وزیراعظم نا ملک انا کنسٹرکشن نا بشخ اکن تاریخی ایمنسٹی اسکیم اسے نا پڑو

اسلام آباد (اے پی پی) وزیراعظم عمران خان پارینے کہ کورونانا چیلنج دیکی آن جتاءِ، مچ آ ملک ءِ لاک ڈاون کننگ کپنہ، نن 1200ارب روپئی نا ریلیف پیکیج اس تسونن، ہراڑان لس بندغ نا ساڑی حالیت آتے ٹی خواری تے کم کننگ مریک، مخلوق ءِ روزگار تننگ کن کشت وکشار آن پد ارٹ میکو بھلا سیکٹر تعمیرات ءِ، تعمیرات نا بشخ ءِ انڈسٹری نا درجہ تننگ اُن، و تعمیرات کن کنسٹرکشن انڈسٹری بورڈ اس جوڑ کننگ انگ ءِ، تعمیراتی بشخ ءِ 14اپریل آن ملنگک، داسال تعمیراتی بشخ اٹ زرخلوک آڑان کٹیا نا وڑ انا ارّفنگپک، فکسڈ خراج نافذ کننگک ہراڑان خراج دزی ٹی کمتی مریک، پوسکن آ پاکستان ہاوسنگ اسکیم کن سی ارب نا سبسڈی تننگ اُن، ہچ کس دا تکپ کہ پاکستان اٹی کورونانا خطرہ اف۔ داخیال آتا درشانی ءِ او جمعہ نادے آ داڑے تعمیرات نا بشخ اکن پیکیج نا پڑو ءِ کرساکرے۔ اوپارے کہ کورونا مچ آدنیاٹی چیلنج اس مسنے ، پاکستان اٹی کورونانا چیلنج دیکی آن جتا ءِ۔ دیکی ٹی اسہ کنڈآکوروناءِ تو ایلو کنڈآ زرگزران ءِ و پاکستان اٹی اسہ کنڈ آ کوروناو ایلو کنڈآبین ءِ۔ وزیراعظم پارے کہ چین ووہان ءِ پورو وڑاٹ اِراتواکن لاک ڈاون کرے، پاکستان اٹ لاک ڈاون نا مطلب ءِ کہ نیزگار آبادی تے بند کننگے۔ ہنداسوب آن مچ آ ملک ءِ لاک ڈاون کننگ کپنہ۔ اوپارے کہ نن کوروناغان ودی مروک آحالیت آتارداٹ لس بندغ ءِ ریلیف تننگ کن 1200ارب روپئی نا پیکیج اس تسنن، ہموخاہوت ہرافتا کٹیا نا وڑ زہمی مسنے، ءِ کمک رسینگک۔