ڈیفالٹ نا گمان اف، تنکی نا چرجوئی سلیسنے، اسحاق ڈار

اسلام آباد : بنجائی وزیر خزانہ سینیٹر اسحاق ڈار چیئرمین پی ٹی آئی عمران خان و اونا ٹیم ءِ مناظرہ نا چیلنج ترسا پارینے کہ نن ریاست ءِ بچفنگ کن سیاست ءِ نسخان رسیفین‘ عمران خان ءِ اتوک و اونا رکھ ءِ کروک آک تینا وڑ تیا ارمان کریر‘ عمران خان ملک ءِ بھس مننگ نا دنگ آسر کرے‘ پی ڈی ایم نا حکومت اٹ بننگ نا فیصلہ ستا کڑزک‘ اللہ نا فضل اٹ ملک ڈیفالٹ مفک‘ دا وڑ انا ہیت کروک آک ملک دشمنی کننگ ءُ‘ نن آخا عمران خان ءِ اتوک آک پاننگ اٹی ءُ کہ اگہ عمران خان سلیسکہ تو ملک بھس مسکہ‘ عمران خان نا بیرہ نت اٹ مزغ ہم خراب ءِ‘ نوکاپ نا حالیت آتا سوب آن نن خولم و دال پیشن آن درآمد کننگ اٹی ان، مس مینجمنٹ ہم ویل اس جوڑ مسنے‘عمران خان نا دور اٹ فی بندغ کٹیا ٹی ودکی متو‘ مسکوہی حکومت اٹ فسکل ڈیفیسٹ 7.9 درسَد آ ئس‘ کرنٹ اکاؤنٹ ڈیفیسٹ 4.06 درسَد وخت اس کہ ٹریڈ ڈیفیسٹ 3.9 بلین ئس‘ ننا دور اٹ جی ڈی پی نمو 4.7درسَد ئس اونا حساب اٹ جی ڈی پی نمو 3.5 درسَد ئس‘ ساڑی حکومت نا بننگ تون نوکاپ بھس کاری کرے‘ ہرانا سوب آن سی ارب ڈالر آن زیات نا نسخان مس۔ اسلام آباد اٹ پریس کانفرنس آن تران کرسا وزیر خزانہ پارے کہ عمران خان تینا اقتدار آن بیدس پین ہچ اس خنپک عمران خان خواہک کہ ملک ڈیفالٹ مرے‘ کیہی وار پارینے کہ ملک پنک‘ اونا ہندا وڑ انا ہیت آتیان ملک اٹ واپاری و اسٹاک مارکیٹ آ ہم منفی زہم تمانے‘ او راستکی تیان چپ ہیت کیرہ‘ ای باور کرفوہ کہ اللہ نا فضل اٹ ننا ملک نئے ڈیفالٹ مسنے و نئے مریک۔ او پارے کہ عمران خان ءِ تینا بیدس پین ہچ نظر بفک۔ اسحاق ڈار پارے کہ نن ریاست ءِ بچفنگ کن تینا سیاست ءِ نسخانی کرین‘ پی ڈی ایم ناکنڈآن اپریل اٹ حکومت ہلنگ نافیصلہ ستا کڑزک‘ نن انشاء اللہ دا مشکل وخت آن ملک ءِ کشنہ۔ او پارے کہ دا وخت سیاست کننگ نا اف‘ اسیجا تولسا فیصلہ کروئی مریک کہ پاکستان کن انت کننگے۔ خزانہ اسحاق ڈار پارے کہ دَرو آن میڈیا غا زرگزران نابابت بھاز شرہ مننگ اٹی ءِ نن سوچان میڈیا نا کمک اٹ عمران نیازی ءِ راستکی تیان آگاہ کننگے۔ دا حکومت سیاست ءِ بچفنگ نا جاگہ غا ریاست ءِ بچفنگ نا اصولی فیصلہ کرے‘ عمران خان پاکستان ءِ ڈبیفنگ نا ڈٹ جوڑ کریسس۔ او پارے کہ ریاست مس تو سیاست ہم مریک‘ نن حکومت اٹ بننگ نا درست ءُ فیصلہ اس کرین‘ اگہ عمران خان مسہ چار تُو پین مسکہ تو اوڑتون اوار پاکستان ہم ڈبینگاکہ۔

(آن لائن)