کماش اسے نا کاریم انت مریک؟

دا سوج دا سوب آن کنا مزغ اٹی جاگہ کرے کہ ای مدام اخبار آتیٹی خوانوہ کہ اینو فلانی قبیلہ و فلانی قبیلہ نا نیام اٹی وخت اسے آن کش کنوک آ جھیڑہ نا خیر مس۔ داڑان بیدس وخت اس بنتنٹ کہ کماش آک مخلوق کن بلڈ بینک، گوازی نا میدان، پارک و لائبریری، سڑک، اسکول یا پین راجی آسراتی اسے کن مچی اس اڈ تسر۔ کماش اس دا رد اٹ لس مخلوق نا کماشی نا حق ءِ سر تس۔ بھلا کمال تو دادے کہ بلوچستان آن بیدس ملک انا ایلو صوبہ غاتا اخبار تیٹی مدام خوانوہ، خنوہ، مجال ءِ او اخبار تیٹی ہر اِرا دے آن گڈ اِرا قبیلہ یا ٹکر نا نیام اٹ مروک آ خیر انا خبر اس مرے۔ اوڑے ہم جھیڑہ غاک مرور، ولے میڑھ و مرکہ نا رواج اخباری اف، نئے دن ءُ کش و بگیر اس مخلوق اٹی ارے، کہ خاہوت آتا خاہوت آک اوٹی اوار ءُ۔ یا تو اوڑے کانود نا عملداری زیات ءِ۔ یا مخلوق اتون چنکو جھیڑہ اسے کش تننگ کن وخت اف، یا گڑا او جاگہ نا اخبار آتے کن دن انگا خبر آک خبر اس افس کہ جھیڑہ اس مس، و خیر مس۔ انت دن انگا خبر آتیان دا معلوم مفک کہ داڑے کل قبیلہ غاتیٹی مدام جھیڑہ غاک برجا ءُ۔ کنا خیال ءِ ہندا خبر آک شونداری نا ڈٹ ڈَول آتے اڈ تروک آتے کن جوان ءُ بہانہ مننگ کیرہ۔ ہرا علاقہ ءِ شون تننگ کن ڈٹ ڈَول اسے نا گرج آ ہیت مرو ءِ، بد خواہک ہندا بہانہ ءِ کرور کہ نن تو اوڑے دا کاریم ءِ کننگ کپنہ کہ اوڑے تو فلانی فلانی قبیلہ نا نیام اٹی مست آن دیر انا زی آ، سڑک نا زی آ، اسکول اسے نا یا پین ہیت اسے آ کش و بگیر مننگ اٹی ءِ۔ دا ہیت ہم راست ءِ کہ بھاز انگا علاقہ غاتیٹی منہ آمخ ءُ بندغ چندی شونداری نا ڈٹ ڈَول آتے تینا پارہ غا چکنگ کن ایلو جاگہ ٹی مروک آ شونداری نا ڈٹ ڈَول ءِ توررہ۔ باید تو دادے کہ اوفک تین کن جتا ءُ ڈٹ ڈَول اسے نا خواست ءِ کیر۔ تانکہ اسٹ ایلوڑکن رواداری نا جوزہ ءِ ودی کتنن، سرکار نا بہانہ مدام راست مرو ءِ۔ داٹی بے شک قصور وار پین کس مرے، ولے مگہ ننا چندی عمل آتیان اوفتا کاریم پین زیات آسان مفک؟ اوفتا بے شونی نا بہانہ پین زیات پک مفک؟ داسہ دنیا شون ہلکنے، وخت بھاز نہادی ءِ، اِرا بندغ نا جھیڑہ ءِ قوم آتا جھیڑہ پاننگ اینو نا وخت اٹی اسُل جوان اف۔ نئے جھیڑہ اسے بھاز مرغن کننگ جوان ءِ۔ اینو نا وخت و پاس اٹ خواننگ نا گو انا جوزہ ءِ ورنا تے ٹی ودی کروئی ءِ۔ علاقہ و لائخی نا بنداو آ کاریم روزگار کن اسٹ ایلو نا کمک ءِ کننگ کن مون آ بروئی ءِ۔ جوان ءُ سلاہ تروئی ءِ۔ تین پہ تینی ایلمی کروئی ءِ۔ تینا جوان انگا روایت آتے پاش کروئی ءِ۔ اینو نا وخت اسٹ ایلو نا است بڈی کننگ نا ءِ۔ وخت انا زیان آن کل ءِ توننگ نا ءِ۔ علمی بنداو آ گپ و تران نا ءِ۔ مری تے خڑکی ٹی بدل کننگ نا ءِ۔ آمخ آتا آمخی تیا مش شاغنگ نا ءِ، آسراتی تننگ آسراتی پٹنگ نا ءِ۔ علاقہ ٹی درخت بکار ءِ، درخت خلنگ نا ءِ۔ پر انا دیر ءِ زیان آن بچفنگ کن بند و تلاپ جوڑ کننگ نا ءِ۔ مالداری نا پوسکن آ گرج و ساہدار تا خوراک نا غم ءِ کننگ نا ءِ۔ ایلوفتا ڈری تے توننگ نا ءِ۔ زمانہ تون ہم گام مننگ نا ءِ۔ دنیا نا سیاست ءِ پہہ مننگ نا ءِ۔ اسٹ ایلو نا لائخی تے ٹی ہم کوپہ مننگ نا ءِ۔ چنا تے کن کمپیوٹر، لائبریری، تعلیمی ادارہ غاتا وسیلہ غاتے پٹنگ نا ءِ۔ زمانہ نا شیف بڑزی ءِ پہہ مننگ نا ءِ۔ دا قبائلی آ جھیڑہ غاتیان تینے مر تخنگ نا ءِ۔ ایلوفتے دافتا نسخان آن پہہ کننگ نا ءِ۔ دا قبائلی آ جھیڑہ غاک رند و لاشار نا جھیڑہ غان ہلیس اینو اسکان مروک آ جھیڑہ غاتسکان، بیدس قومی نسخان آن کس انا نف اکن متنو، نئے کس اس دافتیان نف خنانے۔ دافتیٹی ورناک بیران مریرہ۔ خاہوت آک بومبار مریرہ۔ علاقہ غاتا خرسی دا جھیڑہ غاتا سوب آن خر کیک۔ بے روزگاری ودک۔ اخبار تیٹی بروک آ دا خبر آتیان معلوم ہندن مریک کہ نن دنیا نا شون و شرحالی آن بے سما اُن۔ زند انا رفتار ءِ پہہ مفننگ اٹی اُن۔ گدرینگوک آ جھیڑہ غاتیان ہچ ءُ سبخ اس ہرفتنن۔ علم انا فیض ننے اسکان سر متنے۔ اُرا اُرا ٹی لگوک آ خاخر یا لگفوک آ خاخر انسانیت تون دشمنی آن بیدس ہچ اس اف۔ بایدے داسہ ہڑدے اخبار آتیٹی بروک آ قبائلی جھیڑہ غاتا خبر نا فیشن کٹے۔ دانا جاگہ غا شون و شرحالی و لس مخلوق نا جوانی کن کروک آ کاریمک خبر جوڑ مریر۔

ہفتئی تلار

22-28 August 2020

تاک: 33

پنہ : 1