حکومت نا کورونا وائرس نا باندات قومی اسمبلی نا دیوان ءِ بٹنگ نا فیصلہ

اسلام آباد (مانیٹرنگ ڈیسک) بنجائی حکومت کورونا وائرس نا باندات قومی اسمبلی نا دیوان ءِ 11 مئی آ بٹنگ نافیصلہ کرینے۔ قومی اسمبلی نا دیوان ءِ بٹنگ نا باندات سید فخرامام ناکماشی ٹی خصوصی کمیٹی نا دیوان اڈ ہلک‘ ہراٹی سیاسی جماعت آتا پارلیمانی راہشونک بشخ ہلکر۔دیوان اٹ قومی اسمبلی نا دیوان ءِ 11 مئی آ بٹنگ انگ نا فیصلہ کننگا ہرا دوشنبے نا دے سَے بجہ غا بنا کریک۔ ایلو کنڈآ پارلیمانی راہشون تا دیوان آن پد وزیرخارجہ شاہ محمود قریشی میڈیا تون ہیت وگپ کرسا پارے کہ دوشنبے نا دے سَے بجہ غا پارلیمنٹ نا دیوان ءِ بٹنگ انگک۔ او پارے کہ دیوان اسہ دے انا وقفہ ٹی برجا سلک‘ وخت اس کہ پک کننگانے کہ دا دیوان نا کورم نا نشاندہی کننگک و دادے کورونا اسکان کچ اٹ کننگک۔او پارے کہ پریس گیلری آن بیدس وزیٹر آتے پارلیمنٹ نا دیوان اٹ بشخ ہلنگ نا موکل مفک و دا وخت آ پارلیمنٹ لاجز اٹ ہم ہن وبر ءِ کم کننگک۔ یات سلے کہ اپوزیشن کیہی وار کورونا نا باندات پارلیمنٹ نا دیوان ءِ بٹنگ نا خواست کرینے وخت اس کہ مسلم لیگ (ن) 13 مارچ آ کورونا وائرس نا بابت حکمت عملی جوڑ کننگ کن پارلیمنٹ نا اسیجائی دیوان ءِ بٹنگ انگ کن درخواست ءِ اسپیکر قومی اسمبلی تون جمع کرفیسس۔