنقیدی مطالعہ“ ٹی 1946ءلکھوک ءِ۔ ڈاکٹر عنبرین مینگل نا تاریخ پیدائش ”نیاڑی تا ادب“ اٹی 13 اگست 1973ءءِ، وخت اس کہ ”براہوئی نسائی ادب کا تحقیقی و تنقیدی جائزہ“ ٹی 13 اگست 1977ءلکھوک ءِ۔ حالانکہ ”نیاڑی تا ادب“ اٹی نوشتہ مروک آ تاریخ پیدائش درست ءِ۔ سما اف کہ انتئے فاضل ایم فل اسکالر درست اِنگا تاریخ پیدائش ءِ بے چکار کرسا غلط اِنگا تاریخ پیدائش ءِ لکھانے۔ زاہدہ نذیر براہوئی نا تاریخ پیدائش ”نیاڑی تا ادب“ اٹی 25 جون 1980ءءِ، وخت اس کہ ”براہوئی نسائی ادب کا تحقیقی و تنقیدی جائزہ“ ٹی 25 جون 1981ءءِ۔ یات مرے کہ زاہدہ نذیر براہوئی نا ایڑھ جمیلہ نذیر براہوئی نا تاریخ پیدائش ”نیاڑی تا ادب“ اٹی 15 جولائی 1981ءءِ۔ داکان پاش دا مریک کہ زاہدہ نذیر براہوئی نا تاریخ پیدائش ہمو ”نیاڑی تا ادب“ اٹی لکھکوک ءِ، یعنی 25 جون 1980ءدرست ءِ۔ ولے فریشانی دا ہیت آمریک کہ ”براہوئی نسائی ادب کا تحقیقی و تنقید ی مطالعہ“ فاضل ایم فل اسکالر نا ارٹمیکو تحقیق ءِ، باید ئس کہ درست مسَّکہ۔ ولے داڑان اونا اولیکو تحقیق درست ءِ۔ ارٹمیکو تحقیق ہرا کہ باقاعدہ ڈگری دوئی کننگ کن کننگانے داٹی غلطیک زیات ءُ۔ ہندن مائی تاج بانو نا مدرسہ نا پن ءِ ”نیاڑی تا ادب“ اٹی ”مدرسہ حفعہ ملیہ البنات“ نوشتہ ءِ۔ وخت اس کہ ”براہوئی نسائی ادب کا تحقیقی و تنقیدی مطالعہ“ ٹی ”مدرسة البنات الحفصہ“ نوشتہ ءِ۔

”براہوئی نسائی ادب کا تحقیقی و تنقیدی مطالعہ“ نا قدیم ادب اٹی مسہ نثر نگار و مسہ شاعر نا ذکر ءِ۔ براہوئی جدید ادب اٹی 48 شاعر و 38 نثرنگار آتا ذکر ساڑی ءِ۔

”براہوئی نسائی ادب کا تحقیقی و تنقیدی مطالعہ“ ٹی 92نرینہ نا ذکر،و 42 نیاڑی نا ذکر ساڑی ءِ۔ دا رد اٹ اگہ نن ہُرن تو نرینہ غاتا تناسب 38.64% نیاڑی تا تناسب 35.36% مریک۔ گڑا نن امر پاننگ کینہ کہ فاضل ایم فل اسکالر تینا سرحال تون انصاف کرینے؟

دا ایم فل مقالہ ”براہوئی نسائی ادب کا تحقیقی و تنقیدی مطالعہ“ دُن ءُ جامعہ ءُ پٹ و پول (تحقیق) اس اف ولے مہالو نا کتاب ”نیاڑی تا ادب“ نا ترجمہ اس لگک، نئے کہ فوٹو اسٹیٹ کاپی اس۔ ترجمہ داخاطر آن لگپک کہ ”نیاڑی تا ادب“ اٹی بیرہ نیاڑی تا تذکرہ ساڑی ءِ، وخت اس کہ ”براہوئی نسائی ادب کا تحقیقی و تنقیدی مطالعہ“ ٹی نیاڑی تےان زیات نرینہ غاتا تذکرہ ساڑی ءِ۔ ہندا سوب آن دا فوٹو اسٹیٹ کاپی اس ہم پاننگپک۔

خواجہ عبدالقیوم بیدار نا ایم فل مقالہ ”براہوئی نسائی ادب کا تحقیقی و تنقیدی مطالعہ“ غا کنا اسہ اسُل سطحی ءُ اعتراض اس او ہم ادبی آخا بلکن غیر ادبی دا مننگ کیک۔ او دا کہ خواجہ عبدالقیوم بیدار نن کل اکن بھاز قابل احترام ءِ، و کتاب شینک کننگ نا باندات اسہ صاحب حیثیت ءُ خواجہ اسے۔ او تینٹ اسہ اشاعتی ادارہ یعنی براہوئی ادبی سوسائٹی نا چیئرمین او ہم سدابہار چیئرمین ءِ۔ہرا وخت کہ دا کتاب شینک مس ہمو وخت بیدار صاحب پاکستان ٹیلی وژن اٹی گروپ 9 اٹی ئس۔ اونا اسہ تنخواہ غان دُن ءُ اِرا یا مسہ کتاب شینک مننگ کریرہ۔ نوکری آن پد اونا اسہ توُ انا پنشن آن داکان بھلو کتاب اس شینک مننگ کیک۔ ولے دا کتاب ءِ براہوئی اکیڈمی نا خڑچ اٹ شینک کرسا اسہ پین غریب ءُ براہوئی قلم کار اسے نا حق تلفی کننگانے۔ داڑکن براہوئی اکیڈمی نا کمامدار آتے و خواجہ عبدالقیوم بیدار ءِ تینٹ ہم احساس مننگ المی ئس کہ سَد آتےا حساب اٹ ہندن ءُ براہوئی نوشتکار اریر ہرافتے تینٹ تینا کتاب آتے شینک کننگ نا وس اف۔ باید ئس کہ دانا جاگہ غا اسہ آب اٹو کتاب اس شینک مسکہ۔

ہفتئی تلار،

تاک25

27 June 2020

پنہ، 5