براہوئی افسانہ نا ردوم (1)

ایلوزبان، خاص وڑ اٹ انگریزی ٹی افسانہ بھاز مہالو آن ساڑی ئس، اُردو ٹی زرس پد وبراہوئی ادب اٹی افسانہ 1960ء نا دوروباری ٹی ہموتم درستی مس ہراوخت کہ داڑے پریس نا بنا مسوسس، ہمودے تیٹ براہوئی ٹی اولیکو افسانہ ”مسافر“ نا پن اٹی ہیبت خان پنی آ نوشتکار نا قلم آن 1956ء اٹی شینک مس۔ ولے داکان مُست ننا خلقی ادب اٹی کسہ ساڑی ئس۔ چاہندار آک پارہ کہ اصل اٹ افسانہ ہمو متکن آ خلقی کسہ نا پوسکن آ دروشم ءِ وخت اس کہ ناول خلقی کسہ غاتیٹ مرغن آ کسہ ہرادے داستان پارہ ہموداستان نا پوسکن آ دروشم ءِ۔

ہرا وخت انگریز داڑے بلوچستان اٹی کوزہ گیر مس تو اوتینا سیاسی فائدہ، تینا کوزہ گیری ءِ تالان کننگ کن لٹریچر آن بھاز کاریم ہلک، داخاطر اوفک تینا مشنری ٹی ترندی اتنگ کن پریس، کتاب واسکولنگ سسٹم ءِ مون مستی اتسا خاص وڑ اٹ پرنٹ میڈیانا چرجوئی اس ہم بنا کریر۔

انگریز آتا لٹریچر ننا مخلوق نا اسہ تپہ اسے خواننگ نا پارہ غا چِکّا، انتئے کہ مہالو ننا مخلوق اوخہ در خوانندہ الو، پاوال اٹی رہینگاکہ۔ بیرہ منہ بندغ ءِ دینی تعلیم ئس، ہرافک کہ مدرسہ خواناسُر، ولے او وخت مدرسہ غاک ہم داخس زیات الوسہ۔ بیرہ اسہ مدرسہ اسے نا حوالہ مون آ بریک، او ”مکتبہ درخانی“ ئس۔ ہراٹی براہوئی و بلوچی زبان اٹی دین داری مذہبی لٹریچر ءِ خواننگ و لکھنگ کن مکتبہ نا عالم آک جہد اس کریر۔

گڑا انگریز نا اتوک آ لٹریچر آن پد داڑے تعلیمی ادارہ غاتا بنداو و میڈیا نا شینکاری آن ننا مخلوق اٹی پوسکن آ دور انا شینک مروک آ ادب ءِ خواننگ نا رحجان اس تالان مس، ہراٹی افسانہ و ناول سرِفہرست ءُ۔ براہوئی ٹی اولیکو افسانہ، ہیبت خان نا ”مسافر“ آن پد بھلو وخت اس افسانہ نوشتہ کننگ نا رد اٹ براہوئی ادب و قلمکار آتے ٹی چُپّی اس خننگک، و ہیبت خان پنی آ دا نوشتکار نا افسانہ نگاری ہم اسہ سوالیہ نشان اس مریک کہ دا بندغ انتئے بیرہ اسہ افسانہ اس براہوئی ٹی لکھا؟ افسانہ ”مسافر“ بھاز گچین ءُ سرحال اسے آ تالان ءِ، و اوٹی افسانویت ہم گچین ءِ، اونا کرافٹ ہم سوگو ءِ۔ ولے کنا جند ءِ تینٹ شک ہرفک کہ براہوئی نا دا اولیکو افسانہ ”مسافر“ بلوچی زبان آن براہوئی ٹی مَٹ مروک ءُ افسانہ اس مف؟ انتئے کہ ہمو دورباری ٹی شیر محمد مری ہراکہ جنرل شیروف مری نا پن اٹ پنی ءِ، بلوچی ٹی اولیکو وار ہراڈول افسانہ ءِ درستی راستی کرے براہوئی نا اولیکو جار مون آ بروک آ افسانہ ”مسافر“ شیروف مری نا افسانہ غاتا وڑ اٹی ءِ۔ 

پدا ننے براہوئی ٹی گڑاس پین ہندن ءُ افسانہ ڈاکٹرعبدالرحمن براہوئی نا مرتب کروک آ ”مستائی، ٹیکی وتوشہ“ پنی کتاب آتیٹ نظر بریرہ، ہرا خواجہ غاتا منہ افسانہ غان بیدس نن دافتا پین افسانہ ولدا خنپنہ او نوشتکار آتے ٹی پروفیسر نادرقمبرانی، غلام نبی راہی، دوست محمد دوست، گل بنگلزئی، عبدالحق محمد شہی، بابوعبدالرحمن کرد، اخترندیم، رئیس نبی داد، امیرالملک مینگل وگڑاس پین اوار ءُ۔ دا افسانہ غاتا بھلا کچ بنائی وڑ اٹ ماہتاک بلوچی ٹی لگا، و اوکان پد ہمو زمانہ نا رسالہ غاتیٹ شینک ہم مسر۔

