کورونا وائرس نا برخلاف پاکستان نا سرسہب آ حکمت عملی نا ستا مننگ ءِ‘ثانیہ نشتر
Get real time updates directly on you device, subscribe now.
اسلام آباد(آن لائن)کامسیٹس و دولت مشترکہ نا مرکز برائے ڈیجیٹل جانجوڑی (سی ڈبلیو سی ڈی ایچ) نا اواری نا کمک اٹ اڈ ہلوک اسہ دے ئی ویب نار آن تران کرسا وزیر اعظم نا خصوصی کمکار راجی رکھ ڈاکٹر ثانیہ نشتر پارینے کہ سویلی ایشیائی خطہ ٹی پاکستان کورونا وائرس نا ہلوک آ دَین آ وخت آ کنٹرول کننگ کن ہرا سرسہب آ حکمت عملی ءِ دوئی کرے، اینو اوفتا مچ آ دنیا ٹی ستا ءِ کننگ انگ ءِ و دانا جتا جتا پلو آتیا جانجوڑی و راجی رکھ انا جہانی ماہرک سوچ خلنگ ءِ بنا کرینو۔ ڈیجیٹل ہیلتھ اِن کوویڈ 19، ویب نار اٹ کامسیٹس نا سویلی ایشین باسک ملک آک تینا آزموندہ غاتے اسہ ایلو تون شیئر کریر، دا ملک آتیٹی بنگلہ دیش و سری لنکا نا ماہرک اوار ئسر۔ ویب نار اٹی کوویڈ 19 نا ردعمل اٹ سرکاری و ادارہ جاتی آزموندہ غاتے موضوع بحث جور کننگاسُس۔ دا ویب نار نا کمک اٹ ہراڑے بنگلہ دیش،سری لنکا و پاکستان اٹ کوویڈ 19 نا بابت ڈیجیٹل ہیلتھ اٹ برجا انگا گام گیج و آزموندہ غاتے پہہ مننگ و سمجھنگ اٹ کمک رسینگا تو اوڑے ڈیجیٹل ہیلتھ تون گنڈوک شریک آتے دوئی ویل آک ہم پاش مسر۔ دا ویب نار دود اٹ پاکستان و پیشن ملک نا بابت بندغ آتا اسہ بھلو کچ اس بشخ ہلک۔ تینا خطبہ استقبالیہ ٹی کامسیٹس نا ایگزیکٹو ڈائریکٹر ڈاکٹر ایس ایم جنید زیدی کامن ویلتھ سینٹربرائے ڈیجیٹل ہیلتھ (سی ڈبلیو سی ڈی ایچ) کیڈاکٹر واجیرا ڈساناائیک نا کماشی ٹی ویب نار ءِ اواری ٹی منظم کننگ آ اونا منتواری ءِ ہرفیر۔ اوفک سویلی سویل خطہ ٹی دا دَینی ناجوڑی تون مون تننگ کن ڈیجیٹل ہیلتھ ٹیکنالوجی نا بابت کاریم اٹ اتنگ کن اواری نا کوشست آتیا زور شاغسا پارے کہ جانجوڑی نا خیالداری نا نظام ءِ پین سوگو جوڑ کروئی مریک۔