الس ءِ مقرر کروک نرخ آ نُت انا فراوانی ءِ ہر حال اٹ پک کننگک، وزیراعلیٰ بلوچستان

کوئٹہ: وزیراعلیٰ بلوچستان میر عبدالقدوس بزنجو پارینے کہ الس ءِ مقرر کروک نرخ آ نُت انا فراوانی ءِ ہرحال اٹ پک کننگک۔ وزیراعلیٰ سیکرٹریٹ آن جاری کروک بیان اٹی اوکمشنر نصیر آباد و ڈپٹی انسپکٹر جنرل پولیس نصیر آباد ڈویژن آن خولم صوبہ غان پیشن دننگ آ ہر خلوک پابندی آ عملدرآمد ءِ پک کننگ و دا بابت گام گیج آتا بابت رپورٹ اس مون تننگ نا پارت کرسا پارے کہ الس ءِ مقرر کروک نرخ آ نُت انا فراوانی ءِ ہرحال اٹ پک کننگے۔ وزیراعلیٰ پارے کہ محکمہ خور انا کنڈآن وخت آ خولم نا ہلنگ نا ہدف نا دوئی کننگ بھلو سرسہبی اسے دا سرسہبی نا بھرم تے الس اسکان سرکننگ آن اوفتے بھلو ریلیف اس ملک۔ وزیراعلیٰ پارے کہ وزیر خور زمرک خان اچکزئی نا کماشی ٹی محکمہ خور انا کارکڑد شاندار ئس خولم نا ساف و شفاف ہلنگ آ صوبائی وزیر خور و اونا ٹیم خراج تحسین نا حقدار ءُ۔ وزیراعلیٰ دا اومیت نادرشانی ءِ کرے کہ خولم نا بھلو کچ اسیٹی دوئی کننگ آن برجاسال نئے تو نت انا کاختی مریک و نئے گراں فروش آک تینا من مانی ءِ کننگ کیرہ۔

(اے پی پی)