حوالدار لالک جان شہید جیرت نا بے مٹ ءُ داستان اسے

اسلام آباد : وزیراعظم محمد شہباز شریف پارینے کہ حوالدار لالک جان شہید (نشانِ حیدر) جیرت و نرزوری نا ہرا داستان ءِ نوشتہ کرے اودے مدام یات تخنگک۔ جمعہ نادے آ حوالدار لالک جان شہید نشانِ حیدر نا 24 می یوم شہادت آ تینا ٹویٹ اٹی وزیراعظم پارے کہ کن تون اوار مچ آ قوم حوالدار لالک جان شہید ءِ خراج عقیدت پیش کیک۔ اوپارے کہ قوم انا دا فرض شناس و نڈر گل زادہ دفاعِ وطن کن نرزوری و جیرت نا ہمو بیمٹ داستان ءِ نوشتہ کرے ہرادے مدام یات تخنگک۔ پاکستان نا دہشت گردی نا برخلاف جنگ مرے یا پیشن نا جارحیت نا برخلاف وطن عزیز نا دفاع نا باندات، ننا غازیک تینا کسبی مہارت ءِ جواں مردی و ننا شہید آک تینا جون تے ندر کرسا قومی نظریہ، ملکی سالمیت و ننا آجوئی نا رکھ ءِ پک کرینو۔ وزیراعظم دعا کرے کہ اللہ تعالیٰ حوالدار لالک جان شہید اتون اوار غٹ شہید آتا درجہ غاتے بڑزکے۔ اسپیکر قومی اسمبلی راجہ پرویز اشرف و ڈپٹی اسپیکر زاہد اکرم درانی حوالدار لالک جان شہید (نشان حیدر) ءِ شاندار لوز آتیٹی خراج عقیدت پیش کرسا پارینو کہ مچ آ قوم تینا دا نرزور و جری گل زادہ ءِ سلام پیش کیک۔ جمعہ نادے آ حوالدار لالک جان شہہید(نشانِ حیدر) نا 24 می برسی نا وخت آ جاری کلہو اٹی اوفک پاریر کہ حوالدار لالک جان شہید کارگل نا پڑآ لمہ وطن نا رکھ ءِ کرسا شہید ی نا جام ءِ نوش کرے، حوالدار لالک جان شہید دادِ شجاعت نا بے مٹ ءُ تاریخ اس نوشتہ کرے و دشمن ءِ پسپا مننگ آ بیوس کرے۔ اسپیکر پارے کہ مچ آ قوم حوالدار لالک جان شہید نا شجاعت و نرزوری آ گمر کیک، قوم تینا دا نرزور و جری گل زادہ ءِ سلام پیش کیک۔ راجہ پرویز اشرف پارے کہ دشمن ہم حوالدار لالک جان شہید نا نرزوری و شجاعت نا معترف ءِ، پاک فوج انا ورناک مدام ملک انا کنڈا گندہ انگا نظر اٹ ہروک آ تا جون ءِ پرواہ ءِ کننگ آن بیدس جیرت و نرزوری اٹ مقابلہ ءِ کریر، دہشت گردی نا برخلاف جنگ اٹ پاک فوج بے مٹ قربانی تس۔ ڈپٹی اسپیکر قومی اسمبلی پارے کہ پاک فوج انا شہید آتا قربانی تے تاریخ اٹ روشنالوز آتیٹی یات تخنگک۔ حوالدار لالک جان کارگل نا مشکل آ پڑآ سرفروشی نا بے مٹ ءُ داستان اس نوشتہ کرے۔ اوپارے کہ مچ آ قوم حوالدار لالک جان شہید ءِ اونابے مٹ قربانی آ سلام پیش کیک، لالک جان شہید نا بیمٹ قربانی تے تاریخ اٹ مدام روشنا لوزاٹی یات تخنگک۔ اوپارے کہ پاک فوج ملک انا سلامتی و بقاکن عظیم قربانی پیش کرینے ہراڑانن گمر کینہ۔

(اے پی پی)