دا شرفمند آک ولدا شاعری نا پارہ غا زیات چکار کریر۔ مننگ کیک او وخت بیرہ اسہ جوزہ اسے نا رد اٹ افسانہ لکھار، تاکہ ایلو زبان تیٹ براہوئی ٹی افسانہ نگاری نا حوالہ ئس مونی برے۔ ولدا براہوئی ٹی پوسکن عالم فاضل (ڈگری) نا خواننگ و امتحان تا بنا ہم ہندا دور اٹ مسوسس تو کورس انا خاطر ہم داوڑ انا نوشت آتا گرج ئس، مطلب داکہ گرج انا رد اٹ لکھار ولدا شاعری کریر۔

دا رد اٹ اگہ نن کتابی مجموعہ غاتا پڑ آ برین ہُرن تو براہوئی ادب اٹی ”افسانہ“ نا باقاعدہ 1980ء آن پد درستی راستی مریک۔ کہ1982ء اٹی ڈاکٹرتاج رئیسانی نا افسانہ غاتا مجموعہ ”انجیر نا پھل“ قلات پبلشرز و پدا گل بنگلزئی نا ”دڑد آتا گواچی“ 1984ء اٹی قلات پبلشرز، و ہندن عارف ضیاء نا ”زراب“ نا پن اٹ کتاب آک مونی بسر۔

ڈاکٹر تاج رئیسانی نا افسانہ غاک فنی وفکری حوالہ غا بھاز سوبر و بھاز گچین ءُ افسانہ ءُ۔ ولے سوج دا ودی مریک کہ ڈاکٹر تاج رئیسانی نا داکان گُڈ ہچ ءُ افسانہ اس داسکان انتئے شینک متو، مون آ بتو؟ (دا زوت آتیٹ ڈاکٹر تاج نا اسہ افسانہ اس فیس بُک آ شینک مس ولے اوٹی کسہ، پلاٹ وکڑدارآن زیات براہوئی نا متکن آ لوز آتے پٹ وپول کرسا اتنگ آ زیات چکار کننگاسس)

ہنداسوج گل بنگلزئی صاحب نا افسانہ نگاری نا رد اٹ ہم ارے کہ گل صاحب نا ہم پین افسانہ ننے نظر بفک کہ داکان پد گل بنگلزئی براہوئی ٹی ایلو زبان تیان مٹ وبدل نا پارہ غا زیات مون کرے۔

کناگمان ہندن ءِ کہ ننا گچین آ افسانہ نگار ”ڈاکٹرتاج رئیسانی“ ءِ براہوئی ٹی خوانندہ ولدا نقاد آتا پارہ غان جوان ءُ رسپانس رسینگپک تو او افسانہ لکھنگ ءِ الک۔ نقاد تو داسکان نن تون اف و نقاد مفننگ نا سوب آن ننا تخلیق آتیٹ ردوم اوڈول بننگ اف ہراوڑ بروئی ئس۔ دن تو ڈاکٹرمنظور بلوچ براہوئی نا ہندا منہ افسانہ نگار ”ڈاکٹر تاج‘ گل بنگلزئی، وحید زہیر، عارف ضیاء‘ اس تیا گڑاس لکھانے، ولے منظور بلوچ نا تنقید او پیمانہ غا اف، ہراوڑ کہ تنقید ءِ مروئی ءِ، دُن کہ اُردو ٹی شمس الرحمان فاروقی نا تنقیدی نوشت آک ءُ، ہندا ڈول عارف ضیا براہوئی جدید نثر پنی آ کتاب اٹی گڑاس افسانہ نگار آتا تنقیدی جاچ ءِ ہلکنے، ولے بھاز گونڈ۔ وخت اس کہ پروفیسر عامر فیاض براہوئی افسانہ غاتے گچین کرسا اسہ کتاب اس ”کنا گچین آ افسانہ“ نا پن اٹی براہوئی ادبی سوسائٹی آن شینک کرے، ولے داٹی افسانہ غاتا تنقیدی جاچ ساڑی اف۔

