وزیراعلیٰ بلوچستان جام کمال خان کورونا وائرس ننا بابت جوڑ صوبائی کمانڈ اینڈ آپریشن سینٹر نا دورہ

کوئٹہ (خ ن) وزیراعلیٰ بلوچستان جام کمال خان کورونا وائرس ننا بابت جوڑ صوبائی کمانڈ اینڈ آپریشن سینٹر نا دورہ ءِ کرے، وزیراعلیٰ ءِ سینٹر نا انچارج عمران گچکی نا کنڈ آن بریفنگ ترسا پاننگا کہ صوبائی کمانڈ اینڈ آپریشن سینٹر ءِ وزیراعلیٰ نا گائیڈ لائن نا رد اٹ پبی وڑ اٹ فعال کننگ انگ ءِ۔ سینٹر کن چندی بشخ آتا چاہندار و اکیڈیمیا تا خذمت آتے دوئی کننگانے۔ و کوروناوائرس نا تالانی نا چندی بشخ آتیا مروک زہم انا آزموندہ کننگ انگ ءِ، وخت اس کہ سینٹر اٹی وائرس نا تالانی نا رجحان نا جاچ ءِ ہم ہلنگ انگ ءِ۔ او پارے کہ ڈویژنل کہول آ ہم سینٹر جوڑ کننگانے، ہرا انٹرنیٹ نا کمک اٹ صوبائی کمانڈ اینڈ آپریشن سینٹر تون گنڈوک ءُ۔ وزیراعلیٰ سینٹر نا کارکڑد آ است جمی نا درشانی کرسا پارے کہ کمانڈ اینڈ آپریشن سینٹر ءِ کورنا وائرس نا زہم آتیان ہم آخبتی بنداو آ فعال تخسا اسہ تھنک ٹینک اسے نا درجہ تننگک۔ ہرا ہلہلہ ئی حالیت و دین انا دے تا مون ءِ توننگ نا حکمت عملی اس ٹہیفنگ آن بیدس زرگزرانی واقتصادی باندات آتتون اوار ایلو اہم انگا باندات آتیا صوبائی حکومت ءِ راہشون فراوانی نا زمواری ءِ ادا کیک۔ وزیراعلیٰ پارے کہ آپریشن سینٹر اٹی غٹ بشخ آتا بابت دوئی ڈیٹا ءِ گچین ءُ میکنزم اسے نا رد اٹ کاریم اٹ اتنگ آن کمک رسینگک۔ او پارے کہ مستین نئے ادارہ غاتیٹی کاریم کننگ نا چاگڑد اس مسنے، و نئے افسر آتا لائخی تیان فائدہ ہرفنگانے، حالانکہ دا پولیٹیکل لیڈر شپ انا زمواری ءِ کہ صوبہ نا گرج آتا رد اٹ چاہندار آتا ہر بشخ اٹی خذمت آک دوئی کننگر۔ او پارے کہ کمانڈ اینڈ آپریشن سینٹر ءِ آخبت نا گرج آتا رد اٹ پین ودسا اوڑان پبی فائدہ ہرفنگک۔ وزیراعلیٰ پارے کہ ریسرچ و تخلیقی سرجز آتا شون تننگ، سمارٹ لاک ڈا¶ن و سمارٹ رینڈم کورونا وائرس ٹیسٹنگ نا تصور ءِ عملی دروشم تننگ کن کمانڈ سینٹر تینا سلاہ سوج آتے پیش کے، اوفتے مون آ تخسا عملی گام گیج مننگ کیک۔ او پارے کہ کورنا وائراس نا زہم انسانی جانجوڑی، زرگزران و امن ایمنی آ تمنگ ءِ۔ ہرانا مون ءِ توننگ کن چاہندار ءُ سج و پامداری اسے نا بنداو آ جامع حکمت عملی اسے نا گرج ءِ۔ دا وخت آ ڈائیریکٹر او آر آئی سی ڈاکٹر وحید نور بلوچستان اٹی کورنا وائرس نا ساڑی حالیت و آخبت اٹی انسانی جانجوڑی و معیشت تون اوار چندی بشخ آتیا تموک گمانی زہم تا بابت کننگوک بنائی ریسرچ آ بریفنگ تس۔ وزیراعلیٰ دا وخت آ کورونا وائرس نا حالیت نا چاروکی کن جوڑ کننگوک ڈیش بورڈ انا بناءِ ہم کرے، وزیراعلیٰ ءِ حوال تننگا کہ سینٹر نا موبائل ایپلیکیشن ہم جوڑ کننگانے، ہرادے زُوت درستی راستی کرفنگک۔ پارلیمانی سیکرٹری جانجوڑی ڈاکٹر ربابہ بلیدی فوکل پرسن میر عمیر حسنی و جانجوڑی سیکرٹری دوستین جمالدینی اسک ہم دا وخت آ ساڑی ئسر۔