این اے 249‘ دوارہ حساب آخا گچین کاری نا خواہندار اُن، فواد چوہدری

اسلام آباد: بنجائی حوالکاری وزیر فواد حسین چوہدری این اے 249 اٹی دوارہ گچین کاری کرفنگ نا خواست کرسا پارے کہ دوارہ حساب نا جاگہ غا بایدے گچین کاری مرے۔ کورونا وائرس نا بابت ایس او پی تیا غٹ آن زیات کم عملدرآمد سندھ و خاص وڑ اٹ کراچی ٹی مسنے، مریم و بلاول کون آ نابالغ سرکڑدہ غاک ننے آ بیٹ کننگانو، ن لیگ و پیپلز پارٹی نا سیاست نا ایسری خڑک ءِ۔ بنجائی کابینہ نا دیوان آن پد میڈیا بریفنگ اٹی بنجائی حوالکاری وزیر فواد چوہدری پارے کہ سندھ و کراچی ٹی کورونا ایس او پی تیا عملدرآمد کل آن کم مسنے، ایس او پی تیا کل آن کم عملدرآمد سندھ و خاص وڑ اٹ کراچی ٹی مسنے۔ سندھ حکومت ایس او پی تیا عمل درآمد کرفنگ اٹ سرسہب مسنو۔ اومیت ءِ سندھ حکومت ایس او پی تیا عملدرآمد کرفک۔ اسلام آباد اٹی 88 درسد کورونا ایس اوپی تیا عمل مننگ اٹی ءِ۔ کراچی نا زہم مچ آ ملک آ تمک۔ 24 گھنٹہ ٹی کل آن مرک پنجاب و خیبرپختونخوا ٹی ریکارڈ کننگانو۔ تدوک آ دے 161 بندغ کورونا غان زوال مسنو، وخت اس کہ 3 ہزار 377 بندغ ءِ کورونا ہلکنے۔ او پارے کہ عئید انا چھٹی تیٹی لاک ڈاؤن کیس آتیٹی ودکی ءِ توننگ کن ءِ، نن خوانہ کہ اوورسیز پاکستانی تے وونٹ انا حق رسینگے، مسلم لیگ ن و پیپلز پارٹی اوورسیز پاکستانی تے وونٹ انا حق تننگ خواپسہ، الیکشن کمیشن اوورسیز پاکستانی تا وونٹ اکن کاریم کیک۔ الیکشن کمیشن ای وی ایم مشین کاریم اٹ اتنگ کیک۔ الیکشن کمیشن گچین کاری تیٹی ایس اوپی تیا عمل درآمد کرفتو۔ نن الیکشن کمیشن ءِ شیف خلپننگ اُن، ولے داڑا عمل نا گرج ارے۔ پاکستان اٹی ہم الیکشن کمیشن ءِ زموار رویہ دوئی کروئی تمک۔ او پارے کہ گچین کاری اصلاحات نا 4 بشخ ءُ، ہرافتیان اسٹ اس الیکٹرانک ووٹنگ مشین ءِ۔ گچین کاری اصلاحات نا ارٹمیکو بشخ ای ووٹنگ ءِ۔ ای ووٹنگ بنداوی وڑ اٹ اوورسیز پاکستانی تے کن ءِ۔ ای وی ایم مشین آن 20 منٹ اٹ مچ آ حلقہ نا گچین کاری نا نتیجہ مونی بریک۔ ای ووٹنگ آن پیشن ملک ہندی پاکستانی تے ووٹ بٹنگ نا حق رسینگک۔ کم وونٹ ہلوک آک ہم اسمبلی تیٹی کار تو تماشہ لگک۔ اوورسیز پاکستانی تا آسراتی تے کن ہم 24 سفارتخانہ ٹی ڈیسک جوڑ کننگ اٹی اُن۔ الیکشن کمیشن ءِ واکداری تننگانے کہ ای وی ایم مشین کاریم اٹ اتنگ کیک۔ بائیو میٹرک آ داسکان ٹیکنالوجی نا کاریم ءِ پوروی سلوک ءِ۔ فواد چوہدری نا پاننگ ئس کہ ن لیگ و پیپلزپارٹی نا سیاست نا چٹفنگ نا وخت خڑک ءِ۔ ننا زی آ نابالغ لیڈر شپ بیٹ ءِ۔ ہرافتے پارلیمان نا کڑدار نا سما اف۔ اسہ سوج اسے نا ورندی ٹی او پارے کہ عدالت آتیٹی وراثتی سرٹیفکیٹ ہلنگ کن بھلو وخت اس لگک۔ داسہ وراثتی سرٹیفکیٹ ہلنگ کن عدالت آتیا ہنوئی تمپک۔ داسہ نادرا فیملی ٹری ءِ ہرسا وراثتی سرٹیفکیٹ جاری کیک۔ اوورسیز پاکستانی تے کن ہم وراثتی سرٹیفکیٹ نا آسراتی نا بنا ءِ کننگ اٹی اُن۔ بنجائی وزیر پارے کہ عئید انا وخت آ بندی تا سزا ٹی 90 دے نا رعایت تننگانے۔ بھلا ڈوہ تا زموار آتیا د ارعایت نا اطلاق مفک۔ 65 سال آن زیات نرینہ بندی و 60 سال آن زیات وئی انا نیاڑی بندی تا سزا تیٹی کمتی مریک۔(آن لائن)