امریکہ تون مفاہمتی یادداشت آ عمل مشکل ارے، مننگ کپروک اف،باقر قالیباف

ایران نا پارلیمانی اسپیکر و چیف مذاکرات کار محمد باقر قالیباف پارینے کہ دا حالیت اٹی امریکہ تون مروک مفاہمتی یادداشت آ عملدرآمد مشکل ارے ولے مننگ کپروک اف‘ ولے ایران و امریکہ نا نیام اٹی داسکان بھلو اختلاف ساڑی اریر۔ ایرانی پارلیمانی اسپیکر باقر قالیباف دا ہیت تہران اٹی حماس نا سرکڑدہ کونسل نا سروک محمد درویش تون اوڑدہی نا وخت آ کرے، ہرا آیت اللہ علی خامنہ ای نا جنازہ نا دود اٹی بشخ ہلنگ کن ایران آ بسوسس۔ ایرانی میڈیا نا رِد اٹ باقر قالیباف پارے کہ ننا امریکہ تون ہچ ءُ خیر اس اف و نئے نن اسرائیل ءِ امنا کینہ، ایران، خامنہ ای نا پارت آتا رِد اٹ مسلمان و مزاحمتی تپہ غاتا مخ تفی ءِ برجا تخک، و گنجائشت مننگ آ میزائل آتا کمک اٹ یا سیاسی زور شاغنگ نا وخت آ گپ و تران نا کمک اٹ زور شاغک۔ او پارے کہ ایران ءِ بیرہ “مذاکرات برائے مذاکرات” آن پاناد مننگ المی ءِ، نن امریکی فریق ءِ پارینن کہ ڈیہہ انا ملک آتا سلامتی و ایران نا سیوتی مزاحمتی تپہ غاتا برخلاف جنگ انا ایسری ہم مفاہمتی یادداشت نا بشخ مننگ المی ئس، ہرا متن اٹی اوار کننگانے۔ باقر قالیباف پارے کہ اینو دا مفاہمتی یادداشت آ کاریم برجاءِ، و اونا نافذ مننگ مشکل ارے ولے مننگ کپروک اف‘ مسلم ملک آتا اہم ءُ کڑد اس ارے، انتئے کہ داسہ اوفتے سما تمانے کہ امریکہ و اسرائیل تون کمک اوفتے سلامتی فراوان کپک۔