
کچ اٹنگا وسیلہ غاتیٹی ہم 6 ہزار بندغ ءِ طبی آسراتی فراوان کرینن، جام کمال
کوئٹہ(آن لائن)وزیراعلیٰ بلوچستان میر جام کمال خان پارینے کہ کچ اٹنگا وسیلہ غاتیٹی ہم 6 ہزار بندغ ءِ طبی آسراتی فراوان کرینن، کورونا وائرس نا مون ءِ توننگ کن بنجائی حکومت آن 50 ہزار ٹیسٹنگ کٹ بٹنگ انگانے، ہرا زُوت دوئی مریرہ۔ پاکستان اٹی اِرا مسہ تُو اٹی نہہ لکھ شاری کورونا وائرس آن زہمی ملک آتیان فضائی سفر کرسا ملک اٹ پترینگانو، اوفتا اسکریننگ مسنے ولے کرنٹائن متنو، داسہ سما اف کہ دا بندغ آک ہراڑکنو۔ انتئے کہ کورونا وائرس کن المی اف کہ اوٹی علامت آک پاش مریر، دا وخت آ ہم صوبہ ٹی کورونا وائرس نا گیشتری زہمی ناجوڑ آتیٹی ہچ ءُ وڑ اسے نا علامت اس خننگتنے۔ گیشتری ہندن ءُ ناجوڑ اریر، ہرافتے جکہ، اِڷ، یا زکام ہم اف۔ ولے ولدا ہم اوفتا ٹیسٹ آک پازیٹو بسنو۔ حکومت بلوچستان تینا کچ اٹنگا وسیلہ غاتیٹی مرسا داتم اسکان 6ہزار بندغ ءِ طبی تون اوار ایلو آسراتی تے فراوان کننگ اٹی ءِ، وخت اس کہ اونا واکداری کچ ءِ ودفنگ انگ ءِ۔ دا ہیت آتا درشانی ءِ او نجی ٹی وی تون ہیت و گپ کرسا پارے کہ ساڑی حالیت اٹی کورونا وائرس نا مون ءِ توننگ کن بنجائی حکومت دمدستی وڑ اٹ 50ہزار ٹیسٹنگ کٹ وینٹی لیٹر و آئی سی یو نا آسراتی فراوان کے۔ تفتان آ اعتراض کروک آک د اپار کہ ملک اٹی اِرا مسہ تُو اٹی 9 لکھ شاری کورونا وائرس آن زہمی ملک آتیان فضائی سفر کرسا ملک اٹی پترینگانو۔ وخت اس کہ بلوچستان اٹی ہم 12ہزار آن زیات بندغ فضائی سفر کرسا پترینگانو، ہرانا پورو اسکریننگ تو کننگا، ولے کرنٹائن متنو، ولے داسہ دا سما اف کہ دا بندغ آک ہراڑکنو۔ انتئے کہ کورونا وائرس کن المی اف کہ اوفتیٹی علامت آک خننگر۔ تفتان اسہ پد تموک ریک اسے۔ ہراڑے زائر آتتون اور ایلو بندغ آتے میڈیکل تون اوار سیکورٹی فراوان کننگ نا چیلنج ءِ تینے آ ہرفین، ایف سی، پاک آرمی تون اوار صوبائی محکمہ غاتتون اواری اٹ کاریم کننگ اٹی اُن۔ تفتان آن کوئٹہ 7 سَد کلو میٹر مُر ءِ۔ و تفتان اسہ پد تموک ریک اسے۔ اوڑے حکومت بلوچستان دمدستی و ہلہلہ ئی بنداو آ ہرا گام گیج آتے کرے او بیرہ نن کن اسہ چیلنج اس ئسر، ولے نن دادے چیلنج ءِ تینا زی آ ہرفین۔ و ایران آن بروک ہزار آتا کچ اٹ زائر آتے غٹ آسراتی تے فراوان کرین۔ بلوچستان اسہ وائٹ صوبہ اسے، داڑے ہر کنڈ انا سیبو کوئٹہ غاٹے۔ بلوچستان اٹی داتم اسکان 12 ہزار بندغ نا ٹیسٹ کرینن، نن داسکان پیشن آن بروک آ بندغ آتا ٹیسٹ آتے کننگ اُن۔ ایلو 99 درسَد نا تو سما ہم اف۔ ینگ ڈاکٹر آتا گڑتیک اریر، زُوت اوفتا گڑتی تے چٹفنہ۔ ایران اٹی ہراتم کورونا وائرس نا کیس پک مس تو ای ڈاکٹر ظفر مزا ءِ پاریٹ کہ ایران تفتان بارڈر ءِ سیل کننگ اُن، و کرین تے ہم۔ ولدا ڈاکٹر ظفر ہمت کرے کوئٹہ غا بس، و ایران تفتان بارڈر نا دورہ ءِ ہم کرے۔ او پارے کہ بارڈر ءِ ملنگ جوان مرو۔ ای پاریٹ کہ نن تون تفتان اٹی اسہ بارڈر اسے آن بیدس پین ہچ اس اف۔ اگہ بارڈر ءِ ملان تو الس نا سوردریاب اس ریک۔ نن کنٹرول کننگ کپنہ تے، ہمو وخت آ ایرانی حکومت 300پاکستانی شاری تے کشسا بارڈر آ اِلا۔ او پارے کہ نما منشا امر کہ کیرے کبو، نن دافتے کورنٹائن کننگ کپنہ۔ ولدا نن پانزدہ بیست دے اسکان اوفتے کورونٹائن اٹی تخان، کننگ بیننگ نا آسراتی تسن، کمتی نا توگمان ارے انتئے کہ تفتان پد تموک ءُ علاقہ اسے، اوڑسکان آسراتی تے رسیفنگ مشکل ءُ کاریم اس ئسکہ۔