بلاول والا سلہ ننے ہم خلنگاسس، نن منتون، مولانا فضل الرحمن

ایبٹ آباد: جمعیت علمائے اسلام و اپوزیشن سیوت پاکستان ڈیموکریٹک موومنٹ نا سروک مولانا فضل الرحمن حکومت ءِ شیف خلسا پارینے کہ ملک اٹ جمہوریت اینو ہم یرغمال ءِ، نن تینا زرگزران نا سالانہ کساس ءِ زیرو آن ہم شیف درینن،زرمبادلہ غاتیٹی ودکی نا ہیت آک دروغ ءُ۔او پی ڈی ایم نا پننگ نا زموار بلاول بھٹو زرداری ءِ گوندسا پارے کہ بلاول، حکومت و اسٹیبلشمنٹ تون بریکٹ مسنے، پوسکن ءُ میدان پاش کننگ خواپنہ، بلاول والا سلہ ننے ہم خلنگاسس، نن منتون، ننے بھاز آ گڑا تا سما ءِ بھاز گڑاک ننا نوٹس اٹ اریر، ولے نن پوسکن ءُ میدان پاش کننگ خواپنہ۔ اگہ نن میدان پاش کرین تو اسہ سیلہ اس ہم بچپک۔ حکومت پاکستان طالبان حکومت ءِ امنا کے۔ دا ہیت آتا درشانی ءِ او ایبٹ آباد اٹی جلسہ غان تران و اسہ نجی ٹی وی اسے تون ہیت و گپ کرسا کرے۔ مولانا فضل الرحمٰن پارے کہ قوم فریشان ءِ کہ ہراڑے قوم آک شون ہلنگ و مونی ہننگ ءُ، نن پین پد تمنگ اٹی اُن، ہراڑے شونداری نا ستا کننگ انگ ءِ، اوڑے زی آ ہننگ نا جاگہ غا نن شیف ہننگ اُن، ننا بھلاک پارلیمانی سیاست نا کمک اٹ آئین ٹہیفنگ نا بابت ہرا سرسہبی تے دوئی کریسر، اینو دا سرسہبی تے بے سہبی اٹ بدل کننگ نا ڈٹ ڈَول سجفنگ انگ ءِ، نن ہراتم ملک جوڑ کرین، تو مسہ سُج ئسرہ، لاالہ اللہ نا نعرہ خلسا نن تینا قوم ءِ دا نظریہ تسن، کہ دا ملک اسلام کن جوڑ مریک، و داڑے اسلام نا حاکمیت مریک، او پارے کہ انگریز آتیان آجوئی دوئی کننگ نا مسکت ہندا ئس کہ داسہ نن مے مفک۔ و داڑے جمہوریت مرے، و نن جمہوری آجوئی نا چاگڑد اٹی تینا فیصلہ غاتے کین، مولانا فضل الرحمٰن نا پاننگ ئس کہ ہندو تیان جتا مننگ نا فلسفہ ٹی دا پاننگا کہ ننا زرگزران آجو مریک، و نن تینا ملک انا وسیلہ غاتا خواجہ تینٹ مریرنہ، ولے ہرافتا اومیت اسلام تون گنڈوک ئسکہ، اوفتا اومیت آک ہم مونجائی اٹ بدل مسر، اونا پاننگ ئس کہ ہرافک دا وطن عزیز نا آجوئی کن قربانی تسر، و ملک اٹی اسہ جمہوری نظام اس اتنگ نا است خواہی کریر، اوفتیا ڈغار ءِ تین کننگا، دا ملک اٹی گیشتری حکومت آمر آک کریر و جمہوریت اینو ہم یرغمال ءِ۔

(آن لائن)