ایرانی کمامدار آتے کورنٹائن کننگ نا پارین ولے منتو، میر ضیاءلانگو

کوئٹہ(آن لائن)وزیرداخلہ میر ضیاءاللہ لانگو پارینے کہ ایرانی کمامدار آتے مہالو پاریسن کہ اوڑے ساڑی مخلوق ءِ کورنٹائن اٹ تخنگے۔ ولے اوفک ننا ہیت ءِ ہلتوس۔ و اگہ پین بندغ ہم تفتان آ بس تو اوفتے توننگ کپنہ۔ یخین اٹ بروک آ مسہ ہفتہ کورونا وائرس نا بابت بھاز اہم ءُ۔ لاک ڈاﺅن اٹ پین سختی اتنگ نا بابت سجفنگ اٹی اُن۔ ضلعی انتظامیہ تون اوار کانود نافذ کروک آ ادارہ غاتے لاک ڈاﺅن اٹ پین سختی نا پارت ہم کرینن۔ وائرس ہندی کہول آ ہم پین تالان مننگ نا بناءِ کرینے، ہراڑکن موبائل ٹیم تے اُرا اُرا غا راہی کرسا اسکریننگ و ٹیسٹنگ نا عمل ہم بنا کننگانے۔ دا خیال آتا درشانی ءِ او شار انا چندی ادارہ غاتا اناگت دورہ ءِ کرسا کرے۔ دا وخت آ میڈیا تون ہیت و گپ کرسا او پارے کہ شار انا چندی علاقہ غاتیٹی حالیت نا تینٹ جاچ ءِ ہلکٹ، ولے بد بختی نا ہیت اسے کہ شاریک لاک ڈاﺅن آ ہمو وڑ عملدرآمد کپننگ اٹی ءُ، ہرا وڑ کہ کروئی ئس۔ گڑا لاک ڈاﺅن ءِ پین سخت کننگ نا بابت سجفنگ اٹی اُن۔ حالیت آتیان تو ہندن خننگک کہ لاک ڈاﺅن اٹ پین سختی اتنگے۔ گڑا السی خواری تے مون آ تخسا ضلعی انتظامیہ ءِ و کانود نافذ کروک آ ادارہ غاتے دا پارت کننگانے کہ لاک ڈاﺅن و دفعہ 144 نا خلاف ورزی کروک آتا برخلاف کارروائی تے پین سخت کننگے۔ و ہر حال اٹ لاک ڈاﺅن آ عملدرآمد ءِ پک کننگے، انتئے کہ بروک آ مسہ ہفتہ کورونا وائرس نا بابت بھاز اہم ءُ۔