شیفکو تپہ نا شونداری ءِ پک کننگ ءِ حکومت اولیت ایتک، وزیر اعظم

اسلام آباد : وزیراعظم محمد شہباز شریف بینظیر انکم سپورٹ پروگرام نا دنگ ءِ ودفنگ نا گرج آ زور شاغسا پارینے کہ دا پروگرام نا مسخت راج انا نزور تپہ و بندغ آتے تینا نت تیا سلفنگ و کاریمی ءُ شاری جوڑ کننگ ءِ۔ داخیال آتا درشانی ءِ او جمعہ نادے آ بینظیر انکم سپورٹ پروگرام نا رداٹ راجی رکھ اکاؤنٹ نا بناءِ کننگ نا دود آن تران کرسا کرے۔ دود اٹی بنجائی وزیر حوالکاری و شینکاری مریم اورنگزیب، بنجائی وزیر تخفیف نیزگاری و راجی رکھ شازیہ مری، وزیر مملکت فیصل کریم کنڈی، وزیراعظم نا کمکارآتیان بیدس ملکی سفیر آک، راجی تنظیم تا نمائندہ و سرکاری آفیسر آتا بھلو کچ اس ساڑی ئسر۔ وزیراعظم پارے کہ بی آئی ایس پی ءِ شازیہ مری و اونا ٹیم ہراوڑ چلیفیر است جمی و ستاکڑزنگ نا قابل ءِ۔ داپروگرام اٹ بھاز انگا پوسکن آگڑاتے اوار کننگانے۔ دادے پین شفاف جوڑ کننگانے و ودفنگانے۔ داپروگرام ءِ حکومت نا پورو کمک دوئی ئسک۔ وزیراعظم پارے کہ تدوک آ سال پاکستان اٹ بھسکار نوکاپ بس اوکان پد مخلوط حکومت نا غٹ سرکڑدہ غاک زہمی علاقہ غاتیا رسینگار۔ ہرکنڈا بھسکاری نظربسکہ۔ ہرامشکل حالیت آتیٹی نن حکومت نا بھاگ دوڑ ءِ سنبھالاسن، ننے نوکاپ نا حالیت اٹ اسہ پین بھلو مشکل اسے تون مون تروئی تما۔ ملک انا ہرچار آ صوبہ غاتون اوار بھازبھلو بشخ اس نوکاپ اٹ ڈبنگاسس و 3 کروڑ 30 لکھ بندغ زہمی مسوسر۔ بی آئی ایس پی نا رداٹ 70 ارب روپئی زہمی تیٹی بھاز شفاف وڑاٹ بشخنگا۔ سنگت ملک آک و پین ذریعہ غاتے اٹ ہرا امداد ملا اواوکان بیدس ئسر۔ صوبہ غاک ہم تینا وسیلہ غاتیان داٹی بشخ شاغار۔ 20،18 ارب روپئی این ڈی ایم اے تس۔ اوپارے کہ نوکاپ نا بھسکاری و اثرآک اینو ہم ہرکنڈا تالان نظر بریرہ۔ نوکاپ زہمی تیکن حکومت پین انتس کہ کیک او کم مریک۔ وزیراعظم پارے کہ بی آئی ایس پی نا رداٹ تعلیمی وظیفہ فراوان کننگ انگ ءِ ولے دا تعلیمی وظیفہ تعلیمی سفر نا برجاسلنگ تون مشروط مرے۔ وزیراعظم پارے کہ بی آئی ایس پی مسکوہی وزیراعظم بینظیر بھٹو شہید نا ویژن ئسک۔ داپروگرام ءِ مون آ دننگ نا گرج ءِ۔ وزیراعظم دا پروگرام کن پیشن کمکاری آ سنگت ملک و سفارت کار آتا منت واری ءِ ہرفسا پارے کہ داپروگرام کن اخس کہ کمک فراوان کننگے کم ءِ۔ دانا رداٹ نن تینا چناتے اسکول و کالج آتیٹی تعلیم ترفنگ و راج انا حقدار بندغ و تپہ غاتا کمک نا قابل مننگ کینہ۔ وزیراعظم پارے کہ داپروگرام نا مسخت مخلوق اٹ خیرات بشخنگ اف بلکن اوفتے تینا نت تیا سلفنگ و کاریمی ءُ شاری جوڑ کننگ ءِ۔ وزیراعظم آئی ایم ایف تون معاہدہ کن کمک فراوان کروک آ سنگت ملک آتا ہم منت واری ءِ ہرفے۔ داکان مست دود آن تران کرسا بنجائی وزیر تخفیف نیزگاری و راجی رکھ شازیہ مری پارے کہ بے سیبو زالبول آتے واکدار کننگ بے نظیر بھٹو شہید نا تغ ئسک، پروگرام آن فائدہ ہرفوک آ زالبول آتے بے پرخ امداد تننگ انگ ءِ۔ اوپارے کہ بینظیر انکم سپورٹ پروگرام نا رداٹ تعلیمی وظیفہ غاتا چرجوئی نا ہم بناءِ کننگ انگ ءِ۔ مچ آ ملک اٹی نشوونما پروگرام آن حقدار مخلوق فائدہ ہرفنگ ءِ۔ بی آئی ایس پی نا رداٹ ٹارگٹڈ سبسڈی تننگ انگ ءِ۔ بنجائی وزیر پارے کہ بینظیر انکم سپورٹ پروگرام نا رداٹ نوکاپ زہمی تا کمک ءِ کننگا۔ خواجہ سرا تے تاریخ اٹ اولیکو وار بی آئی ایس پی نا رداٹ امداد تننگا۔

(اے پی پی)