براہوئی افسانہ نگار آتا ارٹمی پدریچ وارٹمی دورباری ٹی ڈاکٹر تاج رئیسانی اس تیان گڈ عارف ضیاء، وحید زہیر، آمنہ یوسف موج، ڈاکٹرنصیر عاقل اس تا پنک بریرہ ہرافتا افسانوی مجموعہ غاک ہم شینک مسنو۔

ڈاکٹر تاج آن گڈ براہوئی ٹی وحید زہیر ہمو افسانہ نگار ءِ ہرا براہوئی افسانہ ءِ گچین ءُ وڑ اسے ٹی براہوئی ادبی تپہ غاتیٹ درستی راستی کرے، ہرادے نن براہوئی افسانہ نگاری نا پڑ آ بروک آ پدریچ اکن اسہ راہبلد اسے نا وڑ تکنہ۔

دا وخت اسکان وحید زہیر نامُسہ افسانوی مجموعہ شینک مسنو، ہرافتیٹ ”شنزہ 1987ء، مہر انا توش1999ء، بروے، 2002ء اوار ءُ۔ ہرافک براہوئی ادبی سوسائٹی کوئٹہ نا پارہ غان شینک مسنو۔

’عارف ضیاء‘ ہم براہوئی افسانوی ادب اٹی اسہ گچین ءُ تخلیق کار اسے کہ افسانہ غان بیدس ناول و ڈرامہ ہم لکھانے، عارف ضیاء نا افسانہ غاتا اولیکو کتاب ’1984ء‘ اٹی ”زراب“ ناپن اٹی براہوئی ادبی سوسائٹی نا پارہ غان شینک مس، وخت اس کہ 1995ء اٹی گودی آمنہ یوسف موج نا افسانہ غاتا مجموعہ ”بندوک“ نا پن اٹی براہوئی ادبی سوسائٹی ناپارہ غان شینک مسنے۔

اسہ پین عجیب ءُ ہیت اس دا پٹ وپول نا رداٹ کنا مون آ بس کہ 1987ء آن پد پنچ سال اسکان براہوئی ٹی افسانہ غاتا ہچ ءُ کتاب اس اف کہ ڈاکٹر نصیر عاقل نا افسانوی مجموعہ ”پرو مازو، 1992 و پدا 1999ء ٹی وحید زہیر نا ”مہر انا توش“ شینک مسنے۔ 

براہوئی نا بنائی افسانہ غاک خاص وڑ اٹ ڈاکٹرتاج رئیسانی نا افسانہ غاتیٹ تکنیک و سرحال نا حوالہ غا گچینی اس دُن خننگک کہ اونا افسانہ غاتے ٹی علامت نگاری و تجریدی وڑ انا رنگ آک ہم چٹ ہلوک خننگرہ۔ ہندن ڈاکٹرتاج افسانہ نا غٹ خواست آتے پیدوار کرسا تینا تخلیق اٹی سرسہب خننگک۔ وخت اس کہ گل بنگلزئی نا افسانہ غاتیٹ روایتی دروشم زیات خننگک، ہرافک پاوال وننا قبائلی سسٹم، رسم ورواج آتا بارو اٹی ءُ۔

ہمو دور انا ہرابنائی نوشتکار اِرا افسانہ نگار امیر الملک مینگل و پروفیسر نادرقمبرانی نا ذکر ءِ کریٹ، دافتا افسانہ غاتیٹ غیرت نا پن آ نیاڑی نا کسفنگ نا فرسودہ انگا رسم ورواج نا مزاحمت خننگک، و داڑے روشن خیالی وترقی پسندی نا کلہو اس تننگانے۔ 

