سویڈن واقعہ، مچ آ پاکستان اٹ یوم تقدیس قرآن اڈ تننگا

اسلام آباد / کراچی/ کوئٹہ : یومِ تقدیس قرآن نا رد اٹ وزیراعظم شہباز شریف قوم آن جمعہ نماز آن پد برانزنا خواست کرینے۔ دا بابت کراچی نا پوریاگرک پارینو کہ اینو شار انا واپاری ہندجاٹ آک نیمروچ 2 بجہ غان چار بجہ اسکان برانزی وڑاٹ بند کننگار‘ یوم تقدیس نا وخت آ پوریاگر برادری نا بنجائی برانز نیمروچ 3 بجہ غان 4 بجہ اسکان ریگل چوک صدر آ اڈہلک‘ کراچی نا کل واپاری ہندجاٹ آتے ٹی پرامن برانز کننگا وقرآن کریم نا تلاوت کننگا۔ آل پاکستان فیڈریشن آف ٹریڈ یونین نا کنڈآن سویڈن اٹی قرآن پاک نا بے شرفی نا برخلاف برانزی مچی و ترند نعرہ بازی کننگا، مچی کروک آتیان تران کرسا حاجی رمضان اچکزئی پارے کہ سویڈن اٹی قرآن پاک نا بے شرفی فرد واحد نا کاریم اف بلکن اودے حکومت نا سرپرستی دوئی ئسک مسلمان تا مقدس کتاب نا توہین ءِ ہچ ءُ حالیت اسے ٹی منپنہ، ناموس قرآن ننا ایما ن نا بشخ ءِ اوپارے کہ حکومت پاکستان سویڈن حکومت آ پیدوار کے کہ اسلام تون اوار غٹ مذہب آتا مقدس کتاب آتا شرف ءِ کننگے، دنیا ءِ بدامنی خار و بے چیٹی تالان کننگ نا اسہ سازش اسے، قرآن پاک نا بے شرفی آن مچ آدنیا نا مسلمان تا است آزاری مسنے سویڈن واقعہ ٹی اوار بندغ آتے سخت سزا تننگے حکومت قرآن پاک نا بے شرفی نا برخلاف اقوام متحدہ ٹی پبی توار بڑز کے تانکہ پین وخت اس داوڑنا ناخوشگوار واقعہ پیش بف۔کوئٹہ ٹی جنرل ہندو پنچائیت و بلوچستان ہندو کونسل نا کنڈآن سویڈن اٹی قرآن پاک نا بے شرفی نا برخلاف جمعہ نادے آ برانزی ریلی اس کشنگا ہرا مسجد روڈ، قندھاری بازار، جناح روڈ آن مرسا پریس کلب آ سرمس ریلی ٹی بشخ ہلوک آتیان مکھی جگدیش کمار، نیشنل پارٹی نا اقلیتی راہشون درشن کمار بگٹی، پیپلزپارٹی نا اقلیتی راہشون سنجے کمار پنجوانی، رتن بھگوانہ، سنتوش چاولہ، دلیپ کمار و ایلوفک تران کرسا پاریر کہ سویڈن اٹی قرآن پاک نا بے شرفی و اودے نذر آتش کننگ نا واقعہ نا اخس کہ مذمت ءِ کننگے کم ءِ، اسہ مذہب اس ہم ایلو مذہب آتا مقدس ہستی و اوفتا کتاب آتا توہین نا اسُل موکل تفک قرآن پاک نا بے شرفی ءِ کروک آ بندغ انسان پاننگ نا ہم حقدار اف۔ اوپارے کہ جنرل ہندو پنچائیت و بلوچستان ہندو کونسل سویڈن اٹی قرآن پاک نا بے شرفی ءِ اسہ دنیا نا امن ءِ خراب کننگ نا اسہ بھلو سازش اس تکک۔ اوپارے کہ قرآن پاک نا بے شرفی آن مچ آ دنیا نا مسلمان تا است آزاری مسنے، ہندو کمیونٹی است ہسون واقعہ غا تینا مسلمان ایلم تتون سلوک ءِ۔ اوپارے کہ نن سویڈن حکومت، اقوام متحدہ و جہانی ادارہ غاتیان خواست کینہ کہ او سویڈن اٹی قرآن پاک نا بے شرفی ءِ کروک آ بندغ ءِ دمدستی وڑاٹ سخت آن سخت سزا ترفنگ اٹ تینا کڑد ءِ ادا کیر و آخبت داوڑنا واقعہ غاتا توننگ کن جہانی کانود جوڑ کننگے تانکہ پین اسہ بندغ اسے ہم پین مذہب اسے نا کتاب و مقدس ہستی تا توہین نا جیرت مف۔

(مانیٹرنگ ڈیسک/ اے پی پی)