احتساب عدالت پلاٹ الاٹمنٹ کیس اٹی نواز شریف ءِ بری کرے

لاہور :  احتساب عدالت پلاٹ الاٹمنٹ کیس اٹ نواز شریف ءِ بری کرے۔ عدالت نیب و ریونیو بورڈ ءِ نواز شریف واونا میرات آتے ٹی شریدار آتا میرات آتے غیرمنجمد کننگ ناپرمان کرے‘ نوشتہ ئی فیصلہ ٹی پاننگانے کہ مسہ وارگچین مروک وزیراعظم ءِ اشتہاری گوندنگ نا کارروائی کانودآن چَپ ءِ‘ ریکارڈ آن لگک کہ نوازشریف آن سیاسی بیر ہلنگا‘ مسکوہی حکومت نیب ءِ نوازشریف نا آخبت ءِ خراب کننگ کن ریفرنس دائر کننگ آبیوس کرے‘ عدالتی کمکار موقف تینائی کرے کہ بنجائی دوبہ دار تے ہرا ریلیف تننگانے ہمو بایدے نوازشریف ءِ ہم رسینگے‘ بنجائی دوبہ دار تتون اوار اشتہاری ہم ہمو سزا یا ریلیف نا حقدار مریک‘ سپریم کورٹ نافیصلہ نا رد اٹ نوازشریف ءِ ہم ہمو ریلیف بایدے رسینگے ہرا ایلو دوبہ دار آتے تننگا۔ نوازشریف ءِ اشتہاری گوندنگ نا کارروائی کن پورو وڑ ڈول ءِ تینائی کننگتو‘ نوازشریف نا میرات آتا شریدار آک میرات آتے منجمد کننگ نابرخلاف اعتراض دائر کریر۔عدالت پرمان کرے کہ عدالتی فیصلہ نا کاپی ءِ چیئرمین نیب تون اوارایلوفتیا ہم راہی کننگے۔ داکان بیدس وزیراعظم شہبازشریف احتساب ریفرنس اٹ مسکوہی وزیراعظم وقائد ن لیگ نوازشریف نا بری مننگ آ شکر ادا کرینے‘ تینا بیان اٹ وزیراعظم پارے کہ اللہ نا شکر ءِ کہ محمد نوازشریف ءِ انصاف رسینگانے‘ احتساب عدالت نا فیصلہ گواہی تننگ اٹی ءِ کہ نوازشریف ءِ سیاسی وڑاٹ نسخان رسیفنگ کن رزاکا دروغ نا مقدمہ ٹی گٹ کننگا۔ عدالت امنا کرینے کہ نوازشریف لاہور ہائی کورٹ وحکومت ناموکل اٹ پیشن ملک آہنا۔ عدالت دا ہم امنا کرے کہ نوازشریف ملک اٹ مسکہ تو پرسجو نا بشخ مسکہ۔ وزیراعظم پارے کہ دا شاہدی ءُ کہ رزاکا ہمو وخت انا بیرہلوک حکومت نوازشریف ءِ نروک گوندفے۔

(آن لائن)