دا گچین ءُ گپ اسے کہ ننا افسانہ غاک بنا غان ہلیس اینو اسکان گیشتری ترقی پسند سوچ ءِ مون آ ایسنو بھاز کم افسانہ نگار آتیٹ رجعت پسندانہ سوچ خننگو۔ سوب دادے کہ افسانہ لکھوک آک ہرا لٹریچر ءِ خوانار او ترقی پسند ادبی تحریک آن شینک مروک ئس، ایہن ہم جہانی ادبی پڑ آ اگہ نن افسانہ ءِ ہُرنہ تو دادے ترقی پسند نوشتکار آک زیات مون آ ایسر، و پرموٹ کریر۔ ہرا روایتی نوشت آن بھاز مونی گچین و اکیڈمک اپروچ تخوک ءُ نوشتکار ئسُر۔ اوفتیٹ سعادت حسن منٹو، کرشن چندر، بلراج منرہ، عصمت چغتائی، راجندرسنگھ بیدی، رشید امجد، بانوقدسیہ، انتظارحسین، شمس الرحمان فارقی، مستنصرحسین تارڑ و پین بے کچ افسانہ نگار اُردوادب آن ساڑی ئسُر۔ وخت اس کہ دافتیان بیدس ننا بنائی افسانہ نگار آک سوویت یونین نا گچین آ قلمکار آتا لٹریچر نا خوانوک مسنو، ہرافتا رنگ واثر ننے دافتا افسانہ غاتیان نظر بریک۔ و دا فکری آ اثر ننے دا اینو نا پدریچ نا افسانہ نگار آتیٹ ہم نظربریک۔ ہراکہ براہوئی افسانہ نا فکری ردوم پاننگک کہ براہوئی افسانہ نگاری ٹی نئے بیرہ فنی بلکن فکری پڑ آ ہردوراٹ بدلی بسنے ہراکہ براہوئی افسانہ نا زندومان، جانداری وشانداری نا اولیکو نشانی ءِ۔ داخاطر کہ ارتقاء ٹی اگہ گچینی بتو توآخبتی بدصورتی ہنپک۔ ولے براہوئی نا افسانہ ناول نا نسبت جوانتری وگچینی نا پارہ غا راہی روان ءِ کہ جہانی پڑ آ ننے ہراحالیت آک راجی وسیاسی حوالہ غا ہرا ڈول بدل مروک نظربریرہ ہمو ڈول ننے تینا افسانہ نگار آتا افسانہ غاتا سرحال آک ہم نظربریرہ وبراہوئی افسانہ خاص وڑ اٹ 2000آن گڈ اسہ گچین ءُ ردوم اسے تون مون مستی برجا ءِ۔

2000ء آن پد جہانی سیاسی حالیت آک 9/11 آن گڈ جتاءُ دروشم اس دوئی کریر، پدا داڑے 2006ء آن اسہ مارشل لاء اسے نا خراب ءُ دوراس ننا ڈیہہ وہنکین آن گدارا، ہرانا اثر نئے بیرہ ننا راج آتما بلکن ننا زند انا ہر بشخ ءِ زبان وادب، ثقافت، تعلیم، نفسیات ومعیشت ءِ ہم بھاز متاثر کرے، تو دا اثر ننے ننا افسانہ نگارنا افسانہ غاتیٹ ہم نظربننگ ءِ۔

اگہ نن تینا گودی ’ڈاکٹرعنبرین مینگل (2009ء) ناشینک مروک افسانہ غاتا کتاب ”سہب انا مزل مُراف“ ءِ خوانن تو داٹی بھاز آ افسانہ غاک ہندا حالیت آتا تناظر اٹی لکھوک ءُ۔ ہندا وڑ انا سرحال آک ننے سنگت ”حسن ناصر“ نا ہم افسانہ غاتیٹ جابجا نظربریرہ۔ وخت اس کہ داکان مُست ہراتم 28مئی 1998ء اٹی راسکوہ (چاگئے، خاران) نا مَش اٹی ہرا ایٹمی تراک مس تو دادے ہم ننا نوشتکار آک دوست توتوس، شاعرک تو بھاز لکھار ولے ننے دا سرحال آ براہوئی ٹی افسانہ غاک ہم نظربریرہ۔ ہرافتیٹ عابدعابدی نا ”بدرنگ‘و رحیم زام نا ”راسکونا ہسک“ قابل ذکر ءُ افسانہ ءُ۔

دافتیان بیدس، ننے تیویٰ جہان اٹی استعماری و سامراجی زوراک آتا کنڈ آن نزور آ ملک آتیٹ ’Proxy war‘ نا دروشم اٹ جنگ آتا اسہ پوسکن ءُ دروشم اس نظر بریک، ہرافک لکھ آ انسان تا ساہ ءِ ہلکنو، کروڑ آ بندغ آتے بے اُرا کرینو، خاص وڑ اٹ نیامی ایشیاء عرب ملک آتیٹ شام، عراق، یمن، لیبیا پدا اوغانستان اٹی امریکہ کون آ سامراج آک تینا چم بازی تیٹ جنگ آتے چست کرسا انسانی خلقت اٹی بیرانی تے تالان کرینو، ہرافتا مسخت تینا سلہہ غاتا بہا کننگ وقدرتی آ مڈی تیا کوزہ گیری ءِ۔ دا Proxy war آن ننا ڈیہہ وہنکین ہم تو بھاز متاثر مسنے و دا سرحال آ ہم اینو نا ننا افسانہ نگار آتا چندی افسانہ غاک نوشتہ مسنو۔

وخت اس کہ ننا نوشتکار و افسانہ نگار آک اینو نا دورباری ٹی نفسیاتی، جنسی، صنفی سرحال آتیا ہم گچینی ٹی لکھنگ ءُ۔

ہفتئی تلار
تاک: 45
21-27 November, 2020
پنہ: 08