چیہانٹ

۔(8 اگست نا سانحہ نا شہید آتا پن اٹ)

0

Get real time updates directly on you device, subscribe now.

نظم: نور خان نواب محمدحسنی

اے خدا

کنا شار دن بڑی بانگ ءِ انتئے؟

ہر خن خڑینک اٹ بارّسنے

ہر است مونجا ءِ انتئے؟

کنا شار انا دیوال و کسرک

انتئے دن مودہ کشانو

ہر در آ ملخموت گوئی کیک

کس اسے نا نظر لگانے دا شار ءِ؟

یا او مسنے وبا نا گواچی

یا ’دشمن غنیم‘ اس کرینے جلہو اوڑا؟

دشمن ہمو کہ ہچ ءُ دروشم اس اف اونا

و نئے او زندہ ءُ انسان اسے

او دیر اسے کہ انسان ءِ خلیک خوشی کیک؟

او دیر اسے کہ انسان ءِ بے شرف کیک، گل و بال مریک

ہر کس کہ مرے او انسان اس پاننگ مفک

و نئے انسان اس مننگ کیک

اے خدا! کنا شار دن بڑی بانگ ءِ انتئے؟

تینا لاش ءِ کوپہ ترسا

کنا کوپہ غاک ریش مسنو

قبر ختسا ختسا

کنا دوک پوتڑو کرینو

تینا ایڑھ و لمہ و مسن تے

دلاسہ ترسا ترسا دم درینٹ

دا امر ءُ غم اسے کہ اسُل کٹپک

امر ءُ عذاب اسے کہ اسُل ختم مفک

خڑینک آک خن تیٹ تربتر

کنا شار پِراد و چیہانٹ کیک

ارے کس اس دا پراد ءِ بنوک آ

کنا ٹھپ آتیا مرہم تخوک آ

انسانیت بے غم کرینے سیر تغ ءِ

دیر پائک مر ءِ قیامت

داکان بھلو قیامت پین برو ہراتم

انت اس کہ ای خن تیٹ تینا خناٹ

او ہم قیامت اسے آن ہچ کم اف

ہم داڑان بھلو غم پین مرو؟

Get real time updates directly on you device, subscribe now.

Leave A Reply

Your email address will not be published.