وزیر اعظم نا کماشی ٹی پبلک سیکٹر ڈویلپمنٹ پروگرام نا بابت دیوان
Get real time updates directly on you device, subscribe now.
اسلام آباد: وزیر اعظم نا کماشی ٹی پبلک سیکٹر ڈویلپمنٹ پروگرام نا بابت بڑزکو کہولی دیوان مس ہراٹی اتحادی جماعت آتا پارلیمانی راہشونک بشخ ہلکر۔ دیوان اٹ آخبت نا مالی سال 2023-24 نا بجٹ سلاہ تیا سجفنگا۔ وزارت زرگزران و وزارت ڈٹ بندی نا کنڈآن دیوان نا بشخندار آتے شونداری بجٹ آ بریفنگ تننگا۔ اسمبلی نا باسک آتا شونداری اسکیم و فنڈ آتا فراوانی نا بابت دیوان اٹ سجفنگا۔ دیوان اٹ محکمہ غاتے اُلسی فلاح نا برجا انگا ڈٹ آتے زوت اس پورو کننگ نا پارت کرینے وخت اس کہ وزیراعظم زرگزرانی حالیت آتے مون آ تخسا ڈٹ جوڑ کننگ نا پارت کرینے۔ وزیر اعظم شہباز شریف پارینے کہ ساڑی حالیت آتیٹی ترجیحات آتے درست کننگ المی ءِ۔ اُلس نا جوانی کن اڑزان و آب انا ڈٹ جوڑ کننگے۔ وزیراعظم بجٹ اٹ نسوک آ تپہ ءِ ریلیف تننگ نا ٹارگٹ ترسا پارینے کہ یانزدہ سد ارب نا بنجائی شونداری پروگرام پاکستان نا زرگزرانی شونداری ٹی اہم ءُ کڑد اس ادا کیک۔
(آن لائن)