کورونا نا کچ ودتو تو عئید آن پد اسکول آتے ملنگ نا وار رسینگک، لیاقت شاہوانی

کوئٹہ (آن لائن)حکومت بلوچستان نا ترجمان لیاقت شاہوانی پارینے کہ بلوچستان اٹ کوروناوائرس نا کیس آتیٹی  16 درسد کمتی بسنے ایس او پیز  آ عملدرآمد سلیس تو پین ہم حالیت آک جوان مریرہ، مُست سی پیک اٹ بلوچستان ءِ اینگ کننگا ہرانا اُست گوادر ءِ، وزیراعلیٰ بلوچستان سی پیک ءِ اولیت تننگ اٹی ءِ، حکومت دہ جاگہ باڈر مارکیٹ ملنگ نا خواہندار ءِ، بلوچستان اٹ تعلیمی ادارہ ملنگ نا بابت جتا جتا گڑاتا جاچ ءِ ہلنگ انگ ءِ۔ وزیراعظم بنجائی محکمہ غاتیٹی بلوچستان نا 6 درسدکوٹہ غا زوت اس عملدرآمد نا پارت کرینے، بلوچستان نا کوٹہ غا جعلی ڈومیسائل آن ملازمت کروک آتا برخلاف کارروائی برجا ءِ۔ دا خیال آتا درشانی ءِ او میڈیا ءِ بریفنگ ترسا کرے۔ لیاقت شاہوانی پارینے کہ بلوچستان اٹ سمارٹ لاک ڈاؤن نا37  میکو دے ءِ، ٹیسٹ ہمو وخت آن کم مسنے ہراتم ایس او پیز اٹ اوار ئس کہ ہرا علاقہ غاتیٹی کیس آک زیات اوفتے سیل کننگک کوئٹہ ٹی منہ ہند ءِ نشانی کننگاسُس ولے حکومت دا وخت اسکان ہچ ءُ علاقہ سے سیل کتنن او پارینے کہ عئید انا دے تیٹی کورونا نا ودنگ نا خلیس ارے ایس او پیز آ عمل برجا سلیس تو سمارٹ لاک ڈاؤن اٹ ودکی مریک، دا وخت آ دہ ہزار ہشت سد ءُ شانزدہ کورونا وائرس نا کیس آک جوان مننگ اٹی ءُ، جون اٹ شرح 32  درسدس ئس دا وخت آ کورونا نا تالانی نا شرح 16 درسد ءِ ہرا جوان ءُ ہیت اسے، او پارینے کہ 4755 بندغ جانجوڑ مسنو۔ او پارینے کہ کوئٹہ ٹء کورونا کیس آتا ترندی آن کم مننگ جوان ءُ ہیت اسے، اُلس ایس او پیز آتا خیال ءِ تختو تو ولدا سخت لاک ڈاؤن مریک۔ بلوچستان حکومتایران سیم آ ٹیسٹنگ لیب و کورنٹائن سینٹر اس جوڑ کرینے۔ لیاقت شاہوانی پارینے کہ تعلیمی ادارہ غان 15 جولائی اسکان بند ءُ ولدا ہم کورونا نا شرح ودتتو تو تعلیمی ادارہ غاتا بابت فیصلہ مریک وخت اس کہ عئید آن پد تعلیمی ادارہ غاتے ملنگ اٹ سختی مفک۔ وزیر اعلیٰ جام کمال خان نا پارت آ جعلی ڈومیسائل و لوکل آتا برخلاف کارروائی کننگ انگ ءِ۔ ڈپٹی کمشنر مستونگ 400 آن زیات لوکل سرٹیفکیٹ کینسل کرینے۔