خیبر پختونخوا ٹی اِرا جتا کارروائی، فتنۃ الخوارج نا 10خوارج خلنگار،آئی ایس پی آر

سیکورٹی فورس آک خیبر پختونخوا ٹی اِراجتا کارروائی تیٹی بھارت نا مخ تف فتنۃ الخوارج آن تعلقداردہ خوارج ءِ خلکر۔ جمعہ نادے آ پاک فوج انا شعبہ تعلقات عامہ (آئی ایس پی آر) نا کنڈآن جاری بیان نا رداٹ اولیکو کارروائی ٹی بھارتی پراکسی فتنۃ الخوارج آن تعلقدارخوارج آتا اسہ ٹولی اس ضلع سویلی وزیرستان نا علاقہ اعظم ورسک اٹی سیکورٹی فورس آتا چیک پوسٹ آتیا جلہو نا کوشست کرے، ہرادے سیکورٹی فورس آک وخت آ و گچین کارروائی نا کمک اٹ بے سہب کریر۔ اوکان پد اسہ ایلو آ سم کاری ٹی سیکورٹی فورس آتا درست و گچین ورندی کارروائی ٹی ہشت خوارج آتے دوزخی کننگا۔ ارٹمیکو کارروائی ضلع دیر اٹی کننگا، ہراڑے سیکورٹی فورس آک پین اِراخوارج ءِ خلکر۔ خلنگوک آ بھارت نا مخ تف خوارج آتیان بھلو کچ اسے سلہہ و گولہ بارود ہم دوئی مس۔ دا علاقہ ٹی چندی دہشت گرد کارروائی تازموار ئسر۔ علاقہ ٹی ساڑی ہر گمانی خارجی تا چٹفنگ کن کلیئرنس و سینیٹائزیشن آپریشن برجاءِ۔ آئی ایس پی آر پارینے کہ سیکورٹی فورس و پاکستان نا کانود نافذ کروک ادارہ غاک نیشنل ایکشن پلان نا منظور مروک آ وژن عزمِ استحکام نا رداٹ ملک آن درملکی کاٹم خواجہی و مخ تف دہشت گردی نا پورو چٹفنگ اسکان تینا بے فرق دہشت گردی تور مہم ءِ پورو طاقت اٹ برجاتخرہ۔وزیراعظم محمد شہباز شریف سویلی وزیرستان و ضلع دیر اٹی بھارتی مخ تف فتنۃ الخوارج نا 10 دہشت گرد آتے خلنگ آ سیکورٹی فورس آتے خراجِ تحسین پیش کرینے، جمعہ نادے آپی ایم آفس نا میڈیا ونگ آن جاری بیان نا رداٹ وزیراعظم پارے کہ قوم سیکورٹی فورس آتا بہادر ورناتاکسبی لائخی، جیرت و قربانی تیا گمرکیک، بھارتی کاٹم خواجہی ٹی دہشت گردی تالان کروک زموارآتا پراگندہ مسخت آتے بے سہب کننگک۔ وزیراعظم پارے کہ آپریشن “عزمِ استحکام” نا رداٹ دہشت گردی نا پورو چٹفنگ اسکان دہشت گرد آتا برخلاف کارروائی پبی عزم اتون برجاسلک، حکومت و مچ آ قوم دہشت گردی نا برخلاف جنگ اٹی تینا سیکورٹی فورس آتتون ہم کوپہ سلوک ءِ۔ صدرِ مملکت آصف علی زرداری سویلی وزیرستان و دیر اٹی فتنۃ الخوارج نا بھارتی کاٹم خواجہی ٹی کاریم کروک دہ دہشت گرد آتے خلنگ آ سیکورٹی فورس آتے خراجِ تحسین پیش کرینے۔ جمعہ نادے آایوانِ صدر نا پریس ونگ آن جاری بیان نا رداٹ صدرِ مملکت سویلی وزیرستان نا علاقہ اعظم ورسک اٹی فتنۃ الخوارج نا دہشت گرد آتا جلہو ءِ بے سہب کننگ آ سیکورٹی فورس آتا کسبی چاہنداری نا ستاءِ کرسا پارینے کہ قوم تینا بہادر سیکورٹی فورس و کانود نافذ کروک ادارہ غاتتون سلوک ءِ و دہشت گردی نا برخلاف اوفتا قربانی تے شرف ایتک۔ او پارے کہ بھارتی کاٹم خواجہی ٹی کاریم کروک دہشت گرد زموارآتا پراگندہ ارادہ غاتے امر کہ مرے بے سہب کننگک۔