حکومت کراچی نا بھسکاری آ ہم سیاست کننگ اٹی ءِ‘احسن اقبال

 اسلام آباد(آن لائن) مسلم لیگ ن نا سیکرٹری جنرل احسن اقبال پارینے کہ مروک آ پر تیان کراچی ٹی بھسکاری مسنے اُلس نا جان ومال نا نسخان مس حکومت کراچی نا بھسکاری آ سیاست کننگ اٹی ءِ ہراوڑ چیئرمین نیب نا کمک اٹ اپوزیشن نا برخلاف نیب گردی کرفنگا ہندن پنجاب نا ہر پُوسکن آ آئی جی ءِ پاننگک کہ مخالف آتے جوان تختہ کننگے پنجاب نا 5 آئی جی پی ٹی آئی نا ایجنڈا غا کاریم کننگ آن نمن مسر نن پنجاب پولیس نا ہمو پنچ افسر تے سلام پیش کینہ ہرافک ذاتی ایجنڈا غا کاریم کننگ آن نمن مسر، 20 ستمبر آ کل سیاسی جماعت آک  اے پی سی ٹی اوار مرسا آخبت نا لائحہ عمل نا پڑو ءِ کیرہ حکومت نا گام گیج آتا سوب آن کشمیر نا ویل نزور مس دا خیال آتا درشانی ءِ او اسلام آباد اٹ میڈیا تون ہیت وگپ کرسا کرے او دا ہم پارے کہ ننا خیال ئس کہ حکومت کل وسیلہ غاتے کراچی ءِ ایتک ولے او ہچ اس ہم کتو 21 آن 14 سیٹ  ہلک ولے بیرہ پنچ گھنٹہ کراچی ٹی مننگ آن پد وزیراعظم پدی بس حکومت کراچی نا بھسکاری نا زی آ ہم سیاست کننگ اٹی ءِ کروونا نا دَین اٹی ہم صوبائی حکومت تون محاذ آرائی کرے بنجائی وزیرک صوبائی حکومت تون جنگ و جھیڑہ کریر وزیراعظم کراچی ءِ ہرا 11 سد ارب نا پیکیج ءِ تس او ہم اسہ فرضی کاروائی اسے دا ڈٹ مالو ہم اوار ئس انت وزیر اعظم کراچی ٹی جانی و مالی نسخان نا پوروی کن گڑاس کرے یا پڑو اس کرے؟ ہرا جھیڑہ ءِ سندھ اٹ بنجائی حکومت کننگ اٹی ءِ داڑان حالیت آک پین خراب مریرہ، سندھ اٹ غریب بزغر تیکن ہچ ءُ کمکی پیکج اسے نا پڑو ءِ متو نمبر و کچ انا حساب کتاب ءِ کرسا بیرہ اُلس ءِ تسلی تننگ انگ ءِ بنجائی و صوبائی حکومت نا چٹ چکنگ نا سوب آن سندھ اٹ بدگمانی تالان مریک۔ آرمی چیف پارینے پاکستان ءِ ففتھ جنریشن وار مون تروک ءِ ففتھ جنریشن وار اٹ ملک انا تہٹی بدگمانی تالان کننگک، حکومتی پالسیک  پاکستان ءِ ہائبرڈ وار اٹ خسنگ اٹی ءُ نیب ءِ کاریم اٹ اتسا مخالف آتے دبائفنگ انگ ءِ ہرا پُوسکن آ افسر آئی جی نا عہدہ غا فائز مرے او نیب انا وڑ بدلہ ہلوک کارروائی کپک۔