کوئٹہ، خوارجی تا برخلاف آپریشن برجا، مسہ دہشت گرد خلنگار

صوبائی وزیر داخلہ ضیاء لانگو دہشت گرد آتا برخلاف جنگ اٹی سیکورٹی فورس آتا ستاءِ کرسا پارینے کہ کوئٹہ نا کیبی علاقہ ٹی خوارجی تا برخلاف آپریشن برجا ءِ۔ دا وخت اسکان مسہ دہشت گرد خلنگانو وخت اس کہ اِرا سیکورٹی کارندہ ٹھپی مسنو۔ وزیراعلیٰ نا سیاسی ومیڈیا باندات کمکار شاہد رند اتون اوار پریس کانفرنس کرسا او پارے کہ تدوک آ دے کوئٹہ نا کیبی علاقہ ہنہ اوڑک اٹی دہشت گردی نا بھلو واقعہ اس پیش بس ہراڑان پد سیکورٹی فورس آک دہشت گرد آتا برخلاف آپریشن نا بناءِ کریر ہرا داسکان برجاءِ۔ او پارے کہ آپریشن اٹی دا وخت اسکان مسہ دہشت گرد خلنگانو و اِرا اے ٹی ایف کارندہ ٹھپی مسر۔ علاقہ ٹی چیک پوسٹ جوڑ کننگانے و پورو کلیئرنس اسکان آپریشن برجا سلک۔ دا وخت آ شاہد رند پارے کہ علاقہ ٹی دہشت گرد آتا برخلاف آپریشن برجاءِ و دا وخت آ راجی رابطہ غا رد اٹ حوال تالان کننگ ءِ توننگ کن اہم فیصلہ کننگانے۔ او پارے کہ اگہ اسہ راجی رابطہ گروپ اس رَد ءُ حوال تالان کننگ نا زموار مس تو اونا برخلاف سخت کانودی کارروائی کننگک۔