قرآن نا بے شرفی نا واقعہ غاتے توروئی تمک، بنجائی وزیر مذہبی باندات

اسلام آباد : بنجائی وزیر مذہبی باندات سینیٹر محمد طلحہٰ محمود سویڈن اٹی قرآن پاک نا بے شرفی نا ترند انگا لوز آتیٹی مذمت ءِ کرسا پارینے کہ مچ آ پاکستانی قوم اسلام وقرآن حکیم تون مہرومریبت آ جان نثار ءِ، اسہ مسلمان اس ہم قرآن پاک نا گستاخی ءِ سگنگ کپک، اللہ نا آخیریکو کتاب قرآن حکیم قیامت اسکان بروک آ انسان تیکن رشد وہدایت نا وڑ اسے، سفارتی کہول آ داوڑنا واقعہ غاتا توننگ کن ننے گچین گام گیج کروئی مریک۔ جمعہ نادے آ تینا مذمتی بیان اٹی بنجائی وزیر مذہبی امور پارے کہ سویڈن اٹی قرآن پاک نا بے شرفی قابل مذمت ءِ، داواقعہ غان ارب آ مسلمان تا جوزہ غاک مجروح مسنو۔ اوپارے کہ قرآن پاک ننا مقدس کتا ب و اسہ پورو ءُ دستور حیات اسے، قرآن پاک ایلو مذہب آتیکن ہم کسر نا ڈیواءِ، قرآن مجید نا گستاخی  ءِ اسُل منپنہ۔ اوپارے کہ ننا غٹ مذہب آتا شرف ءِ کینہ، آجوئی درشانی سلاہ آ باور کینہ، ولے داوڑ کس اسے نا مذہب نا مقدس تا توہین ءِ اسُل سگنگ کپنہ۔ بنجائی وزیر پارے کہ وزیراعظم شہباز شریف نا کال آ اینو مچ آ ملک اٹی برانز مننگ ءِ، پاکستانی قوم اسلام و قرآن تون مہرومریبت و اوڑاجان نثار ءِ۔ اوپارے کہ  جے یوآئی کارندہ غاتیان خواست ءِ کہ او پرامن برانز اٹ پبی بشخ ہلیر، پرامن برانزاٹ دا ویل ءِ جہانی کہول آ تالان کننگک۔

(اے پی پی)